"ბატონო ბიძინა, თქვენ გღალატობენ!"

მოძრაობა "ეროვნულების" ლიდერი სანდრო ბრეგაძე "ქართული ოცნების" პოლიტიკურ შეცდომებზე საჯაროდ ლაპარაკობს. ფიქრობს, რომ სიტუაციის აფეთქებამდე ცოტა დრო დარჩა და ბიძინა ივანიშვილს სთხოვს, არ დაუშვას "ნაციონალური მოძრაობის" რევანში.

- ის, რომ სამართალი ვერ აღსრულდა, ისევ გვყავს ბევრი დაუსაქმებელი, "ქართულ ოცნებას" კი უჭირს დაპირებების შესრულება, ქვეყნის განვითარებისთვის საფრთხეს ქმნის. ვფიქრობ, სიტუაცია იქამდე მივა, რომ "ნაციონალური მოძრაობა" კუდს ცუდად მოიქნევს. ვთხოვ ბატონ ბიძინას, არ დაუშვას ამ პოლიტიკური ძალის რევანში! ვიცი, ამ ინტერვიუს შემდეგ პრემიერ-მინისტრის გარემოცვის მოღალატე წარმომადგენლები კონტექსტიდან ამოღებულ ფრაზებს მიუტანენ ივანიშვილს, ნახე, ბრეგაძე ჩვენზე რას ამბობსო.…არავინ ეტყვის, ამ ყველაფერზე როგორც გულშემატკივარი რომ ვლაპარაკობ.

- თქვენი კრიტიკული მოსაზრებები ხელისუფლებისადმი სულ უფრო მწვავე გახდა.

- სხვაგვარად როგორ უნდა შევხვდე კუბლაშვილის სასამართლოსგან ახალაიას გამართლებას? ეს ქართველი ერის დაცინვაა. პროკურატურამ მოიკოჭლა, მაგრამ მის წარმოდგენილ ეპიზოდებშიც კი საკმარისი ბრალდებები იყო, რომ სასამართლოს ახალაია არ გაემართლებინა. მაგრამ რა ვილაპარაკო, როცა რესპუბლიკელების ლიდერი აცხადებს, "ნაციონალური მოძრაობის" გადარჩენა ქართული დემოკრატიის გარანტიააო, ეს მოღალატეობრივ პოლიტიკაზე მიუთითებს. უკაცრავად, მაგრამ "ქართული ოცნების" დაპირება "ნაცმოძრაობის" პოლიტიკური დასამარება იყო და არა მისი გადარჩენა. გამოდის, ხალხი მოატყუეს?

ამიტომ ბატონ ბიძინას მივმართავ, - კარგად დააკვირდით საკუთარ გარემოცვას, იქნებ მასში მოღალატეებიც დაინახოთ! "ქართული ოცნების" სახელით საკრებულოს თავმჯდომარედ ირაკლი შიხიაშვილის დამტკიცება ნამდვილი კატასტროფა იყო. რა თქმა უნდა, პრემიერ-მინისტრს არ უთხრეს, ვინ არის შიხიაშვილი. არსებობს 27 მაისის თბილისის საკრებულოს სხდომის აუდიოჩანაწერი, სადაც შიხიაშვილი აცხადებს, რომ 26 მაისის მიტინგის დარბევა დადებითი მოვლენა იყო. ის მიესალმა ოპოზიციის წევრების მკვლელობას და მომიტინგეების დარბევას. ასევე, 7 ნოემბერს მიტინგის დარბევის შემდეგ რუსთაველის სისხლიან პროსპექტზე ზაზა ბეგაშვილმა საზეიმო მსვლელობა რომ მოაწყო, ამის ამსახველ ვიდეოფირშიც ჩანს, რომ მას მხარს უმშვენებენ ირაკლი შიხიაშვილი და ნიკო ხაჩირიშვილი, რომლებსაც ახლა "ქართული ოცნება" უჭერს მხარს.

შიხიაშვილი თბილისის საკრებულოში გია უდესიანის კვოტით მოხვდა, რომელიც ბაჩანა ახალაიაზე არანაკლები ჯალათი იყო. ის თავადაც ზონდერი იყო და მონაწილეობდა ცემა-ტყეპასა და გატაცებაშიც კი. ნუთუ ხალხმა ასეთი ადამიანების დაწინაურებისთვის იბრძოლა?!

იხილეთ ინტერვიუს სრული ვერსია