დავლიოთ თუ არა რძე - ვის უქმნის მისი მიღება საფრთხეს და ვისთვისაა ის სასარგებლო?

ბავშვობაში რძისგან ვიღებთ ძალას, ჯანმრთელობას და ყველაფერს სასარგებლოს. შემდეგ ზოგი უარს ამბობს რძეზე, ზოგი კი მას ყოველდღიურ რაციონში რთავს.

ალბათ არ არსებობს სხვა პროდუქტი, რომლის თვისებებზეც ამდენს კამათობენ. და მართლაც, სარგებელი მეტი მოაქვს რძეს თუ ზიანი?

ძველად, ექიმები მიიჩნევდნენ, რომ რძე საუკეთესო წამალი იყო და უამრავი დაავადების დროს იყენებდნენ. ბავშვობიდან ვიცით, რომ რძე და რძის პროდუქტი კალციუმის საბადოა. დღეში 4 ჭიქა რძე საკმარისია, რომ ადამიანის ორგანიზმმა საჭირო მინერალების სადღეღამისო დოზა მიიღოს. რძეში შემავალი ფოსფორი, კალციუმთან ერთად, ამაგრებს არა მხოლოდ ძვლებს, არამედ ნერვებსაც, რომლებიც ყოველდღიურად უმკლავდებიან სტრესულ სიტუაციებს.

ეს ყველაფერი არ არის - რძეში შემავალი ვიტამინების მთელი ანბანი (A, B, D) და ფოლის მჟავა ორგანიზმს ძალითა და ენერგიით ავსებს.

მაგრამ ექიმების ნაწილი ამბობს, რომ რძე ასეთი სასარგებლო ყველასათვის არ არის. მაშ, გავარკვიოთ, ვინ უნდა ჩართოს ეს პროდუქტი ყოველდღიურ რაციონში და ვინ უნდა ამოიღოს მენიუდან.

პირველ რიგში, რძეს ისინი უნდა მოერიდონ, ვინც ალერგიით იტანჯება. ძალიან ხშირად, რძის ალერგია კანის სიწითლით, ქავილით და ბრონქიალური ასთმითაც კი გამოიხატება.

რძეს უკუჩვენება აქვს თირკმელებში ფოსფატური კენჭების არსებობისას, ასევე ლაქტაზის დეფიციტის დროს. უნდა აღინიშნოს, რომ ასეთი დაავადებებით პლანეტის მოსახლეობის 15% იტანჯება.

რძის მიღებისას შეზღუდვად ითვლება ასაკიც. 55 წელს გადაცილებულთ, ექიმები არ ურჩევენ რძის ჩართვას ყოველდღიურ რაციონში. ამის მიზეზი რძეში შემავალი მირისტინის მჟავაა, რომელიც დაბალი სიმკვრივის ლიპოპროტეიდების წარმოქმნას უწყობს ხელს, ეს კი ათეროსკლეროზის რისკს ზრდის. ამ დაავადების ალბათობა კი სწორედ 55 წლის შემდეგ მატულობს.

მაშ, ვის შეუძლია რძის მიღება შეუზღუდავად და ვისთვისაა ის სასარგებლო?

იმ ადამიანთა სია, ვისაც შეუძლია და სჭირდება რძე, დიდია. ჩამოვთვლით მათ, ვისთვისაც უბრალოდ აუცილებელია ეს პროდუქტი. მათ, ვინც უძილობით, გაციებით, ჰიპერტონიით, ავიტამინოზით, გულძმარვით იტანჯება, რძე შესამჩნევად გაუიოლებს ცხოვრებას. ექიმების აზრით, რძე უნდა სვან სპორტსმენებმა და რა თქმა უნდა, ბავშვებმა.

სპეციალისტების აზრით, რძის უსაფრთხო დღიური ნორმა 300 მლ-ია. იხილეთ ვრცლად