ქართველებისთვის რევოლუციური ეგვიპტე დასასვენებლად საუკეთესო ადგილი აღმოჩნდა

ზაფხულში ყველა თავისებურად ისვენებს... ქართველების უმრავლესობამ წელს ეგვიპტეში დასვენება არჩია, მიუხედავად იმისა, რომ იქ არც ისე სახარბიელო სიტუაციაა. დიახ, რევოლუციურ ეგვიპტეს მიაშურა პარფიუმერული კომპანიის პიარსამსახურის ხელმძღვანელმა, ხატია შამუგიამ, შეიძლება ითქვას, რომ ექსტრემალურ პირობებში მოუხდა დასვენება და სულაც არ ნანობს, რომ ასეთ დროს ეგვიპტეში გამგზავრება და კუთვნილი შვებულების გატარება გარისკა.

- ხატია, მოკლედ, ეგვიპტურ რევოლუციას გადაურჩი?

- მე ეგვიპტეში ტურისტი გახლდით და ჩემი უსაფრთხოება სერიოზულად იყო დაცული, რადგანაც იმ დღეებში პოლიცია გაძლიერებულად მუშაობდა.

- მაინც რამ გადაგაწყვეტინა ეგვიპტეში ისეთ რთულ პერიოდში წასვლა?

- ბოლო წუთამდე ვფიქრობდი, წავსულიყავი თუ არა, მაგრამ ვინაიდან ჩემთან ერთად, ტურისტული კომპანიის ხელმძღვანელი (ჩემი მეგობარია) თავისი სამი შვილით მოდიოდა, ამის გამო რაღაც დაცულად ვიგრძენი თავი და გამგზავრება გადავწყვიტე. ისე, პანიკა აქ უფრო იყო, ვიდრე იქ. დამიჯერეთ, იმ ქვეყანაში თუ რაიმე რევოლუციური ძვრები მიმდინარეობდა, მსგავსი არაფერი მიგრძვნია... უკეთეს ადგილზეც და უფრო ძვირად ღირებულ კურორტზეც ვყოფილვარ, მაგრამ იმ ფასად, რაც ამჯერად ეგვიპტეში დასვენებაში გადავიხადე, იმაზე უკეთ დავისვენე. ეს ფასი აჭარაში დასვენებაზე ხელმისაწვდომია, აჭარა მსგავს კი არა, უარეს პირობებში გაცილებით ძვირი ჯდება.

- როგორც ვიცი, ეგვიპტეში შვილთან ერთად იყავი.

- დიახ და ნიკუშამაც შესანიშნავად იხალისა. მშვენივრად ერთობოდა სასტუმროს აკვაპარკში, აუზში.

- კი, მაგრამ ეგვიპტეში არეულობის გამო, ტურისტებს გარკვეული შეზღუდვები გქონდათ და ქვეყნის სრულყოფილი დათვალიერება ვერ შეძელი...

- კი იყო შეზღუდვები და ვერ ვნახე პირამიდები, ალექსანდრია, ლუქსორი, კაიროს ღირსშესანიშნაობები და ასეთი შანსი ხელიდან გავუშვი, მაგრამ ჯერ კიდევ ყველაფერი წინ არის, ეგვიპტეს კიდევ მოვინახულებ და მაშინ შევძლებ ამ ყველაფრის დათვალიერებას. ისე, ერთი კი მაინც მოვახერხეთ, სასტუმროს ტერიტორია ერთხელ დავტოვე და იახტით ულამაზესი კუნძულები დავათვალიერეთ... მოკლედ, წელს ცუდად ნამდვილად არ დამისვენია, ის კი არა, ის დღეები უკვე მენატრება...

მარტოხელა დედამ, ტელე-რადიოწამყვანმა თამუნა მუსერიძემაც ეგვიპტე აირჩია დასასვენებელ ადგილად და სწორედ გუშინ დაბრუნდა საქართველოში შვილთან და დაქალთან ერთად...

იმის გამო, რომ წლევანდელი ეგვიპტის მძიმე პოლიტიკური ვითარება ტურისტებისთვის მაინცდამაინც ფრთების გაშლის საშუალება არ იძლევა, დამსვენებლებს მხოლოდ იმ სასტუმროს ტერიტორიაზე უწევთ ყოფნა, სადაც არიან დაბინავებულები. ამიტომ როგორც თამუნა ამბობს, პირამიდების ნახვა ვერც მან შეძლო, თუმცა შვილთან ერთად მშვენივრად დაისვენა...

თამუნა მუსერიძე:

- ეგვიპტეში, როგორც ჩანს, ჯერ ვერ "დალაგდნენ," ამიტომ სასტუმროს გარეთ არ გვიშვებდნენ. მაგრამ რაც შეეხება გართობას, უზარმაზარი კომპლექსია, სადაც მე და ჩემი შვილი მშვენივრად ვხალისობდით. ისე იყო ყველაფერი მოწყობილი, რომ თავი პატარა ქალაქში გვეგონა. თან, ჩემი შვილის, სანდროს დაბადების დღემ იქ მოუწია და 4 წლის იუბილე იქ აღვუნიშნე.

- რა გვარია სანდრო?

- მაკალათია.

- ე.ი. ბავშვი მამის (ჯგუფ "ბანდეროლის" დრამერი - გურამ (გუფი) მაკალათია) გვარზეა?

- კი, გვარი რომ გაჩნდა, მამამისმა მაშინვე მისცა.

- ხელი მოწერილი გქონდათ?

- დიახ და ოფიციალურად შარშან განვქორწინდით. ის კი არა, ბავშვი რომ გავაჩინე, სამშობიაროში მეგობრებთან ერთად მოვიდა, ახალშობილი რომ ენახა, არადა, იმ პერიოდისთვის უკვე დაშორებულები ვიყავით. მოკლედ, ის სანდროს დაბადებას მოუთმენლად ელოდებოდა...

- ახლა ბავშვს თუ აქცევს ყურადღებას? მატერიალურად ეხმარება?

- მიუხედავად იმისა, რომ სანდროს რამდენიმე თვის წინ ნახევარდა გაუჩნდა, ყურადღებას აქცევს. მამის მზრუნველობა რომ არ მოაკლდეს, გუროს თავისთან მიჰყავს ბავშვი და იტოვებს კიდეც.

- ვის ჰგავს სანდრო?

- მამის ასლია...

ლალი ფაცია

სპეციალურად ambebi.ge-სთვის