22
ივნისიდღის ზოგადი ასტროლოგიური პროგნოზი
ყოფილი პარლამენტარი დიმიტრი ლორთქიფანიძე 2008 წლის რუსეთ-საქართველოს ომთან დაკავშირებით შექმნილი საპარლამენტო კომისიის საიდუმლო მასალების გასაჯაროების საჭიროებას ხედავს. ლორთქიფანიძე, რომელიც რუსეთის ფედერაციის მხრიდან საქართველოს ტერიტორიული მთლიანობის ხელყოფის მიზნით განხორციელებული სამხედრო აგრესიისა და სხვა ქმედებების შემსწავლელი დროებით საპარლამენტო კომისიის წევრი იყო, მიიჩნევს, რომ დაინტერესებული პირებისთვის ხელმისაწვდომი უნდა გახდეს უმაღლესი პოლიტიკურ თანამდებობის პირებთა საუბრის ამსახველი სტენოგრამები და ვიდეომასალა. როგორც მან "ინტერპრესნიუსს" განუცხადა, მას შემდეგ, რაც პრეზიდენტმა სააკაშვილმა ომის დაწყების გარემოებებთან დაკავშირებით მთელი რიგი განცხადებები გააკეთა, თავს ვალდებულად თვლის, ახალ ხელისუფლებას იმ საიდუმლოდ ცნობილი მასალების გასაჯაროება მოსთხოვოს, რომელიც კომისიის მუშაობის შედეგად შეიქმნა.
"კომისიის სხდომაზე ძალიან ბევრი კითხვა დაისვა და გაეცა პასუხი - ზოგადი პასუხები. ამის შემდეგ გარკვეულ კითხვებთან დაკავშირებით ხდებოდა საკითხის კონკრეტიზაცია და ამ კონკრეტიზაციის შედეგად ვიღებდით პასუხებს, რომელიც ხშირ შემთხვევაში, გამოსაკითხი მხარისა და კომისიის უმრავლესობის გადაწყვეტილებით, დახურულ რეჟიმში გადადიოდა. კომისიის მუშაობის ძალიან დიდი ნაწილი - მისი 1/3 გასაიდუმლოებულია. მათ შორის პირადად ჩემს მიერ სააკაშვილის, მერაბიშვილის, უგულავას, კახა ლომაიას მიმართ დასმული კითხვები საიდუმლო რეჟიმშია გადაყვანილი და უფლება არ მაქვს მიღებულ პასუხებთან დაკავშირებით მიგანიშნოთ ან რაიმე ინფორმაცია მოგაწოდოთ, მაგრამ თავს უფლებას მივცემ და კითხვის ფორმიდან გამომდინარე გეტყვით, რომ ჩემთვის ძალიან მნიშვნელოვანი იყო კითხვაზე პასუხი, თუ რატომ იქნა მიტოვებული ქალაქი გორი, რატომ დარჩა გორი დაუცველი, რატომ აღიმართა ბოლო ზღუდე მცხეთაში და არა - გორში. ამ კითხვაზე პასუხი გასაიდუმლოებულია და თუკი ეს რეჟიმი იქნება ახსნილი, თქვენ ვანო მერაბიშვილის პასუხს მოისმენთ. პარლამენტში ხდებოდა კომისიის მთელი სამუშაო პროცესის სტენოგრამირება - როგორც არასაიდუმლო, ასევე საიდუმლო ნაწილის. გარდა იმისა, რომ სხდომები პირდაპირ ეთერში ტრანსლირდებოდა, პარლამენტის საორგანიზაციო დეპარტამენტის ძალებით ხორციელდებოდა ვიდეო-ჩანაწერების გაკეთება. მთელი ეს ინფორმაცია, რომელიც დეტალურად ასახავს კომისიის მუშაობას პროცესებს, საჯარო უნდა გახდეს" - განუცხადა "ინტერპრესნიუსს" დიმიტრი ლორთქიფანიძემ.
გარდა ამისა, ყოფილი დეპუტატი კომისიის მუშაობის ამსახველ არასაიდუმლო ნაწილსა და მის მიერ მომზადებულ დასკვნასაც კითხულობს და როგორც აცხადებს, გაუგებარია, რატომ აღარ არის ეს მასალები პარლამენტის ოფიციალურ ვებგვერდზე გამოქვეყნებული. შესაბამისი კითხვით ლორთქიფანიძე პარლამენტის თავმჯდომარეს, დავით უსუფაშვილს მიმართავს.
"კომისიის დოკუმენტაციის არასაიდუმლო ნაწილი კარგა ხნის განმავლობაში პარლამენტის ვებგვერდზე იყო განთავსებული. დღეს აღნიშნულ საიტზე მისი მოძიება შეუძლებელია. მაქვს კითხვა ბატონ დავით უსუფაშვილთან, რა არის მიზეზი იმისა, რომ პარლამენტის განახლებულ ვებგვერდზე კომისიის მუშაობის შედეგები და ინფორმაცია განთავსებული არ არის?" - აცხადებს ლორთქიფანიძე.
ცნობისთვის, საპარლამენტო კომისიას, რომელსაც პარლამენტის მაშინდელი ვიცე-სპიკერი პაატა დავითაია ხელმძღვანელობდა, 22-მა მაღალი სამოქალაქო და სამხედრო თანამდებობის პირმა უპასუხა.
