3
მაისიდღის ზოგადი ასტროლოგიური პროგნოზი
მარტო თბილისში 2000-ზე მეტი სილამაზის სალონია, რომელსაც ყოველდღიურად ათიათასობით მოქალაქე აკითხავს; "საპარიკმახეროების შესახებ ეროვნული სტანდარტით", ნებისმიერი კლასის საპარიკმახეროში უზრუნველყოფილი უნდა იყოს მოხმარების ჯანმრთელობისა და სიცოცხლის უსაფრთხოება სანიტარიულ-ჰიგიენური და ტექნოლოგიური მოთხოვნების შესაბამისად. ბუნებრივია, ისმება კითხვა: სრულდება თუ არა ეს სტანდარტი? როგორ ემსახურებიან კლიენტებს, დაცულია თუ არა სანიტარიულ-ჰიგიენური ნორმები? როგორ უნდა ავიცილოთ თავიდან სილამაზის სალონში ვირუსული დაავადებებით, მათ შორის, შიდსით, C ჰეპატიტით დაინფიცირების საფრთხეები და რაც მთავარია, ვინ აკონტროლებს ჰიგიენის ნორმებს საპარიკმახეროებში? - ამ კითხვებზე პასუხის მისაღებად "ყველა სიახლე" რამდენიმე რესპონდენტს დაუკავშირდა:
ანა კირთაძე, მომხმარებელი: - სილამაზის სალონების ხშირი კლიენტი ვარ, ვცდილობ, უფრო ძვირად ღირებულ, პრესტიჟულ სალონებს (ვაკის რაიონში მდებარე რამდენიმე სალონს ასახელებს - რედ.) მივაკითხო, რადგან იქ უკეთესი მომსახურებაა, სისუფთავეც მეტად არის დაცული, ყავასაც შემოგთავაზებენ. ვიცი, რომ აუცილებელია პედიკიურის, მანიკიურის და სხვა იარაღების სტერილიზაცია, ზოგიერთი შენს თვალწინაც ატარებს ამ პროცედურას, მაგრამ არ ვიცი, რამდენად საკმარისია ეს დრო ამა თუ იმ ვირუსის გასანეიტრალებლად. ზოგიერთი ხელოსანი გეუბნება, ახლახან გავუკეთე სტერილიზაციაო და გეუხერხულება მოსთხოვო, ჩემს თვალწინ გაუკეთეო. მოკლედ, სალონის მომსახურე პერსონალის კეთილსინდისიერების იმედად ვართ, სხვა გარანტია არ არსებობს. ჩემმა მეგობარმა, რომელსაც ძვირად ღირებულ სალონებში სიარულის შესაძლებლობა არა აქვს, საკუთარი ინსტრუმენტები შეიძინა, მაგრამ კოსმეტოლოგთან ხომ მაინც უნდა მიხვიდე? ზოგიერთი ახალგაზრდა კი სალონში ტატუს და პირსინგს იკეთებს, რაც ასევე C და B ჰეპატიტით, შიდსით დაავადების წყაროდ შეიძლება იქცეს.
გიორგი ჩიტაძე, საქართველოს სტანდარტების და მეტროლოგიის ეროვნული სააგენტოს სტანდარტიზაციის დეპარტამენტის დირექტორი: - საქართველოს ეროვნული სტანდარტით - "საყოფაცხოვრებო მომსახურება - საპარიკმახეროების მომსახურება, ზოგადტექნიკური პირობები" განსაზღვრულია საპარიკმახეროს საქმიანობის წესები; სტანდარტი განსაზღვრავს ზოგად პირობებს, რაც შეეხება ჰიგიენურ ნორმებს, მასში ნათქვამია, რომ საქართველოს კანონმდებლობით განსაზღვრული ჰიგიენური, უსაფრთხოების ნორმები უნდა იყოს დაცული. ეს ნორმები კი წლებია, შრომისა და ჯანმრთელობის დაცვის მინისტრის ბრძანებულებით არის დამტკიცებული. რაც შეეხება სტანდარტის შესრულებას, საქართველოში, ისევე როგორც ევროპის ქვეყნებში, ასეთი მიდგომაა: სტანდარტიზაციის სამსახური სტანდარტის შესრულებაზე მონიტორინგს არ ახორციელებს, ეს ჩვენი ფუნქცია არ არის. საქსტანდარტის გაუქმების შემდეგ ეს ფუნქცია სხვა ორგანოს უნდა გადასცემოდა.
ჩვენ დავუკავშირდით მერიის ზედამხედველობის სამსახურს, სადაც გვითხრეს, რომ საპარიკმახეროს მონიტორინგი მათი ფუნქცია არაა, სანიტარიული ზედამხედველობის სამსახური კი რამდენიმე წელია გაუქმებულია. საპარიკმახეროების სანიტარიული კონტროლი არც შრომის, ჯანმრთელობისა და სოციალური დაცვის სამინისტროს პრეროგატივაა.
მადონა კოიძე, მომხმარებელთა ფედერაციის ხელმძღვანელი: - დღევანდელი მდგომარეობიდან გამომდინარე, საპარიკმახეროებში C, B ჰეპატიტითა და შიდსით დაავადების რისკი მაღალია; ამასთან, შიდსის ვირუსი არ არის ისეთი მდგრადი, როგორიც C ჰეპატიტის ვირუსი. ამ ვირუსის მოსასპობად საჭიროა სტერილიზაცია 15 წუთის განმავლობაში, 130 გრადუსზე მაღალ ტემპერატურაზე, რაც დღეს თბილისსა თუ სხვა ქალაქებში არსებული საპარიკმახეროების უმრავლესობაში არ ხდება; შიდსის ვირუსის გასანეიტრალებლად კი ინსტრუმენტის სტერილიზაცია 60 გრადუსზე საკმარისია. ამიტომ მოსახლეობა, განსაკუთრებით სალონების ხშირი სტუმრები ასეთ ხერხს მიმართავენ, თვითონ ყიდულობენ საჭირო იარაღების ნაკრებს და სალონში დააქვთ. რაც შეეხება სახელმწიფოს, მისი მხრიდან სილამაზის სალონების კონტროლი, ზედამხედველობა არ ხდება, ნებისმიერ ადამიანს შეუძლია გახსნას სალონი, ირღვევა კლიენტთა უფლებები, მათ შორის, ჯანმრთელობის, სიცოცხლის უფლება, მომხმარებელი ვერ იღებს კვალიფიციურ მომსახურებას. ზოგიერთ სალონში არა მარტო სტერილიზაციის, საერთოდ, ჰიგიენის პრობლემაა. გადასასვლელი ხიდის ტერიტორიაზე მდებარე რამდენიმე სალონში წყალიც არ არის, რომ ხელოსანმა ხელი გადაიბანოს და მეორე პაციენტს ისე მოემსახუროს. ერთადერთი სფერო, რომელიც დღეს მეტ-ნაკლებად რეგულირდება, სურსათის უვნებლობის სამსახურია. უნდა შეიქმნას ძლიერი ინსტიტუტი, რომელიც გააკონტროლებს როგორც საყოფაცხოვრებო, ისე სამედიცინო და სხვა სფეროებს და მომხმარებლის პრეტენზიის შემთხვევაში, სწორ და ობიექტურ გადაწყვეტილებას მიიღებს.
სპეციალისტები გვაფრთხილებენ:
1. განსაკუთრებული სიფრთხილით აარჩიეთ სალონი, გახსოვდეთ, რომ მომსახურების მაღალი ფასი უსაფრთხოების გარანტია არ არის. მთავარი კრიტერიუმი ამ შემთხვევაში ინვენტარის დამუშავების ხარისხია. დაინტერესდით, რა მეთოდით ხდება ინსტრუმენტების სტერილიზაცია და არსებობს თუ არა სალონში "ავტოკლავი" - სპეციალური ხელსაწყო ინვენტარის თერმული დამუშავებისთვის. 2. მიმართეთ გამოცდილ ოსტატებს, "ახალბედები" ხშირად აზიანებენ ფრჩხილსა და ნუნებს და ამით დასნებოვნების რისკი იზრდება. 3. თუ თქვენ უსაფრთხოების 100%-იანი გარანტია გსურთ, სალონში საკუთარი მანიკიურის ნაკრები წაიღეთ. 4. არსებობს ჯანმრთელობის დაზღვევის კიდევ ერთი მეთოდი - ევროპული მანიკიური, რომელიც მჩხვლეტი და მჭრელი ინსტრუმენტების გარეშე კეთდება. ფრჩხილების გარშემო სპეციალურ საშუალებას უსვამენ, რომელიც კანის გარქოვანებულ ნაწილებს არბილებს და შემდეგ ყოველგვარი დაზიანების გარეშე ამ ნაწილებს სპეციალური ჩხირებით აშორებენ. საშიშ დაავადებებს შეუიარაღებელი თვალით ვერ გაარჩევთ, სალონების მფლობელთა სისუფთავეს კი ბოლომდე ვერ დაეყრდნობით. ასე რომ, იყავით ფრთხილად!
ნინო კვიტაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
