პრეზიდენტის ადმინისტრაცია "თალიბანის" სახელით გავრცელებულ ვიდეოკლიპზე გამოძიების ინფორმაციას ითხოვს

პრეზიდენტის ადმინისტრაცია შს მინისტრს მიმართავს და თალიბანის სახელით გავრცელებულ ვიდეოკლიპთან დაკავშირებით გამოძიების კონკრეტულ შედეგამდე მიყვანას, მიმდინარე გამოძიების შესახებ კი დეტალური ინფორმაციის მიწოდებას მოითხოვს. ამასთან დაკავშირებით განცხადება პრეზიდენტის ადმინისტრაციის ხელმძღვანელმა ანდრო ბარნოვმა გააკეთა.

"მინდა შევახსენო საზოგადოებას, რომ 6 ივნისს გავრცელდა ანონიმური ვიდეოკლიპი, სადაც თალიბანი ჩვენს მოსახლეობას ემუქრებოდა. ამ კლიპის პათოსი იყო მიმართული მიხეილ სააკაშვილის და " ნაციონალური მოძრაობის " პოლიტიკის დისკრეტიდაციისაკენ და მიზნად ისახადა პანიკის დათესვას, აგრესიის კულტივირებას, რაც ახალი მთავრობის ძალიან საყვარელი იარაღი გახდა პოლიტიკური ოპონენტების მიმართ" - აღნიშნა ანდრო ბარნოვმა.

პრეზიდენტის ადმინისტრაციის ხელმძღვანელის თქმით, შსს-მ სასწრაფოდ უნდა გამოიძიოს ამ კლიპის წარმომავლობა. მისივე თქმით, ნატო-ს გენერალურ მდივანს და პარტნიორ ქვეყნებს წერილით მიმართეს, რომ ახალ მთავრობას გამოძიებაში დახმარებოდნენ.

"ტექნიკურ მხარეს რაც შეეხება, შსს-მ მიიღო ეს დახმარება, თუმცა ისინი ამბობენ, რომ გამოძიებისთვის ხელჩასაჭიდი ვერაფერი მიიღეს. ამ ტიპის განცხადებების გარდა სამინისტროსგან არაფერი მოგვისმენია და იქმნება შთაბეჭდილება, რომ ღარიბაშვილი ყველანაირად ცდილობს მიჩქმალოს ეს საქმე. ჩვენ თავიდანვე გამოვთქვით ეჭვი, რომ აღნიშნული კლიპი დამზადებული იყო ხელისუფლებასთან დაახლოებული წრის მიერ, ან მათი დაკვეთით. შეგახსენებთ, მთავრობის კანცელარიის მაღალჩინოსნის, ყანდიაშვილის საქციელს, რომელიც ერთ-ერთი პირველი იყო, რომელმაც დაიწყო ამ კლიპების გავრცელება და დღემდე ვფიქრობ, რომ გამოძიება სწორედ იმიტომ არის უშედეგო. სინამდვილეში, სამინისტრომ ძალიან კარგად იცის ვინ იყო ამის დამკვეთი და შემსრულებელი. მივმართავ შს სამინისტროს, სასწრაფოდ მიიყვანონ კონკრეტულ შედეგამდე გამოძიება. დღესვე ოფიციალურად მივმართავ მინისტრს მოთხოვნით, მოგვაწოდოს დეტალური ინფორმაცია გამოძიების მიმდინარეობის შესახებ ", - განაცხადა ბარნოვმა.

"ინტერპრესნიუსი"