აჭარის უმაღლეს საბჭოში თანამშრომლებს საყვედურის შემდეგ პრემიებით ანუგეშებენ

კვირა არ გავა, რომ აჭარის უმაღლესი საბჭოს გარშემო სკანდალი არ ატყდეს. "vip" პრესონის ბულვარში ავტომობილით სეირნობის და სასამართლო დავების გამო ატეხილი აჟიოტაჟის შემდეგ, "ამბები.გე"-სთვის ცნობილი გახდა, რომ აჭარის უმაღლესი საბჭოს აპარატის პრესსამსახურის ხელმძღვანელს მარინე კუპრეიშვილს საყვედურის პარალელურად 100%-იანი პრემია გამოუწერეს.

მარინე კუპრეიშვილმა დისციპლინარული პასუხისმგებლობისთვის გაფრთხილება 2013 წლის 14 ივნისს მიიღო. მან რადიო "აჭარის" ჟურნალისტი უმაღლესი საბჭოს თავმჯდომარის ორშაბათის ტრადიციულ ბრიფინგზე არ შეუშვა.

"ამბები.გე" აჭარის უმაღლესი საბჭოს აპარატის უფროსს რამაზ ბოლქვაძეს დაუკავშირდა:

- მარინე კუპრეიშვილმა დისციპლინარული პასუხისმგებლობა - გაფრთხილება მიიღო. შენიშვნა დისციპლინური ღონისძიების პირველი საფეხურია, ხოლო გაფრთხილება მეორე ეტაპის.

- გაფრთხილების შემდეგ რატომ მიიღო 100%-იანი პრემია?

- ეს არის ხელფასის შემადგენელი ნაწილი, საჯარო სამსახურის შესახებ კანონშიც ასეა აღნიშნული. ეს არის გაწერილი. კვარტალში ერთხელ 100% პრემია ეძლევათ, ხოლო ყოველთვიურად 50%-იანი. დისციპლინარული პასუხისმგებლობის ერთ-ერთი ზომა არის არა უმეტეს 10 სამუშაო დღის ხელფასის დაკავება, მაგრამ ეს ზომა რომ გამომეყენებინა, მაშინ ვალდებული ვიქნებოდი და დავუკავებდი ხელფასს, მაგრამ მე გამოვიყენე გაფრთხილება და შესაბამისად, ვერ დავუკარგავდი იმ ანაზღაურებას, რაც ბიუჯეტში უდევს ყველა თანამშრომელს. ეს ხელფასის შემადგენელი ნაწილია.

- აბა როგორი დასჯაა თუკი 100% პრემიასაც იღებს?

- ნუ გაეკიდებით ამ სიტყვას. პრემია ხელფასის შემადგენელი ნაწილია. ჯილდო სხვაა, მე რომ დამეჯილდოვებინა, ეს სხვა თემა იქნებოდა.

საქართველოს ახალგაზრდა იურისტთა ასოციაციის აჭარის ფილიალის ხელმძღვანელი გია ქარცივაძე კი განმარტავს, რომ დისციპლინარული პასუხისმგებლობის მოქმედების პერიოდში ან არ უნდა გაიცეს ხელფასზე დანამატი, ან უნდა შემცირდეს, წინააღმდეგ შემთხვევაში კანონდარღვევაა:

"100%-იანი დანამატის მიცემა ხელფასზე არის კანონდარღვევა, რადგან დისციპლინარული პასუხისმგებლობის მოქმედების პერიოდში ან არ უნდა გაიცეს დანამატი, ან უნდა შემცირდეს. 100% -იანი დანამტის გაცემა გამორიცხულია, კანონი კრძალავს", - აღნიშნა გია ქარცივაძემ.

"ამბები.გე"-სთვის ასევე ცნობილი გახდა, რომ ორი დღის წინ ჟურნალისტების მიმართ სოციალურ ქსელში გამოთქმული შეურაცხმყოფელი სიტყვების ავტორს, აჭარის უმაღლესი საბჭოს პრესსასმახურის თანამშრომელს კობა ადეიშვილს უახლოეს დღეებში შვებულებაში გაუშვებენ, ხოლო შვებულების შემდეგ ახალ სამსახურს შესთავაზებენ.

კობა ადეიშვილმა სოციალურ ქსელში გაზეთ "ბათუმელების" სტატიაზე - "ვინ იზეიმა "ბათუმობა" 240 ათას ლარად" შეურაცხმყოფელი შეფასებები გააკეთა. ამ ფაქტს ბათუმში ჟურნალისტების და არასამთავრობო სექტორის მხრიდან მწვავე რეაქცია მოჰყვა და დისკუსიაც გაიმართა.

დღესვე, უმაღლესი საბჭოს პრესსამსახურმა ამ თემაზე განცხადება გააკეთა, რომ "კობა ადეიშვილის მხრიდან სრულიად გაუმართლებელ და ჟურნალისტების მიმართ შეურაცხმყოფელ შეფასებებთან დაკავშირებით ადმინისტრაციული მოკვლევა დაიწყო".

ნინო ხოზრევანიძე, ბათუმი