"ცეკვავენ ვარსკვლავების" III სეზონი ბათუმში 22 აგვისტოს გაიხსნება

22 აგვისტოს, ბათუმში "სექტორ 26"-ში პროექტ "ცეკვავენ ვარსკვლავების" III სეზონის საზეიმო გახსნაა დაგეგმილი, რომელშიც I და II სეზონის კონკურსანტები მონაწილეობენ. როგორც ამბობენ, ბათუმში კონკურსანტებთან ერთად, სხვადასხვა სეზონის წამყვანებიც იქნებიან. ჩვენ მოდელ კრისტი ყიფშიძეს, I სეზონის ვარსკვლავს დავუკავშირდით:

- 22 აგვისტოს ბათუმში დავესწრები "ცეკვავენ ვარსკვლავების" III სეზონის საზეიმო გახსნას. ჩემთვის ამ პროექტში მონაწილება ცხოვრებაში რაღაც ახალი კარის გახსნას ნიშნავდა, რაშიც ჩემი მეწყვილე, ლევან ახვლედიანი დამეხმარა. ლევანი უძლიერესი მოცეკვავეა, ცეკვის საოცარი ტექნიკა აქვს. თუკი რამ ვისწავლე, ეს მისი დამსახურებაა. თავიდან სცენაზე პირველად რომ გამოვედი, ცოტა კი ვინერვიულე და დავიბენი. ვიფიქრე: აქ სად შევყავი თავი-მეთქი, მაგრამ მერე ყველაფერს ალღო ავუღე. იმ კონკურსანტებისგან გვანსხვავებით, ვინც I-ელ ტურში მონაწილეობდა, ბავშვობაში ცეკვაზე არასდროს მივლია. მათ კი ასე თუ ისე, ჰქონდათ კავშირი პროფესიონალურ ცეკვასთან, თუმცა მე ბუნებრივი უნარი აღმომაჩნდა, რომ კარგად მეცეკვა. ამიტომ, ბოლოს კი მეწყინა, პროექტის დატოვება რომ მომიხდა. ისე ცოტა უსამართოდაც დამატოვებინეს პროექტი, მეწყინა.

წელიწად-ნახევარი გავიდა მას შემდეგ და სადაც არ უნდა შევიდე, ვისაც არ უნდა დაველაპარაკო, ყველას ახსოვს, რომ "ცეკვავენ ვარსკვლავებში" ვმონაწილეობდი. მოკლედ, ხომ ვამბობ, ამ პროექტმა ცხოვრებაში რაღაც ახალი კარი გამიხსნა-მეთქი. უბრალოდ ის იყო, რომ ბავშვმა, ჩემმა ნატალიამ დამძაბა, იტირა, რადგანაც ძალიან ეწყინა, პროექტი რომ დავტოვე. ისე, "ცეკვავენ ვარსკვლავებს" ისე უნდა შეხედო, რომ ეს არის თამაში და გული არაფერზე არ უნდა დაგწყდეს.

ნუკი კოშკელიშვილი, ტელეწამყვანი, II სეზონის მონაწილე:

- ძალიან მაგარი პროექტია, რომელსაც ყველამ უნდა ვუგულშემატკივროთ. მან ჩემზე უზომოდ დიდი შთაბეჭდილება მოახდინა. 100-ჯერ რომ მიმიწვიონ ორგანიზატორებმა, 100-ვე დავთანხმდებოდი მასში მონაწილეობაზე. ამ პროექტმა საკუთარი თავი სრულიად სხვა კუთხით დამანახვა და ასევე განსხვავებული კუთხით წარვდექი მაყურებელის წინაშეც. საინტერესო, დაძაბული, სასიამოვნო ცხოვრება მქონდა, როდესაც "ცეკვავენ ვარსკვლავებში" ვმონაწილეობდი. მოკლედ, ექსტრემალურ ვითარებაში გამოვცადე საკუთარი თავი და მომეწონა. სამწუხაროდ, ჯერ ვერაფრით გავიგე, ვინ იქნებიან ახალი სეზონის მონაწილეები. კულუარულადაც ვერ შევძელი ამის გარკვევა, რადგანაც მკაცრად არის ყველაფერი გასაიდუმლოებული. მაგრამ როგორც არ უნდა იყოს საქმე, პროექტს ყველამ უნდა ვუყუროთ და ვუგულშემატკივროთ.

ლალი ფაცია

სპეციალურად ambebi.ge-სთვის

იხილეთ ბმული