მოსკოვი და თეირანი ახალი ატომური ელექტროსადგურს აშენებას გეგმავენ

თეირანი და მოსკოვი უახლოეს მომავალში ხელს მოაწერენ შეთანხმებას ირანში ახალი ატომური ელექტროსადგურის მშენებლობის შესახებ. ამის შესახებ ჟურნალისტებს ირანის საგარეო საქმეთა მინისტრმა ალი აკბარ სალეჰმა განუცხადა. დოკუმენტის შინაარსზე და ხელმოწერის სავარაუდო თარიღზე ინფორმაცია არ ვრცელდება. ამ საკითხზე, რუსული მხარე ჯერჯერობით კომენტარს არ აკეთებს.

რუსეთის სახელმწიფო დუმის სპიკერმა, სერგეი ნარიშკინმა განაცხადა, რომ რუსეთი დაინტერესებულია ირანთან სამომავლო ბირთვული თანამშრომლობით. ნარიშკინის თქმით, ბუშერის ატომური სადგურის ექსპლუატაციაში გაშვების შემდეგ, ეს თანამშრომლობა არ დასრულდება.

ბუშერის ატომური ელექტროსადგურის მშენებლობა 1975 წელს დასავლეთ გერმანელმა სპეციალისტებმა დაიწყეს. თუმცა, 4 წლის შემდეგ სადგურის მშენებლობა ისლამური რესპუბლიკის წინააღმდეგ დაწესებული აშშ-ის სანქციების გამო შეწყდა. ატომურ სადგურზე მუშაობა 1995 წელს განახლდა. ამასთან, გერმანელების ნაცვლად მის მშენებლობაში რუსები ჩაერთვნენ.

სამუშაოების ძირითადი ნაწილი 2010 წელს დასრულდა, ხოლო 2013 წლის სექტემბერში დაგეგმილია ობიექტის ექსპლუატაციაში გაშვება.

მომზადებულია mehrnews.com-ის მიხედვით.