გია გვიჩიანი ნიკა ლომინაძის მკვლელობის საქმის დეტალებზე საუბრობს

"თელასის" მენეჯერის, ნიკა ლომინაძის მკვლელობის ორგანიზებაში ბრალდებული გია გვიჩიანი საქმის ზოგიერთ დეტალს ასაჯაროებს. მსჯავრდებულ გია გვიჩიანის წერილი "ინტერპრესნიუსს" მისმა ოჯახმა მიაწოდა.

"10 სექტემბერს, სააპელაციო სასამართლოში ჩემი შუამდგომლობის საფუძველზე დაიწყება პროცესი განაჩენის გადასინჯვის თაობაზე.

მე რამდენჯერმე საჯაროდ მოვუწოდე ბატონ ნოდარ ლომინაძეს, წარმოედგინა ერთი მტკიცებულება მაინც, რის გამოც მან ირწმუნა ჩემი დამნაშავეობა. პასუხად მივიღე განცხადება, რომ ნოდარ გვიჩიანის ჩვენება არის მისთვის მტკიცებულება. ეს უცნაურია, რადგანაც დაზარალებული ლომინაძეების ოჯახი საერთოდ არ დასწრებია სასამართლოში ნოდარ გვიჩიანის დაკითხვას. ამიტომ მე საჯაროდ გამოვაქვეყნებ საქმის ზოგიერთ დეტალს.

ვინ არის ნოდარ გვიჩიანი? ის იმ დროისთვის 4-ჯერ ნასამართლევი ცნობილი კრიმინალი, თაღლითი და ნარკომოვაჭრე იყო. საყოველთაოდ ცნობილია, რომ ნ. გვიჩიანმა შეცდომაში შეიყვანა კალაძეების ოჯახი, 200 ათასი დოლარი გამოართვა გატაცებული ლევან კალაძის ვითომდა დასაბრუნებლად და შემდეგ ამ თანხის მითვისება აფრასიძეებს დააბრალა. ნოდარ გვიჩიანის მიერ პოლიციისათვის მიცემულმა ცრუ ინფორმაციამ დიდი როლი ითამაშა აფრასიძეების ოჯახის ტრაგედიაში.

2005 წლის 10 ნოემბერს, დიდი ოდენობით ნარკოტიკების გაყიდვის ფაქტზე დაკავებულმა ნოდარ გვიჩიანმა საპყრობილედან თავის დაღწევის მიზნით შეცდომაში შეიყვანა გამოძიება და საპროცესო გარიგების საფუძველზე ჩემს წინააღმდეგ მისცა ცრუ ჩვენება. შედეგად "ადეიშვილის პროკურატურამ" ნოდარ გვიჩიანი სრულად გაათავისუფლა სასჯელისაგან, ხოლო მე საჩვენებლად დამაპატიმრა. ჩვენთვის ცნობილია, რომ ფსევდონიმით გათავისუფლებულმა ნოდარ გვიჩიანმა, სხვა გვარით და სახელით, უკრაინაში კვლავ ჩაიდინა დანაშაული და ამჟამად 20 წლიან სასჯელს იხდის.

აი ამ ადამიანის 9-ჯერ შეცვლილი, აბსურდული და ურთიერთგამომრიცხავი ჩვენების საფუძველზე მაქვს სამუდამო პატიმრობა მოსჯილი. სხვა მტკიცებულება ჩემს წინააღმდეგ არ არსებობს. საზოგადოებისათვის უფრო გასაგები რომ იყოს ამ საქმის აბსურდულობა, წარმოგიდგენთ ნოდარ გვიჩიანის ჩვენებებში არსებული ამოუწურავი არსებითი წინააღმდეგობებიდან მხოლოდ ორს:

ნოდარ გვიჩიანის ჩვენებით, ის თითქოს იყო შუამავალი ჩემსა და ეგრეთ წოდებულ "ქილერს" - ნიკა ჩემიას შორის. ამ ჩვენებით ნიკა ჩემიას დაახლოებით 2 კვირა დასჭირდა მკვლელობის მოსამზადებლად. თითქოს ამ ორი კვირის განმავლობაში ნოდარ გვიჩიანი სხვადახხვა დროს 5-ჯერ შეხვდა ნიკა ჩემიას. 5-ვე შეხვედრა მან ცალ-ცალკე აღწერა.

1. შეხვედრა მკვლელობის შეკვეთის მისაცემად.

2. მეორე დღეს 20 ათასი დოლარი გადასცა ბუკიას ბაღთან.

3. რამდენიმე დღის შემდეგ სახლში ესტუმრა ნიკა ჩემია და უთხრა რომ ნიკო ლომინაძის პიროვნება უკვე შესწავლილი ჰყავდა სახეზე.

4. რამდენიმე დღის შემდეგ კვლავ ესტუმრა ნიკა ჩემია და ამ საქმისათვის სპეციალურად შეძენილი 1500 დოლარიანი "მაკაროვის" მაყუჩიანი იარაღი აჩვენა.

5. რამდენიმე დღის შემდეგ ბახტრიონზე დაინახა ნიკა ჩემია როგორ მიჰყვებოდა მანქანით ნიკო ლომინაძეს. ამ შეხვედრიდან 2 დღეში მოხვდა მკვლელობა.

როგორც შემდეგ დადგინდა, ნოდარ გვიჩიანის და ნიკა ჩემიას მობილური ტელეფონის სატელეფონო ანძების და საზღვრის დაცვის დეპარტამენტის ცნობით, მთელ ამ პერიოდში ნიკა ჩემია გერმანიაში იმყოფება, ხოლო ნოდარ გვიჩიანი ბათუმში. გამომდინარე აქედან მათი ხუთივე შეხვედრა შეთხზული და მოგონილია.

სასამართლოზე პროკურორმა სცადა ამ აბსურდის გამოსწორება და ე. წ. "შემსრულებელს" ავთო ხერკელაძეს ათქმევინა (რის შემდეგაც მასთან გაფორმდა საპროცესო შეთანხმება), რომ თითქოს მკვლობის მომზადებას, ნიკა ჩემიამ თვე-თვენახევარი ან მეტი დროც კი მოანდომაო. მაგრამ იქვე გაირკვა, რომ ეს ვერ მოხდებოდა, რადგანაც ნიკო ლომინაძე მკვლელობამდე 20 დღით ადრე, 2002 წლის 27 ივნისიდან 22 ივლისამდე, თითქმის ერთი თვით, იმყოფებოდა ჯერ საფრანგეთში, შემდეგ ვენესუელაში. ხოლო მისი თბილისში ჩამოსვლის მეორე დღეს კი 23 ივლისს, ნიკა ჩემია გაემგზავრა გერმანიაში. ანუ, ნიკა ჩემია და ნიკო ლომინაძე თბილისში ერთდროულად არც ერთი დღე არ იმყოფებიან. გამოძიება 2002 წლის 3 ივლისის უკან ვეღარ წავიდა, რადგან სწორედ 3 ივლისს გათავისუფლდა ნოდარ გვიჩიანი მორიგი პატიმრობიდან. თეორიულადაც კი ნიკა ჩემიას არ შეეძლო ამ მკვლელობის მომზადება. ცხადია ნოდარ გვიჩიანის ჩვენება მთლიანად შეთხზული და მოგონილია.

მე-2 ეპიზოდი მდგომარეობს შემდეგში: ნოდარ გვიჩიანის პირველი 7 ჩვენებით მან მკვლელობის ფაქტი გაიგო სახლში რუსთავი 2-ის გადაცემა კურიერიდან. თითქოს ის მიხვდა რომ მისმა მეგობრებმა შეასრულეს შეკვეთა. მაშინვე სცადა მათთან ტელეფონით დაკავშირება, მაგრამ სამივეს გამორთული ჰქონდა მობილური, შემდეგ თითქოს მივიდა ბახტრიონის ქუჩაზე ერთ-ერთი ე. წ. შემსრულებლის გია პაპაჩაშვილის სახლთან და ქვევიდან დაუძახა. აივნიდან გადმოხედა პაპაჩაშვილის მეუღლემ, სახელად მაიამ და უპასუხა რომ -"გია სახლში არ იყო და თუ სად იყო არ იცოდა". როგორც მერე შეიტყო მკვლელობის შემდეგ ე. წ. შემსრულებლები გაეცალნენ თბილისს და ამიტომ იმ დღეს ვერც ერთს ვერ დაუკავშირდა. მისივე ჩვენებით გარკვეული პერიოდის შემდეგ ე. წ. შემსრულებლები დაბრუნდნენ თბილისში და მოუყვნენ მკვლელობის შესახებ.

გამოძიების მიერ ამოღებული იქნა ინფორმაცია სატელეფონო ანძებიდან და აღმოჩნდა, რომ ნოდარ გვიჩიანი მკვლელობის დროს იმყოფებოდა ბათუმში და არა თბილისში, ამიტომაც გამოძიებამ ნოდარ გვიჩიანს მე-8 ჯერ შეაცვლევინა ჩვენება და დააწერინა, რომ მკვლელობის ფაქტი გაიგო ბათუმში და არა თბილისში. ამ ეპიზოდიდანაც ნათლად ჩანს, რომ გამოძიება გზადაგზა ცდილობდა ნოდარ გვიჩიანის ჩვენებები მიესადაგებინა გამოძიების პროცესში მოპოვებული სხვა მტკიცებულებებისათვის რაც პრაქტიკულად შეუძლებელი აღმოჩნდა ნოდარ გვიჩიანის ჩვენებებში არსებული გადაულახავი წინააღმდეგობების გამო.

აღსანიშნავია, რომ "ქილერობის" ბრალდებით გასამართლებულ ნიკა ჩემიას აქვს უტყარი ალიბი. მას გერმანიიდან მანქანები ჩამოყავდა თბილისში გასაყიდად. ის მკვლელობამდე 2 დღით ადრე ჩამოდის თბილისში და მკვლელობის დილას კვლავ გერმანიაში მიემგზავრება, რომ მოასწროს ერთ თვიანი ვიზის პირობებში მეორე მანქანის ჩამოყვანა. მკვლელობის სავარაუდო დროს მისი მობილური ტელეფონი რკინიგზის ვაგზალზეა დაფიქსირებული, საიდანაც ოჯახთან და მეგობრებთან ერთად, სულ რვა ადამიანი, მატარებლით მიემგზავრებიან ბათუმში. მათ აქვთ 3 მობილური ტელეფონი და ამოღებული სატელეფონო ანძების მონაცემების მიხედვით, ისინი გადაადგილდებიან ბათუმისაკენ. ოჯახი და მეგობრები რჩებიან ბათუმში, ხოლო ნიკა ჩემია ჩასვლიდან ნახევარ საათში გადაკვეთს სარფის საბაჟოს და თურქეთის გავლით მიემგზავრება გერმანიაში. საქმეში არსებული მტკიცებულებები უტყუარად ადასტურებს, რომ ნიკა ჩემია მკვლელობის დროს 7 ადამიანთან ერთად, მატარებლით მიემგზავრება ბათუმისაკენ.

ასევე აღსანიშნავია რომ ამერიკის გფბ-ს ლაბორატორიიდან მიღებული დნმ-ის ანალიზის პასუხით, მკვლელობის ადგილიდან აღებული დნმ-ის ნიმუშები (ნერწყვი, თმის ღერები) და თითის ანაბეჭდი არ დაემთხვა ნიკა ჩემიას, ავთო ხერკელაძის, გია პაპაჩაშვილის და ნოდარ გვიჩიანის შესაბამის მონაცემებს. ამიტომაც ეს დასკვნა დამალა ადეიშვილის პროკურატურამ და არ წარმოადგინა სასამართლოში.

ნოდარ გვიჩიანის ჩვენებების მიხედვით, თითქოსდა ნიკა ჩემიამ მკვლელობა განახორციელა "მაკაროვის" სისტემის პისტოლეტით. აღმოჩნდა, რომ ნიკო ლომინაძის თავის ქალაზე არსებული ჭრილობის ზომა უფრო მცირე ზომისაა ვიდრე "მაკაროვის" ტყვია. სამედიცინო და ბალისტიკური ექსპერტების ჩვენებით კი ტყვია ძვალზე არასოდეს არ ტოვებს თავისზე უფრო მცირე ზომის ჭრილობას. ეს ნიშნავს, რომ ნიკო ლომინაძე არ არის "მაკაროვის" იარაღით მოკლული, რაც კიდევ ერთხელ ადასტურებს, რომ ნოდარ გვიჩიანის ჩვენება მოგონილია და აბსურდულია.

შეუძლებელია წერილის ფორმატში, წარმოჩენილი იქნას ყველა ის არსებითი ხასიათის წინააღმდეგობა რასაც ადგილი აქვს ნოდარ გვიჩიანის აბსურდულ ჩვენებებში, რომელთა საფუძველზეც ორ უდანაშაულო ადამიანს მოსჯილი გვაქვს უვადო თავისუფლების აღკვეთა", - ნათქვამია გია გვიჩიანის წერილში.

"თელასის" მენეჯერი ნიკა ლომინაძე 2002 წელს, ბახტრიონზე მდებარე საკუთარ საცხოვრებელ სახლში მოკლეს. გია გვიჩიანი დამნაშავედ სცნეს და 2006 წელს დააკავეს. გვიჩიანი "თელასში" ექსპერტად მუშაობდა.

უვადო პატიმრობამისჯილი გვიჩიანი თავს უდანაშაულოდ სცნობს და დაკავებას სანდრო გირგვლიანის მკვლელობის გადაფარვის მიზანს უკავშირებს.

"ინტერპრესნიუსი"