ჩიორა თაქთაქიშვილი - ვერცერთი ოქროს მედალი ვერ ჩამორეცხავს ერს ამ სირცხვილს

საპარლამენტო უმცირესობის წევრი ჩიორა თაქთაქიშვილის "ფეისბუქის" საკუთარ გვერდზე სოჭის ოლიმპიადაში ქართველი სპორტსმენების მონაწილეობას აპროტესტებს.

"შევეცდები, რომ ამ თემაზე მეტი აღარც დავწერო. ამას ვწერ მარტო იმიტომ, რომ მაინც ვერ გავიგე, რა არის აქ გაუგებარი?! სოჭში იმიტომ არ უნდა წავიდეთ ოლიმპიადაზე, რატომაც არ მიდიან საქეიფოდ და დროის გასატარებლად იმ არაადამიანთან, რომელმაც სახლ-კარი გადაგიწვა, ცოლ-შვილი გაგიუპატიურა და ქმარი მოგიკლა, შენს სახლში დასახლდა, შენ კი გამოგდევნა და შენი ოჯახის წევრების საფლავთანაც არ გაკარებს, თან ქეიფის პარალელურად შენი ახალი სახლიდანაც აყრას გიპირებს და სხვაგან გადასახლებას გაიძულებს იარაღის მუქარით. ეს არ არის გაზვიადება, ეს არის რეალობა. ასეთია დღეს ჩვენი და რუსეთის ურთიერთობა. და რა შუაშია ამასთან სპორტის და პოლიტიკის გამიჯვნა-არგამიჯვნა. ერს, ისევე როგორც ადამიანს ან აქვს ღირსება, ან - არა. სახელმწიფოს ჩინოვნიკები კი ვალდებული არიან, ერის ნება აღასრულონ. ამიტომ სოჭის ოლიმპიადა ორმაგი ტესტია ერისთვისაც და ხელისუფლებისთვისაც. რაც შეეხება სპორტსმენებს, ვერცერთი ნიჭიერი სპორტსმენის ოქროს მედალი ვერ ჩამორეცხავს ვერც ერს და ვერც სახელმწიფოს ამ სირცხვილს", - წერს თაქთაქიშვილი.

2014 წლის ზამთრის ოლიმპიური თამაშები 7 თებერვალს სოჭში ჩატარდება. საქართველოს სახელით ოლიმპიადაში 4-მა სპორტსმენმა უნდა მიიღოს მონაწილეობა.