22
მაისიდღის ზოგადი ასტროლოგიური პროგნოზი
ძირეული ცვლილებები, რომლებიც მთლიანად შეცვლის სახელმწიფო უნივერსიტეტებში არსებულ ვითარებას! - კანონი უმაღლესი განათლების შესახებ რადიკალურად იცვლება. როგორც "რეზონანსისთვის" გახდა ცნობილი, მასზე მუშაობა უკვე რამდენიმე თვეა მიმდინარეობს და მალე დასრულდება.
სახელმწიფო უმაღლესმა სასწავლებლებმა საჯარო სამართლის იურიდიული პირის სტატუსი უკვე მიიღეს. ამას უნდა მოჰყოლოდა რექტორების შეცვლა, აკადემიური საბჭოს ხელახალი დაკომპლექტება, დეკანების თავიდან არჩევა, გაერთიანებული ფაკულტეტების ისევ დაშლა და ა.შ. თუმცა, მთავრობის დადგენილებით, მოქმედი რექტორები, დეკანები და ყველა არჩეული პირი თანამდებობაზე ვადის გასვლამდე დარჩა.
"როგორც დოკუმენტებიდან ჩანს, ყველა ძირითადი უნივერსიტეტი, რომლებსაც ჰქონდათ არაკომერციული იურიდიული პირის (ააიპ) სტატუსი, გადაკეთდა საჯარო სამართლის იურიდიულ პირად (სსიპ)," - აცხადებს "რეზონანსთან" საუბრისას აკადემიკოსი ავთანდილ სილაგაძე. " - ამას, მოგეხსენებათ, დიდი დისკუსიები უძღოდა წინ. იყო საუბარი იმაზე, რომ სსიპ-ებად გადაკეთების შემთხვევაში ყველა უმაღლესი სასწავლებლის რექტორი უნდა შეცვლილიყო. მაგრამ, რეალურად არ მოხდა. ბოლოს მიღებულმა დებულებამ და ნორმატიულმა აქტებმა მათ შეუნარჩუნა ის ვადები, რომელი ვადებითაც იყვნენ არჩეული. მაგრამ ეს არ ეხება ადმინისტრაციული თანამდებობის პირებს. ამჟამად განსაზღვრულია ასე, რომ ისინი, ვისაც კონკურსის წესით უკავიათ თანამდებობა, იმ ვადით დარჩებიან უნივერსიტეტში, რა ვადითაც არიან არჩეულნი. ანუ სსიპ-ებად გადაკეთებას ავტომატურად რეორგანიზაცია არ მოჰყოლია."
სილაგაძის თქმით, "კანონში უმაღლესი განათლების შესახებ" ახალი ცვლილებებია, რომლებიც ძალაში 20 სექტემბრიდან შევიდა.
"ეს თავის მხრივ ითვალისწინებს გარკვეულ ცვლილებებს უნივერსიტეტებში. ასე მაგალითად, რაზეც იყო დისკუსიები: თუ ადამიანს სამეცნიერო ხარისხი არ აქვს, ის არ შეიძლება იყოს რექტორი. ამ ცვლილებამ განაპირობა ის, რომ თუ დეკანი აკადემიურ თანამდებობას არ იკავებს, უნდა გადადგეს, 30 დღის განმავლობაში უნდა დატოვოს თანამდებობა. გარდა ამისა, კიდევ ერთი ცვლილებაა, რომელიც უკვე ამუშავდა: ასისტენტ-პროფესორის თანამდებობას ვერ დაიკავებს დოქტორის აკადემიური ხარისხის ან მასთან გათანაბრებული პირის გარდა ვერავინ; ასევე - პროფესორთა შემადგენლობის სათავეში იყო სრული პროფესორი, ახლა არის პროფესორი. ტერმინი "სრული" მოაცილეს; კიდევ შემოიღეს ასისტენტის დამატებითი პედაგოგიური თანამდებობა. ეს ადგილი შეუძლიათ დაიკავონ აკადემიური ხარისხის არმქონე პირებმა".
სილაგაძე ხაზგასმით აღნიშნავს, რომ უფრო ძირფესვიანი ცვლილებები მზადდება.
"შესაძლებელია საერთოდ უმაღლესი განათლების შესახებ ახალი კანონი შემუშავდეს. იმედია, მომავალში უფრო საფუძვლიან ცვლილებებს გამოიწვევს. მე რამდენადაც ვიცი, ეს პროცესი დიდი ხანი არ გაგრძელდება. ძირეული ცვლილებების გარეშე ახალი მოთხოვნები არ იქნება შესრულებული. სამწუხაროდ დღეს მიღებულმა კანონმდებლობამ ეს ვერ უზრუნველყო. იმ კანონპროექტით, რომელიც ახლა სამინისტროში არსებული სპეციალური ჯგუფის მიერ მზადდება, იმედი მაქვს, რაც არ გაკეთდა, ის გაკეთდება. ცვლილებები კი აუცილებლად უნდა მოხდეს. ცვლილებების გარეშე თანამედროვე საგანმანათლებლო სტანდარტების მოთხოვნის შესრულება ძალიან გართულდება".
(შემოკლებული ვერსია)
მარი ოთარაშვილი
