27
მარტიდღის ზოგადი ასტროლოგიური პროგნოზი
საქართველოში მცხოვრებმა ნიგერიელებმა, კერძოდ, იბოს კუთხის შვილებმა, რომლებიც თავიანთ ტრადიციებს უდიდეს პატივს სცემენ, 29 სექტემბერს თბილიში ტრადიციული დღესასწაული, იამის მოსავლის აღება აღნიშნეს. იამი მათი საკულტო მცენარეა, რომელსაც თითოეული იბოელი ეთაყვანება. ის ხილი გახლავთ და მიწის ქვეშ იზრდება.
ამ ყველაფერს კიდევ ერთი ღონისძიება დაამთხვიეს, - რიჩარდ ოგბუნუჯუ, მათი კუთხის დიდგვაროვანი, რომელიც საქართველოში 20 წელია ცხოვრობს და ქართულ ენას კარგად ფლობს, მეფედ აკურთხეს!
რიჩარდი საქართველოში მცხოვრები იბოელების მეფე გახდა. როგორც მეფეს, ტიტულის მიხედვით, უხუცესთა საბჭომ მათი პატრონობა და მფარველობა დაავალა. რიჩარდთან ერთად, ქართველი ქალბატონიც, ხათუნა ხონელიძე ლოლოდ, ანუ დედოფლად აკურთხეს. მას გვირგვინი ნიგერიიდან სპეციალურად ამ დღისთვის ჩამოსულმა მეფემ დაადგა.
ხათუნა:
- ვღელავდი. საოცარი დღეა. როგორც რიჩარდმა ამიხსნა, ვიყო ლოლო, დიდ პასუხისმგებლობას ნიშნავს. საქართველოში უამრავი ნიგერიელი ცხოვრობს, რომლებსაც მაგალითად, ძალიან უნდათ ქართული ენის შესწავლა. მთხოვეს კიდეც, იქნებ დაგვეხმაროო და მეც შეძლებისდაგვარად უნდა დავეხმარო... ასევე უნდათ, რომ მათი ბავშვებიც აქ გაიზარდონ, ქართული ენა ისწავლონ. მათზე მეურვეობა როგორც რიჩარდს, მეც მეკისრება. ასე რომ, ეს მხოლოდ რიტუალი არ არის, რეალურად ახალი საქმიანობაა, რომელშიც უნდა ჩავერთო...
ვერონიკა (რიჩარდის შვილი):
- მინდა, ვთქვა, რომ მამაჩემს გაუმართლა, რადგანაც გვერდით საუკეთესო ქართველი ქალბატონი ჰყავს, რომელიც დღეს დედოფლად აკურთხეს. ძალიან მიყვარს ხათუნა. ხანდახან მავიწყდება, რომ ის ჩემი ბიოლოგიური დედა არ არის. ის მე და ჩემს ძმებს ყველაფერში გვეხმარება. ჩვენ წლების განმავლობაში უკრაინაში ვიზრდებოდით და ახლა საცხოვრებლად აქ გადმოვედით.
რიჩარდი:
- ხათუნა დღეიდან ჩემი დედოფალია! ლოლო საერთოდ, ქალ-მეფეს, იგივე მეფის მეუღლეს ნიშნავს, წესის თანახმად, ქალი-მეფე ძლიერი პიროვნება უნდა იყოს. სწორედ ამას ითვალისწინებს ეს ტიტული და მიმაჩნია, რომ ხათუნა არის ასეთი... ისე კი, ეს ყველაფერი ჩვენი ტრადიციების პატივისცემას ემსახურება. ადამიანმა არ უნდა დაივიწყოს საკუთარი წარმომავლობა, ფესვები და წინაპრები, მათ პატივი უნდა სცეს. საქართველოში უამრავი ახალგაზრდა ნიგერიელია ჩამოსული, ზოგი სწავლობს, ზოგი მუშაობს. დღევანდელი ღონისძიებით კი კიდევ ერთხელ შევახსენეთ ეს ყველაფერი. ამის შეხსენება მათ მეტად სჭირდებათ, რადგან ისინი თავისი ქვეყანისგან შორს ცხოვრობენ... მიხარია, რომ ჩემი მეფედ კურთხევა ისეთ ტრადიციულ ქვეყანაში მოხდა, როგორიც საქართველოა. მე მიყვარს საქართველო და ვამბობ, რომ ქართველი ვარ!
ლალი ფაცია
სპეციალურად "ამბები.გე"-სთვის
