ცოტა ხნის წინ "კომედი გრუპის" ხელმძღვანელობით "რუსთავი 2-ზე" ახალი იუმორისტული გადაცემა დაიწყო - "გააცინე და მოიგე". გადაცემაში მონაწილეობა ყველას შეუძლია, ასაკიც შეუზღუდავია. ის, ვინც ჟიურის გაცინებას მოახერხებს, ჯილდოვდება ფულადი პრიზით, რომლის მაქსიმალური რაოდენობა ათასი ლარია. ჟიურის ძირითადი წევრი მსახიობი ნიკა არაბიძეა, დანარჩენები კი იცვლებიან. მონაწილეები ძირითადად ერთსა და იმავე თემებზე "ხუმრობენ". რატომღაც მიაჩნიათ, რომ "სექსუალურ ამბებსა" და გინებაზე ჟიურის გაეცინება. ვესაუბრებით ჟიურის ძირითად წევრს ნიკა არაბიძეს:
- კმაყოფილი ხართ იმ იუმორით, რასაც წარმოადგენენ კონკურსანტები?
- ზოგი მომწონს და ზოგი არა, მაგრამ მინდა უკეთესი ნომრები ვნახო. ზაფხულობით მიწევს ურთიერთობა ისეთ ხალხთან, ვისაც ძალიან კარგი იუმორი აქვს, ამიტომ ვისურვებდი, ასეთები მოხვდნენ ჩვენს პროექტში. 4 წუთში ძნელია იმის დადგენა, ვინ გამოგვადგება ჩვენი გუნდისთვის და ვინ არა, მაგრამ იყვნენ კონკურსანტები, რომლებსაც კარგი ნომრები ჰქონდათ წარმოდგენილი. პროექტი მრავალფეროვანია, ასაკი არაა შეზღუდული, 55 წლის მამაკაციც მონაწილეობდა და 1.000 ლარიც მოიგო. არის შემთხვევები, როცა დრო რჩებათ, ხუმრობა აღარ აქვთ და სწორედ ამ დროს კარგავენ მოგებულ თანხას. ვერ ხვდებიან, სად უნდა გაჩერდნენ. ვერავინ იტყვის, რომ დავჩაგრე. ასი ლარის გამო გაცინებისგან თავს არ შევიკავებ.
- ყველა სექსსა და გინებაზე რატომ ხუმრობს?
- ყველას ჰგონია, უწმაწურ სიტყვებზე ვიღაცას გაეცინება. იუმორისთვის სავალდებულო არ არის უხამსი თემები. ზოგჯერ ესეც შეიძლება, მაგრამ ხალხს ვურჩევ, არ წარმოადგინონ ისეთი ანეკდოტები და ხუმრობები, რომლებშიც მაინცდამაინც უწმაწური სიტყვები და თემებია. იმ ადამიანს, ვინც 1.000 ლარი მოიგო, საერთოდ არ უხსენებია უწმაწური სიტყვა, ის თან თამაშობდა იმას, რასაც წარმოადგენდა. სწორედ ეს არის სასაცილო.
ფსიქოლოგი ჟანა ჯავახიშვილი მიიჩნევს, რომ 90-იანი წლების მოვლენების გამო ქართულმა საზოგადოებამ იუმორის გრძნობა დაკარგა და ამის მაგალითია ის იუმორისტული ნომრები, რასაც ტელეეთერით გვიჩვენებენ. ვანო ჯავახიშვილის იუმორი მას შუა საუკუნეების პერფორმანსებს აგონებს, სადაც მსახიობები დიდგვაროვნებისთვის საცირკო წარმოდგენებზე ხუმრობდნენ და ამით ეუბნებოდნენ სათქმელს.
რამდენიმე წლის წინ ჩატარდა სოციოლოგიური გამოკვლევა, რომლითაც დადგინდა, რომ ვანო ჯავახიშვილის და მიშა ანდღულაძის პერსონაჟები (ნანული და გურამი) ყველაზე მეტად მოსწონდა ახალგაზრდა თაობას. ამან შეგვაშფოთა. ის იუმორი, რასაც დღეს ჩვენ ვიღებთ ტელეეთერიდან, სპეციალურად არის გათვლილი იმაზე, რომ მაყურებელმა არ იაზროვნოს. იუმორი ინტელექტის ნიშანია და ამაზე უამრავი ნაშრომია შექმნილი. რაც შეეხება "გააცინე და მოიგეს" კონკურსანტებს, რატომ ხუმრობენ ისინი სექსსა და უწმაწურ თემებზე... ეს შესაძლებელია არარეალიზებული სექსუალური შესაძლებლობების გამო ხდებოდეს, მაგრამ არავის გამოუკვლევია რეალურად, აკლიათ თუ არა სექსი ქართველებს. სექსი ისეთი ტაბუდადებული თემაა, რომ ქართველი მამაკაცი მასზე საუბარს შეურაცხყოფად აღიქვამს და, შესაძლოა, ამითაც იყოს გამოწვეული ამ თემაზე ხუმრობა. კახური სოფლის იუმორიც სწორედ უწმაწურ თემებზეა გათვლილი. ამ ბოლო დროს უფრო მეტი სტიგმა გამოჩნდა ასეთ საკითხებში. ხალხი კი იმაზე ხუმრობს, რაზეც საჯაროდ კრიტიკული ლაპარაკი აკრძალულია და ამიტომ ფიქრობენ, რომ ვიღაცას გაეცინება. სამწუხაროდ, ქართული იუმორი საცირკო იუმორის დონეზე დავიდა, ასევეა რუსული იუმორის დონეც. ეტყობა, 90-იან წლებში ისეთ ცუდ პირობებში აღმოვჩნდით, რომ იუმორის გრძნობა დავკარგეთ, როცა ეს იკარგება, სენტიმენტალიზმში, ნარცისიზმში ვარდები და საკუთარი თავის კრიტიკის უნარს კარგავ. შეიძლება ეს იმიტომ მოხდა, რომ მსხვერპლის როლში "შევიჭერით". თვითიუმორი დავკარგეთ, რაც დიდი პრობლემაა ერისთვის.
თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
