25
მაისიდღის ზოგადი ასტროლოგიური პროგნოზი
სამი თვის წინ "იუთუბიზე" თალიბანის სახელით გავრცელდა მუქარის შემცველი ვიდეოკლიპი, რომელშიც ავღანეთში ქართული სამხედრო კონტინგენტის წევრებს ფიზიკური განადგურებით ემუქრებიან. შს სამინისტრომ აღნიშნულ ფაქტზე გამოძიება მაშინვე დაიწყო. საქმეში FBI და ისრაელის ელექტრონული დაზვერვის სამსახურიც ჩაერთო. სპეციალისტები თავიდანვე გამორიცხავდნენ აღნიშნული კლიპთან თალიბების კავშირს და ეჭვიც არ ეპარებოდათ, რომ მისი წარმომავლობის დადგენა იოლი იქნებოდა. "ყველა სიახლე" დაინტერესდა, თუ რატომ ჭიანურდება საქმეზე გამოძიება - ეს ტექნიკურად რთული პროცედურაა, თუ საქმის გახსნის პოლიტიკური ნება არ არსებობს? როგორც შს სამინისტროში გვითხრეს, საქმის ირგვლივ ამ ეტაპზე ახალი არაფერია.
იოსებ ზაალიშვილი, ექსპერტი ახლო აღმოსავლეთისა და ისლამური ტერორიზმის საკითხებში:
- აღნიშნული კლიპი რომ თალიბანის და ალ-ქაიდას ატვირთული არ არის, გასაგებია, მაგრამ რატომ არ იძიებენ ამ საქმეს, ვერ გეტყვით. რადგან კლიპი ერთჯერადადაა ატვირთული, შეიძლება მისი წარმომავლობა ვერც დაადგინო. ისრაელის სპეცსამსახურები კი არა, ვინც უნდა ჩაერთოს ამ საქმეში, მისი დადგენა ძალზე რთულია. შესაძლოა, ელოდებიან, კიდევ რაიმე აიტვირთოს. ფაქტია, რომ კლიპი არ არის თალიბების დამზადებული, რაზეც მიუთითებს გამოყენებული მასალა - მასში ნამდვილად არ ურევია ისლამური ფუნდამენტალისტების ხელი. ამას პირველ რიგში ამტკიცებს ის, რომ იქ არც ერთი მათი ლიდერი არ გამოსულა. ხმა და სახეც რომ იყოს, ამას სპეციალური იდენტიფიკაცია სჭირდება. როდესაც ბინ ლადენი გამოდიოდა ხოლმე, ორი თვის განმავლობაში ადგენდნენ, მართლა ის იყო თუ არა. ეს გარკვეულ პროცედურასთანაა დაკავშირებული. ეს არის მაღალკვალიფიციურად გაკეთებული სატელევიზიო-სააგიტაციო მასალა. შეიძლება ის საქართველოშიც იყოს დამზადებული და სხვა ნებისმიერ ქვეყანაშიც, თუნდაც - რუსეთში, ნებისმიერი ვერსიის თქმა შეიძლება. დამზადებას უნდა სტუდია, არც იმის დამალვაა პრობლემა, თუ საიდანაა ატვირთული, სერვერის ჩამოყალიბება ყველას შეუძლია. ჩემი აზრით, ვიღაცამ ამით რეკლამა გაიკეთა პოლიტიკური ან სხვა მიზნებისთვის. ვნახეთ, რომ ამ კლიპს შედეგი არ მოჰყოლია. მისი გავრცელების შემდეგ რომ ავღანეთში ქართულ შენაერთებზე კიდევ ყოფილიყო თავდასხმა, ან სხვა რაიმე პროცესები მოჰყოლოდა, კიდევ ჰო. უბრალოდ, ვიღაცამ აჩვენა, რომ კარგად ფლობს ინტერნეტ-ტექნოლოგიებს, აქვს კარგი სტუდია... ერთადერთი, შესაძლოა ამ კითხვაზე შსს-ს აიდი-სამსახურმა გასცეს პასუხი, თუმცა ისინიც არაფერს გეტყვიან. სხედან და ელიან, იმ გზის თავიდან გამოჩენას, რა გზითაც ეს მასალა აიტვირთა. თავიდან, როცა კლიპი იტვირთებოდა, მას ყურადღება არ მიაქციეს, რადგან იქ იმ ხალხის ხმა არ იყო, ვისი ხმაც ავტომატურად ერთვება - კომპიუტერში არის მიცემული ხმები, რასაც დაზვერვის ქსელი იოლად ადგენს. ეს იყო უბრალოდ, მსახიობის ხმა, ამიტომაც არ მიიჩნიეს ამოსავალ წერტილად. თუ ასეთი რამ კიდევ განმეორდება, მაშინვე დაადგენენ მის წარმომავლობას, წინააღმდეგ შემთხვევაში, საეჭვოა ეს დადგინდეს. თუ ეს საკითხი აშშ-ის სტრატეგიულ ინტერესებში შევა, საქმის გახსნა გაიოლდება, ბოლოს და ბოლოს ბინ ლადენი და სხვა არაერთი ტერორისტი იპოვეს, მაგრამ არ მგონია, ამერიკის სტრატეგიულ ინტერესებში შედიოდეს ვიღაცა სულელის მიერ ატვირთული კლიპის წარმომავლობის დადგენა. ეს არის მდარე ხარისხის სარეკლამო კლიპი. შეიძლება ნაპოვნიც ჰყავთ ავტორი, მაგრამ არ ამბობენ. როცა არუთინიანმა ბუშს "ლიმონკა" ესროლა, ხომ აღმოჩნდა, რომ ის კაცი სულელი იყო. დაახლოებით ასეთივე დონისაა ეს საქმეც.
ნანა ფიცხელაური
ყოველკვირეული გაზეთი "ყველა სიახლე"
(გამოდის ოთხშაბათობით)
