18
ივნისიდღის ზოგადი ასტროლოგიური პროგნოზი
განათლების მინისტრის ყოფილი მოადგილე დავით ზურაბიშვილი "ფეისბუქის" საკუთარ გვერდზე "ნაციონალური მოძრაობის" გუშინდელ ყრილობას ეხმაურება.
""ნაცმოძრაობის" ყრილობის თაობაზე მინდა ორიოდ სიტყვა მოგახსენოთ.
ამ პარტიის მთავარი პრობლემა არის ის, რომ მისი ლიდერებიც და მომხრეებიც თავს მოიაზრებენ არა დასავლური ტიპის პარტიად - ანუ საზოგადოების ნაწილად, რომელიც აღიარებს სხვა ნაწილების სრულუფლებიან არსებობას - არამედ ტოტალიტარული ტიპის პარტიად, როდესაც პარტია საზოგადოების ნაწილი კი არაა, არამედ რჩეული ელიტა, მოწინავე ავანგარდი, რომელმაც უნდა წაიყვანოს ხალხი დიადი, ნათელი იდეალებისკენ. ჰიტლერი ამბობდა: ხალხი ნეხვის გროვაა, ნაცისტური პარტია კი მაგნიტი, რომელიც ამ ნეხვიდან რკინის ნაჭრებს, ანუ ღირსეულ ადამიანებს მოიზიდავსო. (გაიხსენეთ აგრეთვე საბჭოური "партия - наш рулевой!"). "ნაცმოძრაობის" მთელი რიტორიკა, მთელი პათოსი თუ დისკურსი ადრეც ასეთი იყო და, როგორც გუშინდელმა ყრილობამ აჩვენა, ახლაც ასეთია.
ჰოდა, როდესაც "ნაცმოძრაობა" პრეტენზიას აცხადებს პროდასავლურობის ექსკლუზივზე, ანუ მიიჩნევს, რომ მარტო თვითონაა ლიბერალური დემოკრატიის მიმდევარი, ეს, ჯერ ერთი, შეუსრულებელი მისიაა, რადგან ლიბერალური დემოკრატია პრინციპულად გამორიცხავს ასეთ ექსკლუზიურობას; გარდა ამისა, ეს ასევე გამორიცხავს ნორმალურ და სრულფასოვან მონაწილეობას ქვეყნის პოლიტიკურ ცხოვრებაში, რადგან ასეთ პარტიას შეუძლებელია ჰყავდეს პარტნიორები - მას შეიძლება ჰყავდეს მხოლოდ სატელიტები. ის ან მარტო თვითონაა ხელისუფლებაში, ან მის არსებობას აზრი ეკარგება.
ხოლო როცა ასეთი პარტია უკვე იყო ხელისუფლებაში და ყველა ჩვენგანს გამოცდილი აქვს საკუთარ თავზე, თუ რა იყო ეს; როცა ასეთი პარტიის ხელისუფლებიდან გასტუმრებისთვის საჭირო გახდა ლამის მთელი ერის მობილიზაცია და ქვეყანაში ყველაზე მდიდარი და რეიტინგული პერსონის პოლიტიკური ლიდერობა; ყველაზე უარესი, რაც მან შეიძლება შესთავაზოს საზოგადოებას, არის იგივე რიტორიკა, იგივე პათოსი და იგივე ლიდერები.
მოკლედ, არაფერი ამათ არ ეშველებათ", - წერს ზურაბიშვილი.
გუშინ სპორტის სასახლეში "ნაციონალური მოძრაობის" რიგით VI ყრილობა გაიმართა. ყრილობაზე ცნობილი გახდა, რომ პარტიის თავმჯდომარედ მიხეილ სააკაშვილი რჩება, გარდა ამისა, არ შეიცვლება პარტიის გენერალური მდივანი და ამ პარტიულ თანამდებობაზე ისევ ვანო მერაბიშვილი იქნება წარდგენილი.
