შსს-მ აჭარაში ტრეფიკინგის ოთხი ფაქტი გამოავლინა

შინაგან საქმეთა სამინისტრომ აჭარაში ტრეფიკინგის ოთხი ფაქტი გამოავლინა. სამინისტროს ინფორმაციით, აჭარის მთავარი სამმართველოს დეტექტივების სამმართველოს თანამშრომლებმა, ჩატარებული საგამოძიებო ღონისძიებების შედეგად, უზბეკეთის მოქალაქე, 1984 წელს დაბადებული ნარგიზბეგიმ რახმანოვას მიერ აჭარაში ჩადენილი ტრეფიკინგის ოთხი ფაქტი გამოავლინეს. მას აღნიშნულ დანაშაულზე ბრალი დაუსწრებლად უკვე წაუყენეს.

მას ბრალი ედება 22 მაისს სოფელ ბეშუმთან მოკლული უზბეკეთის მოქალაქის, რაიხონ კ-ს მკვლელობის დაკვეთაშიც. ნარგიზბეგიმ რახმანოვამ საქართველო 31 მაისს დატოვა.

გამოძიების ინფორმაციით, გამოძიებამ დაადგინა, რომ ნარგიზბეგიმ რახმანოვა საქართველოში 2012 წელს ჩამოვიდა. მან 2012-2013 წლებში ბათუმში უზბეკეთის 5 მოქალაქე, მათ შორის მოკლული რაიხონ კ, პროსტიტუციაში მოტყუებით და იძულებით ჩააბა. უზბეკეთიდან ჩამოსულ ქალბატონებს ის პირადობის დამადასტურებელ დოკუმენტაციას ართმევდა და ბათუმის სასტუმროებსა და ღამის კლუბებში ამუშავებდა.

გამოძიება დამამძიმებელ გარემოებაში ჩადენილი განზრახ მკვლელობის და ტრეფიკინგის ფაქტზე მიმდინარეობს.

ნარგიზბეგიმ რახმანოვას მიერ ჩადენილ დანაშაულებთან დაკავშირებით უზბეკ სამართალდამცველებთან აქტიური თანამშრომლობა მიმდინარეობს.

"ინტერპრესნიუსი"