24
მაისიდღის ზოგადი ასტროლოგიური პროგნოზი
ზაფხულის ამ ხვატში, ისინი, ვინც ქალაქიდან გასვლა სხვადასხვა მიზეზით ვერ მოახერხა, ლისის ან კუს ტბაზე, ასევე თბილისის ზღვაზე გრილდებიან. შაბათ-კვირას სანაპიროები დამსვენებლებით, მათ შორის, უცხოელი ტურისტებით ივსება. სუფთაა თუ არა წყალი ამ ადგილებში? საშიში ხომ არ არის ბანაობა? - ამ საკითხის გარკვევა ექსპერტებთან ვცადეთ.
მანანა გრძელიშვილი - სანიტარიისა და ჰიგიენის ინსტიტუტის მეცნიერ-თანამშრომელი: სეზონზე საბანაო წყლების კონტროლს გარემოს დაცვის სამინისტროს გარემოს დაბინძურების მონიტორინგის ლაბორატორია ახორციელებს. ჩვენ კვლევითი ორგანიზაცია ვართ, ამ მიმართულებით მხოლოდ 2006-07 წლების მონაცემები გვაქვს. მაშინ თბილისის ზღვაზე მიკრობული დაბინძურების კერა აღმოჩნდა, კუს ტბაზე კი - მიკრობული და პარაზიტული დაბინძურების.
თამარ მაღლაკელიძე, გარემოს ეროვნული სააგენტოს გარემოს დაბინძურების მონიტორინგის დეპარტამენტის უფროსის მოადგილე: როგორც კი საბანაო სეზონი დგება, მაისიდან სექტემბრამდე წყლის ხარისხს ვამოწმებთ. ბოლო სინჯები თბილისის ზღვაზე, ლისისა და კუს ტბებზე ივლისის ბოლოს ავიღეთ, გაკეთდა როგორც ქიმიური, ისე მიკრობიოლოგიური ანალიზი. ქიმიური ანალიზით 23 ინგრედიენტი განისაზღვრა, ყველა ნორმაშია, მხოლოდ ლისის ტბაზეა მომატებული ჰიდროკარბონატები, სულფატები და კალციუმი, რაც ამ ტბისთვის დამახასიათებელია და საგანგაშო არ არის. რაც შეეხება მიკრობიოლოგიას, კუს ტბასა და თბილისის ზღვაზე მაჩვენებლები ნორმაშია, ლისის ტბაზე კი ნორმაზე 1,3 ჯერ მეტი ე-ცოლი-ს ბაქტერია აღმოჩნდა, რაც წინა თვეში არ ყოფილა. ამის მიზეზი, შესაძლოა, ლისის ტბის ახლომდებარე საძოვრები იყოს.
ნინო ჩხობაძე, ექსპერტი, "მწვანეთა მოძრაობის" თანათავმჯდომარე: - საბანაო წყლების სტანდარტთან შესაბამისობის დადგენა სანიტარიული სამსახურის ფუნქციაა, რომელიც დღემდე გაუქმებულია. რაც შეეხება წყლის სისუფთავეს, ამ ტბებში ის მეტ-ნაკლებად ნორმალურია, თუმცა, ჩვენი ინფორმაციით, თბილისის ზღვაში მის ახლოს, პირველივე ზონაში ახალაშენებული ნაგებობების საკანალიზაციო წყლები ჩაედინება. ასევე პრობლემაა ნაპირზე დიდი რაოდენობით დაყრილი ნარჩენები.
ვიტალი ხარაშვილი, ინფექციონისტ-პედიატრი: - ზაფხულობით, ტემპერატურის მატებისას, წყლის მოცულობა იკლებს, მიკრობების რაოდენობა მატულობს და მისი დაბინძურების რისკი იზრდება, მით უმეტეს, თუ ამას სხვა ფაქტორებიც ემატება.. ე-ცოლი-ს ინდექსით სასმელი წყლის დაბინძურების ხარისხი იზომება; მისი მატებისას ნაწლავური ინფექციის კერა ჩნდება, წყლის დაბინძურება იწვევს ისეთ საშიშ ნაწლავურ დაავადებებს, როგორიცაა სალმონელოზი, ამებიაზი და სხვ.
ნინო კვიტაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
