თომას მელია ჭელასა და სამთაწყაროში განვითარებულ მოვლენებს "მეტისმეტად შემაშფოთებელს" უწოდებს

ამერიკის სახელმწიფო მდივნის მოადგილე დემოკრატიის, ადამიანის უფლებებისა და შრომის საკითხებში თომას მელია ჭელასა და სამთაწყაროში განვითარებულ მოვლენებს "მეტისმეტად შემაშფოთებელს" უწოდებს.

როგორც თომას მელიამ დღევანდელ პრესკონფერენციაზე განაცხადა, თავისუფალ საზოგადოებებს აქვთ ამგვარი გამოწვევები, განსაკუთრებით კი პოსტსაბჭოთა სივრცეში.

"საბჭოთა კავშირის დროს რელიგიური ჯგუფები მუდმივად განიცდიდნენ ზეწოლას. ის, თუ როგორი დამოკიდებულება არსებობს რელიგიურ უმრავლესობასა და უმცირესობას შორის, ერთგვარი გამოწვევაა, თუმცა, მე დღეს იმედიანი საუბარი მქონდა სრულიად საქართველოს კათოლიკოს-პატრიარქთან და იმედიანად ვარ განწყობილი საქართველოში რელიგიურ ჯგუფებს შორის დამოკიდებულების კუთხით მოვლენების განვითარების მიმართ", - აღნიშნა თომას მელიამ.

მისივე თქმით, რელიგიური თავისუფლება ის საკვანძო საკითხია, რომელსაც ამერიკის შეერთებული შტატები, როგორც საშინაო, ასევე საგარეო პოლიტიკაში დიდ მნიშვნელობას ანიჭებს.

"ამერიკის შეერთებულ შტატებში ყველა ადამიანი თავისუფალია და ამერიკული საზოგადოება აგებულია ამ ქვაკუთხედზე. მიგვაჩნია, რომ რელიგიურ ჯგუფებს შორის დამოკიდებულება არის გარემოება, რაც სოციალურ სიმშვიდეს განაპირობებს. სწორედ ამიტომ ამერიკის შეერთებული შტატები საერთაშორისო პოლიტიკაში დიდ მნიშვნელობას ანიჭებს რელიგიურ თავისუფლებას და მიგვაჩნია, რომ ეს არის საკვანძო საკითხი ნებისმიერი ახალი დემოკრატიისთვის", - აღნიშნა თომას მელიამ.

"ინტერპრესნიუსი"