ავთანდილ ადუაშვილის ახლობლები მკვლელობაში დამნაშავედ სოსო პავლიაშვილს მიიჩნევენ

ავთანდილ ადუაშვილის ახლობლები ადუაშვილის მკვლელობაში დამნაშავედ სოსო პავლიაშვილს მიიჩნევენ, - ამის შესახებ მათ გუშინ საქალაქო სასამართლოსთან, პროცესის გადადების შემდეგ განაცხადეს.

ავთანდილ ადუაშვილის დედამ ჟურნალისტებს მისი ვაჟისა და სოსო პავლიაშვილის ბავშვობაში ერთად გადაღებული ფოტოებიც აჩვენა. "ეს არის ავთოსა და სოსოს სურათი, როცა ერთად იზრდებოდნენ იტალიურ ეზოში. გაზრდილმა კი მომიკლა შვილი", - განაცხადა გარდაცვლილის დედამ.

ლარისა ეფრემიძეს სასამართლო დღეს მოწმის სახით დაკითხავს. როგორც პროკურორმა ნინო აღლემაშვილმა განაცხადა, ეფრემიძე დღევანდელ პროცესზე მკვლელობის მოტივზე ისაუბრებს. პროკურორის თქმით, სოსო პავლიაშვილი, როგორც პერსონა, აღნიშნულ საქმეში ფიგურირებს.

"საქმის მტკიცებულებებით ჩნდება პავლიაშვილი, როგორც პერსონა საქმეში, თუმცა არა როგორც ბრალდებული, იმიტომ, რომ მტკიცებულებები პირდაპირ მასზე არ არის. არსებობს გარკვეული ინფორმაცია, რის გამოც არსებობს კავშირი. ამ კონკრეტულ შემთხვევაში ზუსტად არ შემიძლია გითხრათ - როგორი. მტკიცებულებების გამოკვლევა უკეთ აჩვენებს, რატომ გასდევს ლაიტმოტივად საქმეს სოსო პავლიაშვილის პიროვნება. მკვლელობის მოტივზე ეფრემიძის ჩვენება ჩვენ გვეუბნება მნიშვნელოვან ინფორმაციას. ახლა ამაზე არ მინდა ვისაუბრო. ხვალ მოისმენთ მის ჩვენებას", - აღნიშნა გუშინ პროკურორმა.

ავთანდილ ადუაშვილის მკვლელობის საქმეზე ნაფიცი მსაჯულების მონაწილეობით სასამართლო პროცესი თბილისის საქალაქო სასამართლოში გუშინ დაიწყო.

"ინტერპრესნიუსი"