24
მაისიდღის ზოგადი ასტროლოგიური პროგნოზი
ერთი წლის წინ, 2012 წლის 30 სექტემბერს, გვიან ღამით, ქვეყანა გურჯაანის რაიონის სოფელ კოლაგში 10 თვის ბარბარე რაფალიანცის დაღუპვის ამბავმა შეძრა. კოალიცია "ქართული ოცნების" გურჯაანის მაჟორიტარი დეპუტატობის კანდიდატმა მანანა ბერიკაშვილმა მაშინ განაცხადა: - მე ველაპარაკები მთელ საქართველოს, სირცხვილია, ხალხო, ნუ "გააპრავებთ" ამ საძაგლებს, 9 თვის ბავშვი მოკლეს, გესმით, თქვენ? საქართველო, გაიღვიძე, ნუ დადგებით ამ მხეცების გვერდით, დააკავეთ გიორგი ღვინიაშვილი, მკვლელი, რომელმაც ბევრი მოკლა ამ ქვეყანაზე. ეს უნდა იყოს უკანასკნელი". მომხდარიდან ერთი წელი გავიდა, თუმცა საქმე ჯერაც გამოუძიებელია. კითხვები და ეჭვები საზოგადოებას კვლავაც აწუხებს. რატომ გაჭიანურდა ასე საქმის გამოძიება? - თავის მოსაზრებას პარლამენტარი გიორგი ღვინიაშვილი გვიზიარებს, რომელიც მომხდარში ერთ-ერთი პირველი დაადანაშაულეს:
- ამ საქმის გამოძიება ამ ქვეყანაში თუ ვინმეს აინტერესებს, იმათგან უპირველესი მე ვარ, რადგან მართლაც ჩემი გვარ-სახელი აბრუნეს წაღმა-უკუღმა და სცადეს ამოესვარათ ლაფში. "ქართული ოცნების" მაჟორიტარმა დეპუტატმა მანანა ბერიკაშვილმა პირდაპირ დამდო ბრალი ამ საშინელების ჩადენაში, რის მერეც სინდისს იმდენადაც კი არ შეუწუხებია, რომ ბოდიში მაინც მოეხადა. მოკალათებულა მინისტრის მოადგილის სავარძელში და სულ არ ახსოვს რაფალიანცები. წელიწადი გავიდა ამ ტრაგიკული საქმიდან და ჯერაც არაფერია გარკვეული. ბუნებრივად მიმტკიცდება ეჭვი, რომ ამ საქმის გახსნა ივანიშვილის ხელისუფლებას ხელს არ აძლევს. ეს სამწუხარო შემთხვევა "ქართული ოცნების" იმჟამინდელმა აქტივისტებმა, დღეს კი უკვე ხელისუფლების წარმომადგენლებმა, ჩვენს საწინააღმდეგოდ კარგად გამოიყენეს. ეს მარტო მე არ შემეხება, ვგულისხმობ მთელ "ნაციონალურ მოძრაობას". გამოდიოდნენ და ისე ხატავდნენ სურათს, თითქოს "ნაციონალები" ბავშვებს იტაცებდნენ და ახრჩობდნენ. ამ განწყობით მიიყვანეს ქვეყნის მოსახლეობა საარჩევნო ყუთებთან. ბუნებრივია, ისმის კითხვა, თუ ჩვენ ასეთი კაციჭამიები ვართ, რატომ არ გვიჭერენ?! თუ მხოლოდ და მხოლოდ საკუთარი პიარისთვის გამოიყენეს სხვისი უბედურება, თან როგორი უბედურება, - ეს ხომ რიგითი ტრაგედია არ არის, საქმე ეხება ცხრა თვის ბავშვს, მაშინ ეყოთ გამბედაობა და ესეც აღიარონ ხმამაღლა. ყველა ვხედავთ, წლების წინ მომხდარს როგორი ინტერესით იძიებენ, ხან ვის იჭერენ და ხან ვის, ეს ერთი საქმე რა გახდა?! მთელი წელიწადი შინაგან საქმეთა მინისტრისგან ვისმენდით, რომ საქმის გამოძიება მალე დასრულდებოდა, მაგრამ ჯერაც არაფერია გარკვეული. უკვე დაბეჯითებით შეიძლება ითქვას, რომ ბარბარე რაფალიანცის საქმე შეგნებულად არ იხსნება. არ უნდათ იმის ხმამაღლა თქმა, რომ ტრაგედია საარჩევნო ინტერესებისთვის გამოიყენეს. უკვე იმის თქმაც შეიძლება რომ ამ ხელისუფლების პირობებში ამ საქმეს, ალბათ ნათელი აღარც მოეფინება.
- არჩევნებიდან თითქმის ერთი თვე "ნაციონალურ მოძრაობას" კვლავაც ჰქონდა ძალაუფლება, რატომ ვერ მოხერხდა საქმის ცხელ კვალზე გახსნა?
- ასე დაბეჯითებით იმის თქმა, რომ ძალაუფლებას კიდევ ერთი თვე ვფლობდით და გამოძიება ჩვენს ხელთ იყო, არასწორია. საპარლამენტო არჩევნების შემდეგ, რომელიც ნამდვილად დემოკრატიულად ჩატარდა, ჩვენ ეს ძალაუფლება ახალ ხელისუფლებას გადავაბარეთ.
ნათია დოლიძე
ყოველკვირეული გაზეთი "ყველა სიახლე"
(გამოდის ოთხშაბათობით)
