მნიშვნელოვანი ინფორმაცია
12
ივლისიდღის ზოგადი ასტროლოგიური პროგნოზი
შაბათი, მთვარის მეთვრამეტე დღე დაიწყება 23:22-ზე, მთვარე მერწყულშია – იმუშავეთ მშვიდად და საფუძვლიანად. მოაგვარეთ მარტივი ფინანსური საკითხები. გადადეთ მნიშვნელოვანი საქმეები. იყავით ყურადღებიანი იმის მიმართ, რაც ხდება და მოუსმინეთ რას გეუბნებათ ხალხი. იყავით ფხიზლად და მოერიდეთ კონფლიქტს. გამოიჩინეთ მოქნილობა და ორიგინალურობა ადამიანებთან ურთიერთობისას. სამსახურში გამოავლინეთ თქვენი საუკეთესო მხარე. ზედმეტი აქტიურობა შედეგს არ მოიტანს. არ აიღოთ ზედმეტი სამუშაო და რთული პროექტები. ხორცზე უარის თქმა ჯობია. გამოიყენეთ მცენარეული ზეთი. ალკოჰოლური სასმელები უნდა გამოირიცხოს.
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
სამ თვეში "გადავლილი" მერობის სურვილი...
23:41 / 26-09-2013
ქუთაისი კვლავ მერის გარეშეა დარჩენილი. ქალაქის ბოლო მერმა - ამერიკიდან დიდი იმედებითა და დაპირებებით ჩამოსულმა დიმიტრი კოპალიანმა თავისი ნებით დაწერა განცხადება გადადგომის შესახებ და ქალაქის საკრებულომ ისეთი ოპერატიულობით დააკმაყოფილა მისი მოთხოვნა, კიდევ უფრო გაღრმავდა ხალხში არსებული ეჭვი, რომ პროცესი პოლიტიკურად მართული იყო და თანამდებობის დატოვება ქალაქის რიგით მეთერთმეტე მერს, სულაც არ გადაუწყვეტია საკუთარი ნება-სურვილით. საკრებულოს "ნაციონალი" წევრები, როგორც წესი, ხელს "ქართული ოცნებისკენ" იშვერენ. "ქართული ოცნების" წევრები კი თვალში საცემი თვითკმაყოფილებითა და სიმშვიდით აცხადებენ, რომ დიმიტრი კოპალიანი თავისი ცოდნითა და გამოცდილებით განათლების სისტემაში დასაქმების შემთხვევაში უფრო გამოადგება ქვეყანას და დასძენენ, რომ მისთვის მეცნიერებისა და განათლების სამინისტროში მინისტრის ერთ-ერთი მოადგილის სავარძელია გამზადებული. თუმცა, ქუთაისსა და ქუთაისელებს ამ ეტაპზე ნაკლებად აინტერესებთ კოპალიანის მომავალი კარიერა და იმას დარდობენ, რომ ქალაქის ერთ ნორმალურად მომუშავე მერს ვერ იხსენებს მოსახლეობის დიდი ნაწილი და ბევრს ამ თანამდებობის არსებობის საჭიროებაშიც შეეპარა უკვე ეჭვი:
მიხეილ ბუაჩიძე, 69 წლის პენსიონერი:
- არც ერთი მერი არ მახსენდება, რომელსაც ქალაქისთვის რაიმე მნიშვნელოვანი გაეკეთებინოს. დანიშნავენ, აბურთავებენ თავის ჭკუაზე ყველა დროის ყვარყვარეები და მერე უსარგებლო ნივთივით თავიდან იშორებენ. ისე, ამ თანამდებობაზე თუ ვინმეს რამე გაუკეთებია, მიუხედავად იმისა, რომ ყველაზე რთულ პერიოდში მოუწია მერობამ, თეიმურაზ შაშიაშვილი იყო...
ბატონი მიხეილის ნათქვამიდან გამომდინარე, სურვილი გამიჩნდა, ქუთაისელებისთვის ქალაქის იმ ათი მერის გახსენება მეთხოვა, კოპალიანამდე რომ იკისრეს ქალაქის მეთაურის მოვალეობის შესრულება.
ალექსანდრე მიხელიძე, 71 წლის პენსიონერი:
- ამ წუთში ბადრი მელქაძე მახსენდება და ისიც მხოლოდ იმიტომ, რომ ჩემი მეზობელი იყო... რაიმე მნიშვნელოვანი გააკეთა თუ არა ქალაქისთვის, ვერ გეტყვით, ვერაფერს ვიხსენებ... თუ არ ვცდები, ბადრი მელქაძემ თეიმურაზ შაშიაშვილი ჩაანაცვლა, რომელიც გუბერნატორად დაინიშნა და ქალაქში, არა მგონია, ახლა ვინმეს ახსოვდეს მისი ნაღვაწი...
ქუთაისის პირველი არჩეული მერი კი ნუგზარ ფალიანი იყო, რომელსაც ქალაქთან დაკავშირებით დიდი გეგმები კი ჰქონდა, მაგრამ "ვარდების რევოლუციით" მოსულმა მთავრობამ რატომღაც უპირობოდ მოინდომა მისი გაშვება და აქციებს აქციებზე უწყობდნენ სწორედ ის "ახალგაზრდა რევოლუციონერები", ბოლომდე რომ "ნაციონალების" ერთგულები დარჩნენ და დღემდე ინარჩუნებენ თანამდებობებს ქალაქის მერიასა თუ საკრებულოში. ფალიანი სისხლიან დაპირისპირებას მოერიდა და წავიდა. როგორც ამბობენ, ჭკვიანი იყო და კარგად იცოდა, რაზეც იყო წამსვლელი "ნაციონალური მოძრაობა", მისი გაჯიუტების შემთხვევაში...
ნელი ქემერტელაძე, 44 წლის დიასახლისი:
- გიგა ჩოგოვაძე მახსენდება. ისიც მხოლოდ იმიტომ, რომ აბრალებდნენ: მისი კაბინეტიდან ნარკოტიკის სუნი გამოდიოდა, რადგან წამალს პირდაპირ მერიის შენობაში ხარშავდნენ ახალგაზრდა ჩინოვნიკებიო...
მართალია თუ არა ქალბატონი ნელის ნათქვამი, ვერაფერს გეტყვით, მაგრამ მსგავსი ჭორი რომ დადიოდა ქალაქში, მეც მახსოვს. უფრო კარგად კი ქალაქის კიდევ ერთი "სამთვიანი მერი" მახსოვს, - ბატონი ბესო გულორდავა, რომელიც ამ თანამდებობაზე დანიშვნამდე გაზეთ "ალიას" კორესპონდენტი იყო და როგორც კოლეგას, ბუნებრივია, ყველაზე უკეთ ვიცნობდი. დღემდე ვერ გამიგია, რატომ დათანხმდა თანამდებობას, რომელიც აშკარად არ იყო მისი საქმე. ცოტა ხანში კი ქალაქის ერთ-ერთ ბაზრობაზე დავინახე დახლთან მდგომი და სულაც არ გამკვირვებია: ოჯახი ჰქონდა და უნდა ერჩინა. იმედია, ბიზნესში უფრო გაუმართლებდა...
თავისი ნებით გადადგა თანამდებობიდან ბატონი ნუგზარ შამუგიაც და არავინ იცის, მართლა დასახელებული მიზეზი იყო თუ არა, ამ გადაწყვეტილებამდე მისვლა, მაგრამ იმხანად მისი არასრულწლოვანი ვაჟი - პაპუნა შამუგია დააკავეს ქურდულ სამყაროსთან კავშირის გამო და უთქვამს: ჩემი შვილის პატრონს მორალური უფლება არ მაქვს, ქალაქის პირველი პირი მერქვასო. მორალურად მართლაც კაცურად მოიქცა ალბათ, ბევრი მისი კოლეგისგან განსხვავებით, მკვლელი შვილების გამართლებასაც კი რომ ურცხვად ცდილობენ, მაგრამ გაღებული მსხვერპლი ვერ აღმოჩნდა საკმარისი იმისთვის, რომ შვილი სწორ გზაზე დაეყენებინა: ცოტა ხნის წინ პაპუნა შამუგიამ ეზოში დომინოს თამაშისას სასიკვდილოდ გაიმეტა თავისი თანატოლი, ლუკა კუბლაშვილი და როგორც ქუთაისელები ამბობენ, ნუგზარ შამუგიასა და მის ოჯახს ამჯერად მეზობლების მოთხოვნით, ქალაქის დატოვებაც კი მოუწევთ, ზემოთ ხსენებული ტრაგედიის გამო...
ქალაქის ბოლო მერი კი "ნაციონალური მოძრაობის" ერთგული წევრი და დღემდე მყარი დასაყრდენი - გიორგი თევდორაძე იყო, რომელსაც ბოლო მოწვევის პარლამენტის წევრობა ერგო ჯილდოდ და ახალი თანამდებობიდან ცდილობს საყვარელი პარტიის რეანიმირებას...
სწორედ გიორგი თევდორაძე ჩაანაცვლა დიმიტრი კოპალიანმა და... სამწუხაროდ, მანაც ვერაფერი გააკეთა ისეთი, რომ დიდხანს დარჩეს ქუთაისელების მახსოვრობაში. ახალ მერს მხოლოდ საპრეზიდენტო არჩევნების შემდეგ დანიშნავენ, მანამდე კი საკრებულოს გადაწყვეტილებით, ქუთაისს მერის მოვალეობის დროებით შემსრულებელი ეყოლება: ოთხი ვიცე-მერიდან ერთ-ერთი და სიმართლე გითხრათ, აღარც აქვს ალბათ მნიშვნელობა - რომელი...
ოცდაათამდე ქუთაისელს ვთხოვე, ერთსა და იმავე კითხვაზე პასუხის გაცემა: აქვს თუ არა მათთვის მნიშვნელობა, ვინ იქნება მათი მშობლიური ქალაქის მერი და სამწუხაროდ, 23-მა მიპასუხა, რომ პირადად მისთვის არანაირი მნიშვნელობა არა აქვს. ოთხმა: ოღონდ "ნაციონალები" - არაო! ერთმა: ამერიკიდან კი ნუ ჩამოიყვანთ ისეთ ვინმეს, რომელიც ღრუბლებში დაფრინავს და აზრზე არაა, ხალხს რამდენი რამე სტკივა და აწუხებსო. პირადად მე, შუახნის ქალბატონის ნათქვამი უფრო მენიშნა, რომელმაც ვინაობის გამხელა არ ისურვა: აღარც ქალაქის მერი მაინტერესებს და აღარც მომავალი პრეზიდენტის ვინაობა. თავი შემაძულეს ქართველმა პოლიტიკოსებმა, რომლებსაც თანამდებობებზე მოხვედრის შემდეგ ხალხის არსებობა აშკარად აღიზიანებთ და ვერ გვიტანენ... სულ რომ გაუქმდეს მერის თანამდებობა და ამდენი მუქთახორა არ ვარჩინოთ, არ შეიძლება?!
ამ კითხვაზე მე ვერ გავცემ პასუხს, მაგრამ ვიღაცამ ხომ უნდა გასცეს ბოლოს და ბოლოს, პასუხი ხალხს...
ინგა ჯაყელი
(გამოდის ხუთშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
საბავშვო ბაღში გარდაცვლილი 2 წლის დაჩის დედის პირველი კომენტარი - "ჩემზეც ბევრი ბრალდებები წამოვიდა"
კვირის კითხვადი სტატიები
მნიშვნელოვანი ინფორმაცია
მკითხველის რჩევით
