ლევან პირველი "მრეწველთა პარტიაში" ახალგაზრდული ფრთის შექმნას გეგმავს

ავსტრიიდან საქართველოში დაბრუნებული ბიზნესმენი ლევან პირველი პარტია "მრეწველებში" ახალგაზრდული ფრთის შექმნას გეგმავს.

როგორც ლევან პირველმა დღეს გამართულ პრესკონფერენციაზე განაცხადა, იგი პოლიტიკურ საქმიანობას კვლავაც პარტია "მრეწველებში" განაგრძობს და გრძელვადიან პოლიტიკურ პერიოდზე გათვლილ ახალგაზრდულ ფრთას შექმნის.

"მრეწველთა" პარტიის წევრები იყვნენ ავსტრიაში ჩამოსულები, იქ გვქონდა თათბირი და გადაწყდა ჩემი დაბრუნება. სახლში დაბრუნება კიდევ დაკავშირებულია პოლიტიკასთანაც, რომელშიც მე, პრაქტიკულად, ყოველთვის ვიყავი და არსად წავსულვარ. ქვეყნის გარეთ კიდევ უფრო მეტად ფეთქავდა ქართული პოლიტიკური ცხოვრება. მოვა დრო და ბევრი რამ გამოაშკარავდება რა რა ხდებოდა ქვეყნის გარეთ. "მრეწველებში" ვიყავი, ვრჩები და ვაგრძელებ ჩემს პოლიტიკურ საქმიანობას, უნდა შევქმნა ძლიერი ახალგაზდრული ფრთა გათვლილი მომავალ პოლიტიკაზე", - განაცხადა ლევან პირველმა.

მისივე თქმით, კოალიცია "ქართულ ოცნებაში" არიან პარტიები, რომელთანაც იგი ყოველთვის ოპონირებაში იყო და ეს ოპონირება არ დამთავრებულა, თუმცა ლევან პირველის შეფასებით, ყველაფერი დაღვინდება და კოალიციასაც უფრო კონკრეტული პოლიტიკური ფერი და იერი ექნება. მისივე განცხადებით, იგი საპრეზიდენტო არჩევნებზე კოალიციის კანდიდატს დაუჭერს მხარს.

ლევან პირველმა მისი პარტიის ხედვაზეც გაამახვილა ყურადღება ნატოსთან დაკავშირებით და აღნიშნა, რომ ნატოში გაწევრიანება არ არის ერთადერთი სწორი გზა ქვეყნისთვის და ავსტრიის მაგალითზე ისაუბრა.

ლევან პირველი იუსტიციის მინისტრ თეა წულუკიანის მიერ გაკეთებულ განცხადებასაც გამოეხმაურა და აღნიშნა, რომ თეა წულუკიანმა მისი საქმის შესწავლის შესახებ ისაუბრა.

"ჩემთვის პარადოქსია, ქვეყნის პირველმა იურისტმა ჯერ უნდა შეისწავლოს საქმე და მერე გააკეთოს განცხადება, მაგრამ ეს გაუგებრობა აღარ არსებობს. როგორც ჩანს, იუსტიციის სამინისტრო ყველაფერში გაერკვა. მე გამომიგზავნეს ქართული პასპორტი, რომელიც არის იუსტიციის სამინისტროს მიერ დამზადებული და ახლავს იუსტიციის სამინისტროს წერილი, ე.ი. გაუგებრობა აღარ არის", - განაცხადა ლევან პირველმა და აღნიშნა, რომ პოლიტპატიმართა სიიდან პარლამენტს თავი თვითონ ამოაღებინა, რადგან მისი თქმით, ამ სტატუსს დამტკიცება არ სჭირდება.

"ევროკავშირმა მომანიჭა პოლიტიკური დევნილის სტატუსი, მე არ მინდოდა იმის მონიჭება, რაც მონიჭებული მაქვს", - განაცხადა ლევან პირველმა.

ჟუნალისტებმა ლევან პირველს რესტორან "თამარიონში" ნიკა უჩანეიშვილის მკვლელობის საქმის შესახებაც დაუსვეს კითხვები, რაზეც ბიზნესმენმა უპასუხა, რომ იგი აღნიშნულ მკვლელობასთან კავშირში არ არის და ეჭვმიტანილი არასდროს ყოფილა.

"ეს შავი პიარისა და დემაგოგიის კლასიკური მაგალითია", - განმარტა ლევან პირველმა.

მისი თქმით, შავი პიარი ააგორა მიხეილ სააკაშვილის გუნდმა, რომელიც იყო სექტა "მოქალაქეთა კავშირში". როგორც ლევან პირველმა აღნიშნა, მას შეტანილი აქვს ცილისწამების გამო სარჩელი კომპანია "ჯორჯიან ონლაინის" წინააღმდეგ და გამზადებული არის სარჩელი ცილისწამებისთვის მიხეილ სააკაშვილის წინააღდეგ. ბიზნესმენმა ნიკა უჩანეიშვილის საქმესთან დაკავშირებულ დეტალებზე არ ისაუბრა და აღნიშნა, რომ აღნიშნულ საქმეზე გამართლებული მისი დაცვის წევრის ოჯახში გუშინ იმყოფებოდა.

ლევან პირველმა საქართველოდან მისი წასვლის მიზეზებზეც ისაუბრა და აღნიშნა, რომ ქვეყანა რევოლუციიდან მეორე დღეს, 2003 წლის 24 ნოემბერს დატოვა.

"მე დაუძინებელი მტერი ვიყავი ამ ჯგუფის, ბანდის, რა თქმა უნდა, ვიცოდი, ვისაც ვეომებოდი, რა ტყუილებს, დემაგოგიას, ხრიკებს და ილეთებსაც იყენებდა ეს ხალხი, ჩემთვის ნათელი იყო. ჩემთვის აშკარა საშიშროება იყო ერთი დღეც კი დარჩენა მათ ხელში", - განაცხადა ლევან პირველმა და აღნიშნა, რომ მას აუცილებლად დააპატიმრებდნენ.

გარდა ამისა, როგორც დღეს გამართულ პრესკონფერენციაზე ბიზნესმენმა აღნიშნა, ვენაში ყოფნის დროს მას ჰქონდა შეხვედრები "გაქცეულ ბადრი ბიწაძესთან". მისივე თქმით, საქართველოში არანაირი ბიზნესი არ გააჩნია და ამ ეტაპზე, უმსხვილესი გერმანული ენერგოკომპანიის ბორდის წევრი და ნაწილობრივ მფლობელია. ლევან პირველს აღნიშნული ენერგოკომპანიის სახელი ჟურნალისტებთან არ დაუკონკრეტებია.

"ინტერპრესნიუსი"