21
მაისიდღის ზოგადი ასტროლოგიური პროგნოზი
"ბითლზების" ყოფილი წევრი პოლ მაკარტნი ახალ ალბომს უშვებს. ალბომის პრომოუშენის ფარგლებში პოლმა ბრიტანულ მუსიკალურ ჟურნალ Mojo-ს ინტერვიუ მისცა. ლეგენდარულმა მუსიკოსმა განაცხადა, რომ მის შემოქმედებაზე ყველაზე დიდი გავლენა პირადმა და ახლობელი ადამიანების ტრაგედიებმა იქონია.
"ძალიან კარგია, რომ ჩემი ცხოვრების ყველაზე ცუდ მომენტებში, მე შემეძლო სიმღერის დაწერა. ეს ჩემთვის საუკეთესო ფსიქოთერაპია იყო. სიმღერის შექმნის დროს ვხვდებოდი, რომ თანდათანობით მდგომარეობა მიმსუბუქდებოდა და ტკივილიც გადიოდა. ამგვარად, შენ საკუთარი თავიდან დემონებს დევნი", - განაცხადა მაკარტნიმ ჟურნალისტ პეტ ჯილბერტთან საუბრისას.
მაკარტნიმ გაიხსენა, რომ სიმღერა Little Willow ალბომიდან Flaming Pie მაშინ დაწერა, როდესაც "ბითლზის" წევრის, რინგო სტარის მეუღლე მორინი გარდაიცვალა. მაკარტნის ეს ყველაზე დამამშვიდებელ, ტანჯვის შემამსუბუქებელ სიმღერად მიაჩნია თავის შემოქმედებაში.
მომღერალმა ასევე აღიარა, რომ სინამდვილეში სიმღერაში Yesterday, ის დედამისზე მღეროდა. "სიტყვები "ის რატომ უნდა წასულიყო? არ ვიცი, და არც ის მეტყვის" - ზუსტად დედაჩემზეა", - აღნიშნა პოლმა. მაკარტნის დედა - მერი მაკარტნი, 14 წლის ასაკში გარდაეცვალა. მერი მაკარტნი მედდად მუშაობდა. ამასთან, ეს სიმღერა, ალბათ, ერთადერთია "ბითლზების" რეპერტუარში, რომელიც პოლმა ჯგუფის წევრების გარეშე, მარტომ ჩაწერა.
"ალბათ, ჩემი მტკიცე პიროვნული თვისებები მეხმარებოდა ყველა ტრაგედიის გადატანაში, რომელიც ჩემს ცხოვრებაში მომხდარა. ის ყოველთვის მაბრუნებდა საკუთარ ოჯახთან, ლივერპულში, ბავშვობის მოგონებებთან - მეხმარებოდა გამეგო, რომ, რაც არ უნდა ხდებოდეს დღეს, უნდა გადალახო ეს ყველაფერი და ეცადო, რომ კიდევ დადგეს იღბლიანი დღეები", - განაცხადა მაკარტნიმ ინტერვიუში.
პოლ მაკარტნის ახალი ალბომი New 14 ოქტომბერს გამოვა.
თემატურად, გთავაზობთ ჯგუფ the beatles -ის ბოლო ფოტოსესიას.
მომზადებულია mojo4music-ის მიხედვით.
