ანი მიროტაძე - "როცა გავაცილებ მიხეილ სააკაშვილს, ამით ავიხდენ ჩემს 10 წლის ოცნებას და შემდეგ ქორწილს გადავიხდი "

ყოფილი ჟურნალისტი ანი მიროტაძე საპარლამენტო უმრავლესობის ერთადერთი გასათხოვარი დეპუტატია. ამბობს, რომ მისი გული დაკავებულია და საპრეზიდენტო არჩევნების დასრულების შემდეგ გათხოვდება. ჯერჯერობით შეყვარებულის ვინაობას არ ამხელს. ახალბედა დეპუტატი აქტიურად არის ჩართული საკანონმდებლო საქმიანობაში. აცხადებს, რომ მაქსიმუმს გააკეთებს, ქართველი ხალხის ნდობის გასამართლებლად.

- დიდხანს ვიმუშავე ჟურნალისტად და ამ პერიოდით ძალიან ვამაყობ. მესამე კურსის სტუდენტმა დავიწყე მუშაობა. ჩემი ოჯახისთვის ჩემი არჩევანი მოულოდნელი იყო. უფროსი შვილი ვარ. იმ პერიოდში ყველაზე პრესტიჟული ექიმობა იყო და ჩემებსაც უნდოდათ, სამედიცინო განათლება მიმეღო, მაგრამ უარი ვთქვი. ბაბუა გამინაწყენდა. ვიცი, ჩემგან არასოდეს დადგებოდა ექიმი. დღემდე მიმაჩნია, რომ ჟურნალისტიკაა ჩემი საქმე და საკუთარი თავის რეალიზება მოვახდინე. ჩვენი თაობა მძიმე პერიოდში დაუღალავად, მთელი ენთუზიაზმით აკეთებდა ახალ ჟურნალისტიკას. პატარა ასაკში ვისწავლე, როგორ გავმკლავებოდი პრობლემებს. ოჯახში პურის ფული მე არ მქონდა შესატანი, მაგრამ პროფესიაში თვითდამკვიდრებისთვის ბრძოლა ადვილი არ იყო. საკუთარი თავით ყოველთვის უკმაყოფილო ვარ. ეს არ ნიშნავს, რომ რაიმე არასწორს ჩავდივარ. "ვარდების რევოლუციას" თავიდანვე ისე ვაფასებდი, როგორც ახლა აფასებენ. იმ პოლიტიკური გუნდის მოწინააღმდეგე ვიყავი. მაშინ პირველ არხზე ვმუშაობდი. დავწერე განცხადება და ჩემი სურვილით წამოვედი ტელევიზიიდან. რიგითი მაყურებლის პოზიციიდან მინდოდა დამენახა, ხომ არ ვცდებოდი, ჩემი შეხედულება ხომ არ იყო არასწორი. როცა ხედავ, ქვეყნის მოსახლეობის დიდი უმრავლესობა მხარს უჭერს ამ ცვლილებას, ბუნებრივია, ფიქრობ, შენ ხომ არ ცდები შეფასების დროს. სამწუხაროდ, არ ვცდებოდი... ორი წელი ჟურნალისტიკაში პაუზა მქონდა.

-  შემდეგ სააგენტო "პირველი" შექმენი, ხომ?

-  202-ში ძალიან ცოტა ხანი პროდიუსერად ვიმუშავე. მივხვდი, იქ რაღაც არ გამოდიოდა. 10-დღიანი შვებულება ავიღე და მაშინ დავიწყე ფიქრი სააგენტოს შექმნაზე. გავრისკე, დაახლოებით 2 კვირაში მოვაგროვე საჭირო დოკუმენტები და გადავწყვიტე, სააგენტოს მუშაობა 15 ნოემბერს დაეწყო, მაგრამ 10 ნოემბერს, საღამოს, ჩემმა წყარომ მაცნობა, რომ ყველაზე გავლენიანი მინისტრი, ირაკლი ოქრუაშვილი თანამდებობიდან გადადგა. ამიტომ უფრო ადრე მომიხდა მედიასივრცეში ხმაურიანი ინფორმაციით შეჭრა. სააგენტოს სახელზეც ბევრი ვიფიქრე. როცა სააგენტოს არქმევ "პირველს", შეიძლება ვინმემ დაგცინოს, მაგრამ ამისთვისაც მზად ვიყავი. სააგენტომ ექსკლუზივებით დაიწყო მუშაობა და ჩაჯდა "პირველი" ძალიან მალე ამ სივრცეში. თუმცა, მქონდა სასამართლო დავებიც. მაშინ არსებობდა ჟურნალი "პირველი" და სიგარეტი "პირველი", მათთან ორწლიანი სასამართლო დავა მქონდა სახელის გამო. საკუთარ თავზე მაქვს გამოცდილი, როგორი სასამართლო სისტემა ჰქონდა მიხეილ სააკაშვილს. დირექტივა იყო, რომ წამეგო პროცესი, მაგრამ ბოლომდე ვიბრძოლე გამარჯვებისთვის.

-  რატომ გადაწყვიტე პოლიტიკაში წასვლა?

-  იმ პერიოდში "პირველს" უნდა დამატებოდა კიდევ ერთი სეგმენტი. მინდოდა, რადიო გამეკეთებინა და ამ მიმართულებით ვმუშაობდი. მაშინ მივიღე შემოთავაზებაsalesland.ge - ფასდაკლებების სამყარო! კახა შარტავასა და გუბაზ სანიკიძისგან. პარტიის გაძლიერება უნდოდათ და მიაჩნდათ, რომ კარგი კანდიდატურა ვიქნებოდი. ამას წინ უძღოდა სხვა პოლიტიკური ოპოზიციური პარტიებიდან შემოთავაზებაsalesland.ge - ფასდაკლებების სამყარო!, მაგრამ მათ უარი ვუთხარი. იმის მიუხედავად, რომ ვიყავი მიხეილ სააკაშვილის აქტიური მოწინააღმდეგე, ღიად არავინ მებრძოდა. უბრალოდ, არ მაძლევდნენ გაძლიერების საშუალებას.

-  კახა შარტავას შემოთავაზებას რატომ დათანხმდი?

-  როგორც პოლიტიკოსს, კახა შარტავას დიდ პატივს ვცემდი. 11 წელი ოჯახებით გვქონდა ურთიერთობა. ბევრჯერ გვისაუბრია, გვიკამათია ქვეყნის მოწყობაზე. ვიცოდი, უცხო ხალხში არ მივდიოდი. თავიდან დავთანხმდი ერთი პირობით: ვთხოვე, ცოტა ხანს ისე ვივლიდი პარტიაში, რომ ეს საიდუმლოდ დაეტოვებინათ. მეშინოდა, იქნებ არ გამომსვლოდა... დაახლოებით ორი თვე ვიარე ასე, მაგრამ საქართველო პატარა ქვეყანაა, ინფორმაცია გახმაურდა და მერე დავთანხმდი მათ წინადადებას. როცა პოლიტიკაში მიდიხარ, უნდა იცოდე, რომ ეს ძალიან დიდი პასუხისმგებლობაა საზოგადოების წინაშე. გაცნობიერებული ნაბიჯი გადავდგი. გამიმართლა, რომ ჩემ გვერდით გუბაზ სანიკიძე, რეზო შავიშვილი და კახა შარტავა იყვნენ. რჩევებს მათგან ხშირად ვიღებ. ახლაც, როცა მჭირდება კონსულტაცია, რა თქმა უნდა, მათ ვეკითხები. თუ პოლიტიკური თამაში არ იცი, აუცილებლად დაიღუპები.

-  დეპუტატობას ელოდი?

-  ყველამ ვიცოდით, რომ კოალიციაში სიები შეიქმნებოდა. ჩემი ყველაზე დიდი ოცნება ნაციონალური მოძრაობის დამარცხება იყო. გამარჯვება არჩევნებით მოვიპოვეთ. ტყუილი იქნება რომ ვთქვა, არ მინდოდა დეპუტატობა-მეთქი. რა თქმა უნდა, მინდოდა. თუმცა, თუ ასე არ მოხდებოდა, ეს ჩემთვის ტრაგედია არ იქნებოდა. პარლამენტის გარეთაც ბევრი საქმეა საკეთებელი და იმას გავაკეთებდი.

-  გავრცელდა ინფორმაცია, რომ კახა შარტავამ თავისი ადგილი დაგითმო. ეს მართალია?

-  ტყუილია. ვიღაცამ ვიღაცას დაუთმოს ადგილი, ასე არ ხდება პოლიტიკაში. სიაში მესამე ვიყავი... ორ კომიტეტში ვმუშაობ. ძალიან გამიმართლა, რომ ვარ საგარეო საქმეთა ურთიერთობის კომიტეტში, ბატონ თედო ჯაფარიძესთან. მისი საუბარი ყოველთვის საინტერესოა, უფასო გაკვეთილები მაქვს პარლამენტში. ასევე ვარ იურიდიულ კომიტეტში.

-  როგორია შენი ერთი დღე?

-  10 საათზე პარლამენტში ვარ. იურიდიული კომიტეტი ერთადერთია, რომელიც 10 საათზე იწყებს მუშაობას. ყველა ახალი კანონპროექტი, ახალი ცვლილება ჩვენთან შემოდის და სამუშაო ბევრია. სესიები საღამოს 9 საათზე ადრე არ მთავრდება, შუალედებში გვაქვს შეხვედრები. მერე გვიან ვბრუნდები ჩემს ნაქირავებ ბინაში. ყოველთვის ვიცლი საკუთარი თავისთვის. ქალმა საზოგადოებას უნდა სცეს პატივი, ვიზუალური მხარეც ყოველთვის მოწესრიგებული უნდა ჰქონდეს, მაგრამ ეს არ ნიშნავს, რომ ვიღაცას ეპრანჭები.

-  ალბათ ბევრი ჭორი გსმენია შენზე. როგორ რეაგირებ?

-  ბევრი მსმენია. როცა ჟურნალისტი ვიყავი, ასეთ ჭორებზე საშინლად ვრეაგირებდი. ძალიან მაღიზიანებდა. აუცილებლად იწყებდნენ ჩემ გვერდით ვიღაც კაცის ძიებას. ბევრჯერ ისეთ ადამიანებთან მაკავშირებდნენ, რომლებსაც საერთოდ არ ვიცნობდი. თითქოს მათი შეყვარებული ვიყავი. ზოგის საცოლედ მასაღებდნენ, ზოგის - საყვარლად. ამ უაზრო ჭორების გამო ძალიან ბევრჯერ მიტირია. ბუნებრივია, არ გინდა პირადი ცხოვრება დაგენგრეს ჭორების გამო. ვიღაცას ჰგონია, რომ შენი წარმატება აუცილებლად ვიღაცასთან არის დაკავშირებული.

-  როგორც ჩანს, შეყვარებული იყავი და გეშინოდა ამ ჭორების გამო ურთიერთობის დანგრევის. შეყვარებული როგორ რეაგირებდა ამაზე?

-  თვალებდასივებული, ნამტირალევი რომ მივიდოდი პაემანზე, მკითხავდა, - რატომ ტირიო? მიზეზის გაგების შემდეგ მამშვიდებდა. სულ ხომ არ ვიტირებდი ამ სულელური ჭორების გამო? სხვა თვალით შევხედე ყველაფერს. როგორი ჭორიც უნდა იყოს, თუ საფუძველი არ აქვს, ის ქრება. ამას რომ მივხვდი, მერე დავწყნარდი. ახლა ჭორებზე აღარ ვტირი. როცა სააგენტო შევქმენი, მაშინაც უამრავი ჭორი აგორდა. სხვადასხვა ადამიანები სახელდებოდნენ და ამბობდნენ, თითქოს მათი ფულით დაფინანსდა.

-  ამბობდნენ, ლევან გაჩეჩილაძე აფინანსებსო.

-  ხან გაჩეჩილაძეებზე ამბობდნენ, ხან - ირაკლი ოქრუაშვილზე, ასლან აბაშიძეზე, ლევან მამალაძეზე, ბოლოს ვანო მერაბიშვილიც ითქვა. არადა, ამ დროს საბჭოს ქუჩაზე, ორ-ოთახიან ჩემს იტალიურ ბინაში მქონდა ოფისი გახსნილი. 10 000 დოლარით დავიწყე მუშაობა. ტელევიზიაში მუშაობის დროს დანაზოგი მქონდა, თან მამაჩემმა დამიმატა და ამ ფულით ვიყიდე ტექნიკა და ორი თვის ხელფასები გადავუხადე თანამშრომლებს. იმდენად ხმაურიანად შევედით ბაზარზე, რომ მერე კონტრაქტებიც გაფორმდა სააგენტოსთან. ბუნებრივია, ეს მთლიანად არ ჰყოფნიდა ყველაფერს, მაგრამ ერთს გამოვართმევდი ფულს და მეორეს ჩავასესხებდი, მერე მესამეს და ასე ვწვალობდი 8 თვე. არც ერთი თეთრი არავისი არ არის სააგენტო "პირველში". მერე იყო შემოთავაზებებიsalesland.ge - ფასდაკლებების სამყარო!, - ხომ არ დათმობ წილს, ხომ არ გინდა დაგეხმარო, მაგრამ უარს ვამბობდი, არ მინდოდა დამხმარება, რადგან ამ ვითარებაში არ იქნებოდა სააგენტო ობიექტური. ახლა კარგად ვიცი, რომ სააგენტოსკენ არ უნდა გავიხედო, არ შეიძლება ჩემგან მათთვის რაიმე ინფორმაციის მიწოდება. ყველანაირი ურთიერთობა გაწყვეტილი მაქვს, რადგან ვიცი, ეს დამაზარალებს მეც და სააგენტოსაც. მე თვითონ ხომ არ მოვკლავ აწყობილ საქმეს, რაც მთელი წლები ვაშენე?

-  შენ ხარ ერთადერთი გასათხოვარი დეპუტატი მმართველი გუნდიდან. რა ხდება შენს პირად ცხოვრებაში, შეყვარებული ხარ?

-  მარტო არ ვარ, შეყვარებული ვარ. დავიწრე ფიქრი, რომ მარტო არ უნდა ვიყო. მინდა მქონდეს ოჯახი. არაჩვეულებრივ ოჯახში გავიზარდე. ყველაფერი გაიღო ოჯახმა ჩემი წარმატებისთვის. შეყვარებული ვარ, მაგრამ ჯერ ვერ დაგისახელებთ მის ვინაობას. ერთს გეტყვით, - ის არ არის პოლიტიკაში. მასთან ერთად ოჯახის შექმნას ვაპირებ.

-  საზოგადოებისთვის ცნობილი ადამიანია?

-  გპირდები, ექსკლუზივს თქვენ მოგცემთ, როცა მე ამ ნაბიჯს გადავდგამ.

-  უახლოეს პერიოდში ქორწინდებით?

-  ზუსტად ვიცი, რომ ოქტომბრის ბოლომდე ამას არ ვაპირებ. საპრეზიდენტო არჩევნების შემდეგ, როცა მე კიდევ ერთ გამარჯვებას მოვიპოვებ და გავაცილებ მიხეილ სააკაშვილს, ამით ავიხდენ ჩემს 10 წლის ოცნებას და შემდეგ ქორწილს გადავიხდი და ჩემს პირად ცხოვრებასაც მოვიწყობ. ჩემი შეყვარებული არის ჩემი ყველაზე კრიტიკული შემფასებელი. ის არ არის ტიპური აზიატი მამაკაცი. დიდი ხანია, ვიცნობთ ერთმანეთს და ჩვენი ურთიერთობა გადაიზარდა სიყვარულში. ის ავსებს ჩემს ცხოვრებას. ის თბილისშია, მე - ქუთაისში, ეს არის ჩვენთვის პრობლემა, მაგრამ რამდენჯერმე პარლამენტიდან გამოსულს გარეთ დამხვდა და სიურპრიზი მომიწყო.

-  რა არის შენი გატაცება?

-  ადრე ლექსებს ვწერდი, მაგრამ მუზამ მიმატოვა. კარგა ხანია, ლექსი არ დამიწერია. როგორი დაღლილიც უნდა მივსულიყავი სახლში, აუცილებლად რამდენიმე ფურცელი წიგნი უნდა წამეკითხა. ახლა ამას ვერ ვახერხებ და წიგნები სულ მიდევს ახლოს და ვხვდები, თავს მახსენებენ. ჟურნალისტად 15 წელი ვიმუშავე. ეს პერიოდი კარგად დამთავრდა და ახლა ახალი ეტაპი დაიწყო ჩემს ცხოვრებაში. შეიძლება შეცდომები დავუშვა, მაგრამ იმდენად მინდა კარგი საქმეები ვაკეთო, რომ ვიცი, ამას შევძლებ.

-  როცა ჩვენი კოლეგა, ელისო ჩაფიძე მოვიდა პოლიტიკაში, ბიძინა ივანიშვილმა ერთგვარი რეკლამა გაუკეთა, როგორც სასურველ საპატარძლოს. შენზე არ უსაუბრია. ბიძინა ივანიშვილთან როგორი ურთიერთობა გაქვს?

-  კოალიციის ფარგლებში ვხვდებით ერთმანეთს. ელისოს ქორწილშიც შევხვდით, ჩვეულებრივი ურთიერთობა გვაქვს. მართალია, არაფერი უთქვამს ჩემზე, არ გაუკეთებია ჩემთვის რეკლამა... ახლა დავფიქრდი ამაზე, თუმცა, ეს სასაცილოა. ჩემი გული ისედაც დაკავებულია. ძალიან კარგი ადამიანია ბიძინა ივანიშვილი, საოცრად ძლიერი პიროვნება. ისეთ ანალიზს აკეთებს, რომ ხშირად გაოცებული ვრჩებით. ალბათ იმიტომ მიდის პოლიტიკიდანაც. ზუსტად იცის, სადაც მეტად სჭირდება საქართველოს მისი ყოფნა. იცის ის გზა, საიდანაც უკეთესად შეუძლია დაეხმაროს საქართველოს ეკონომიკას.

თეა ხურცილავა

ჟურნალი ”გზა”

(გამოდის ხუთშაბათობით)