შტეფან ფულე - მოუთმენლად ველით საქართველოსთან პოლიტიკურ ასოცირებას და თავისუფალი ვაჭრობის სივრცის შექმნას

მოუთმენლად ველით საქართველოსთან პოლიტიკურ ასოცირებას და თავისუფალი ვაჭრობის სივრცის შექმნას, - ამის შესახებ ევროკომისარი გაფართოების საკითხებში შტეფან ფულე სპეციალურ მიმართვაში აცხადებს, რომელიც საქართველოში დაგეგმილ ევროპის ახალგაზრდული პარლამენტის საერთაშორისო სესიასთან დაკავშირებით გაავრცელა. მისი თქმით, ევროკავშირი საქართველოს გვერდით დგას.

"საქართველო ახალგაზრდა ქვეყანაა, როგორც თანამედროვე დემოკრატიული სახელმწიფო, მაგრამ ის უძველესია თავისი უდიდესი კულტურით. ევროკავშირი საქართველოს გვერდით დგას, როგორც მეგობარი და პარტნიორი. ჩვენ მოუთმენლად ველით ამ ქვეყანასთან პოლიტიკურ ასოცირებას და თავისუფალი ვაჭრობის სივრცის შექმნას", - აღნიშნა ფულემ.

მისივე თქმით, საქართველო საუკეთესო ადგილია განსხვავებული პოლიტიკური და სოციალური ფონის მქონე ახალგაზრდების შესახვედრად, რომლებსაც ენთუზიაზმი აერთიანებთ.

"მათ ექნებათ შესაძლებლობა, გამართონ დებატები და განიხილონ სხვადასხვა აქტუალური საკითხები. დარწმუნებული ვარ, თბილისის სესია ძალიან წარმატებული იქნება და მოუთმენლად ველი მის შედეგებს", - აცხადებს ევროკომისარი.

"ინტერპრესნიუსი"