მაწანწალა ძაღლებმა გურჯაანში წელს 600 მოქალაქე დაკბინეს
გურჯაანის ქუჩებში მაწანწალა ძაღლები უცხო არ არის. აღნიშნული პრობლემის მოგვარებას საკუთარ ვალდებულებად მუნიციპალიტეტში არსებული არცერთი სამსახური თვლიდა. დღეს გამგეობაში კი აცხადებენ, რომ საკითხი უახლოეს მომავალში გადაიჭრება. თუმცა პრობლემის მოგვარებამდე, წელს ძაღლით დაკბენის მიზეზით სამედიცინო დაწესებულებას ექვსასამდე მოქალაქემ მიაკითხა.
"ძალიან ბევრი საუკეთესო ჯიშის ძაღლი დამინახავს ქუჩაში, მაგრამ უპატრონოდაა დარჩენილი და გაუბედურებულია. თვითონ ცხოველიც ხომ ცოდოა, მაგრამ ამავე დროს ისიც გასათვალისწინებელია, როგორ საფრთხეს უქმნის მოქალაქეებს. რამდენი ინფექციური დაავადების გადატანა შეუძლია. ამაზე რიონის ხელმძღვანელობამ უნდა იზრუნოს", - აცხადებენ გურჯაანში.