25
მაისიდღის ზოგადი ასტროლოგიური პროგნოზი
საპარლამენტო უმრავლესობის ლიდერსა და "ქართული ოცნების" საპრეზიდენტო კანდიდატის საარჩევნო შტაბის უფროს დავით საგანელიძესთან ინტერვიუ ცენტრალური საარჩევნო კომისიის თავმჯდომარეობიდან ზურაბ ხარატიშვილის გადადგომის შეფასებით დავიწყეთ.
- ბატონო დავით, ელოდით ხარატიშვილის გადადგომას?
- ნამდვილად არ ველოდი. ხარატიშვილი საპარლამენტო არჩევნების შემდეგ რომ გადამდგარიყო, მიუხედავად იმ ტოტალური დარღვევებისა, რაც იმ არჩევნებზე ხდებოდა, მე მაინც ღირსეულ ადამიანად ჩავთვლიდი, მაგრამ ხომ ნახეთ, არსადაც არ წავიდა, ბოლომდე ითრია ფეხი, გამოეკიდა თავის სავარძელს. აქამდე მაგის გადადგომის არანაირი ნიშანწყალი არ ჩანდა, ახლა რა მოუვიდა, არ ვიცი. თან არანაირი ახსნა-განმარტება არ გააკეთა, თურმე რამდენიმე დღეში გვეტყვის მიზეზებს. თუ უკვე გადადგა, მიზეზების თქმას გადადება რად უნდა? ეს კიდევ უფრო მაეჭვებს. არ ვიცი, რას ხლართავს პრეზიდენტი და მისი პარტია, რა აქვთ ჩაფიქრებული.
- ფიქრობთ, რომ ეს "ნაციონალური მოძრაობის" თამაშია და საარჩევნო პროცესისთვის ხელის შეშლას ითვალისწინებს?
- შესაძლოა, მართლა რაღაც აქვთ ჩაფიქრებული. ისე, ხარატიშვილი ყოველთვის "ნაციონალური მოძრაობის" თამაშს თამაშობდა. მასზე დიდი გავლენა ჰქონდა სააკაშვილის პარტიას, სავარაუდოდ, ბევრი კომპრომატიც ექნებათ ხარატიშვილზე შეგროვილი.
- ბოლო ხანს თავად "ქართული ოცნების" შიგნითაც კი კრიტიკის ობიექტად იქეცით, მარტვილის რაიონში თქვენი ფიტულიც კი დაწვეს. განსაკუთრებული გამოხმაურება მოჰყვა თქვენს ამ განცხადებას:
"არ გამაკეთებინონ ის, რომ გავცეთ ბრძანება, ვთქვათ, რომ მოდი, არ შევიდეს სააკაშვილი რომელიმე რაიონში. მერე მიხვდება, როგორი თავისუფალი ველი აქვს სამოძრაოდ დღეს".
- პრობლემები ძირითადად რაიონებში საარჩევნო შტაბების დაკომპლექტებისას შეიქმნა - ვიღაცას შტაბის ხელმძღვანელი არ მოსწონდა, ვიღაცას თვითონ უნდოდა შტაბში ყოფნა, მოკლედ, სულ ეს იყო. დაწვეს ჩემი ფიტული, რა ვუყო მერე? ესეც დემოკრატიის ნაწილია, მაგრამ საბოლოოდ ყველამ უნდა გაიგოს, რომ პარტიაში არსებობს დისციპლინა და როდესაც მიღებულია გადაწყვეტილება, ამ გადაწყვეტილებას უნდა დაემორჩილონ. ესეც დემოკრატიის ნაწილია. რაც შეეხება იმ ჩემს ნათქვამს, რა დაინახეს აქ ანტიდემოკრატიული, ვერ გავიგე. ვთქვი და კიდევ გავიმეორებ, ყველა ის ბრალდება, რომელიც "ნაცმოძრაობიდან" მოდის, რომ თითქოს "ქართული ოცნების" წევრები უწყობენ აქციებს და უშლიან ხელს პრეზიდენტს აქეთ-იქით სიარულში, არის სიცრუე. როდესაც "ქართული ოცნების" წევრები იყვნენ ამაში შემჩნეული და ერთი ადამიანი პარტიიდან გავრიცხეთ, ორი კი თანამდებობიდან გავათავისუფლეთ. უკმაყოფილების ხმამაღლა გამოთქმას ვერავის ავუკრძალავთ, მაგრამ პოლიცია თავის საქმეს აკეთებს. "ქართულ ოცნებას" რომ უნდოდეს სააკაშვილის წინააღმდეგ აქციების გამართვა, აუცილებლად მოახერხებდა, თანაც ფართო მასშტაბით. ჩვენ რომ ამის ორგანიზება გავაკეთოთ, დამერწმუნეთ, ფეხს ვერ გადგამს საკუთარი სახლიდან. ამას რომ არ ვაკეთებთ, ამიტომ დადის ეს კაცი ასეთი თავგზაარეული.
- ამბობენ, რომ უმრავლესობის შიგნით ძალიან დაძაბული ურთიერთობა გაქვთ მაჟორიტარებთან. ბიძინა ივანიშვილისგან მათი გაკრიტიკების შემდეგ რამდენიმე მათგანისგან მოვისმინე, რომ ივანიშვილს მათზე ამბები მიუტანეთ.
- რას ჰქვია, ამბები მივუტანე, ეს შეურაცხმყოფელი ნათქვამია. მე არაფერი მითქვამს ბატონი ბიძინასთვის ისეთი, რაც ამა თუ იმ ფორმატში ამ ადამიანებისთვის პირადად არ მითქვამს. მაჟორიტართა ნაწილის უკმაყოფილება გამოიწვია სწორედ საარჩევნო შტაბების დაკომპლექტებამ. ზოგიერთ მათგანს უნდოდა, თავის რაიონში თვითონ ეხელმძღვანელა საარჩევნო შტაბისთვის, რასაც მე შევეწინააღმდეგე. დეპუტატს თავისი საქმეც ბევრი აქვს, თანაც შტაბის ხელმძღვანელობას კარგი მენეჯერი სჭირდება. დიახ, მე ველაპარაკე პრემიერს ამაზე და დავუსაბუთე, რომ არასწორი იყო მაჟორიტარების სურვილი და პრემიერიც დამეთანხმა. ისე, როგორც ვიცი, მაგათაც ჰქონდათ მცდელობა, თავიანთი პოზიცია აეხსნათ ბიძინა ივანიშვილისთვის. ვცდილობდი შტაბების შექმნისას კოალიციის ექვსივე სუბიექტის აზრი ყოფილიყო გათვალისწინებული, რაც ასევე არ მოსწონდათ იმ მაჟორიტარებს, რომელთაც თავიანთი კანდიდატურების გაყვანა სურდათ.
- როგორ შეაფასებთ ამერიკულ სამხედრო გემზე სტუმრობისას პრეზიდენტისა და პრემიერის წაკინკლავებას?
- ამის შეფასებისგან თავს შევიკავებ, სამწუხაროდ, მიხეილ სააკაშვილი თავის საქციელს ვეღარ ზომავს, მხოლოდ პროვოკაციებს, სიტუაციის დაძაბვასა და ქვეყნის რაღაც ახალ უბედურებაში ჩათრევას ცდილობს.
ნათია დოლიძე
ყოველკვირეული გაზეთი "ყველა სიახლე"
(გამოდის ოთხშაბათობით)
