კრისტიან დიორი - მოდის მეფე

კრისტიან დიორი უდიდესი კუტიურიე იყო, რომელმაც მსოფლიოს ქალის ელეგანტურობისა და მომხიბლაობის ახალი ხედვა აჩუქა. მისი სახელი პარიზული მოდის სინონიმი გახდა, ყველაფერი, რასაც ის ქმნიდა, დიდი გემოვნებითა და მომავლის ხედვით გამოირჩეოდა. ყველა, ვინც ასე თუ ისე მსოფლიო მაღალ მოდასთან იყო დაკავშირებული, ყურადღებას აქცევდა, რას იტყოდა დიორი.

მოდის სამყაროში ღირსშესანიშნავი მოვლენა მონტენ ავენიუს ქუჩაზე ''დიორის'' მოდის სახლის გახსნაზე, პატარა ბინაში მოხდა. წელში გამოყვანილი, პატარა მრგვალი მხრები, მაღალი, ფუმფულა მკერდი და კოჭებამდე ქვედაბოლოები კრისტიანის პირველი კოლექციის ძირითადი შტრიხები იყო, რომელიც ომამდელი მოდის მემკვიდრეობას უსვამდა ხაზს. დიზაინერმა უპირატესობა ფუნქციონალურობასა და სიმარტივეს მიანიჭა. კოლექციის ''ახალ ხედვას'' , რომელიც დიორმა წარმოადგინა, თითქოს ის ქალბატონები უნდა დაეფრთხო,  რომლებიც ომის წლებში ''კვადრატულ'' პიჯაკებსა და მოკლე ქვედაკაბებს მიეჩვივნენ, მაგრამ ყველაფერი პირიქით მოხდა - სიღარიბითა და მუდმივი შეზღუდვებით დაღლილმა პარიზელებმა სიახლე აღფრთოვანებით მიიღეს...

ახალგაზრდა დიორი

კრისტიანი საფრანგეთის მხარე ნორმანდიაში, მეთევზეთა პორტ გრანვილში 1905 წელს დაიბადა. მამამისი, რომელიც ქიმიური სასუქების მწარმოებელი ქარხნის მეპატრონე იყო, იმდენს გამოიმუშავებდა, რომ ოჯახს არაფერი მოჰკლებოდა. ქალაქის მცხოვრებლებს არ მოსწონდათ ოჯახის უფროსის ''საეჭვო ბიზნესი'' , უფრო სწორად, ქარხნის მილებიდან ამოსული გამონაბოლქვი, რომელიც გარემოს აბინძურებდა. კორსიკის ქუჩებში ხშირად გაიგონებდით უკმაყოფილო ბუზღუნს: ''დიორი ხრჩოლავს''.

კრისტიანს ადრეული ბავშვობიდან ცუდი ურთიერთობა ჰქონდა დედასთან, მისი ყურადღების მისაქცევად დედის გატაცებას, მებაღეობას მიჰყო ხელი. იმ პერიოდში შეუყვარდა ყვავილები, უფრო სწორად - შროშანები, რომლებიც ყოველთვის ეკეთა პიჯაკის ღილკილოში. მომავალი დიზაინერი პატარაობიდან ხატავდა და ოცნებობდა, რომ მსოფლიოში სახელგანთქმული მხატვარი გამხდარიყო. მშობლები არ იზიარებდნენ მის გატაცებებს, ვაჟს დიპლომატობას ურჩევდნენ. დიდი ხვეწნა-მუდარის შემდეგ კრისტიანი დაჰყვა მშობლების ნებას და პარიზის ''თავისუფალ პოლიტიკურ სკოლაში ჩააბარა'' . ამით დიორის კარიერა დასრულდა, ლექციებს აცდენდა და მთელ თავისუფალ დროს ექსკურსიებსა და მუზეუმებში სიარულს ანდომებდა, პარალელურად მუსიკასა და ფერწერას ეუფლებოდა.

შედეგად, 1928 წელს მეგობრებთან ერთად სამხატვრო გალერეა გახსნა, სადაც გამოფენილი იყო მატისის, პიკასოსა და დიურერის ნახატები.

წარუმატებლობა

სამწუხაროდ, მისმა ბედნიერებამ დიდხანს არ გასტანა. დიორი-უფროსი, რომელიც ვაჟის გატაცებას აფინანსებდა, ქვეყანაში არსებული ეკონომიკური კრიზისის გამო გაკოტრდა და გალერეის დაკეტვა მოუხდათ. კრისტიანი შვიდი წლის შემდეგ საყვარელ საქმეს მიუბრუნდა. მეგობრების რჩევით, თავისი ესკიზები და ნახატები საფრანგეთის მოდურ ჟურნალებს გაუგზავნა. შემკვეთებს მოსწონდათ ახალგაზრდა დიზაინერის ნამუშევრები და მას ხშირად აქვეყნებდნენ, რამაც კრისტიანს სახელი გაუთქვა. ზოგიერთი მისი ნამუშევარი ''ვოგში'' დაიბეჭდა, სხვები რიჩარდ შერიდანოვმა და ნინა რიჩიმ მოიწონეს და შეიძინეს. რამდენიმე ხნის შემდეგ დიორმა რობერტ პიკე გაიცნო, რომელთანაც თითქმის ერთი წელი მოდელიერად იმუშავა, მაგრამ ბედმა კვლავ მოუწყო გამოცდა - სამხედრო სამსახურში გაიწვიეს. მომავალ კუტიურიეს ყველაფრის თავიდან დაწყება მოუხდა: კვლავ ჟურნალები, მოდელიერად მუშაობა... მხოლოდ 42 წლის ასაკში მოახერხა დიორმა თავისი ჭეშმარიტი არსის გამოხატვა.

იხილეთ სტატიის სრული ვერსია