ბრიტანულმა მედიაკორპორაცია BBC-მ პრინც უილიამს გადაცემა BBC Breakfast-ის ეთერში მისი შეურაცხმყოფელი გამოსახულების გამოჩენისთვის ბოდიში მოუხადა. ამის შესახებ The Guardian იტყობინება.
ტელეარხ BBC1-ის დილის გადაცემაში რამდენიმე წამის განმავლობაში ჩანდა პრინც უილიამის ფოტო, რომელზეც პრინცს შუბლზე ფლომასტერით პენისი ჰქონდა მიხატული. ფოტოს გამოჩენა მაყურებლებმა სოციალურ ქსელ "ტვიტერში" გააპროტესტეს. ინციდენტი 1 აგვისტოს დილას მოხდა.
პრინცი უილიამის კადრი კომედიური კვარტეტის Barbershopera-ს პრომორგოლში მოხვდა. რგოლის - "ქეითზე ვიქორწინებდი" გმირები პრინც უილიამის მეუღლეს ქეით მიდლტონს სიყვარულს უხსნიან. პრომორგოლი BBC Breakfast -ის ეთერში Barbershopera-ს ინტერვიუს გაშვებამდე გავიდა.
მედიაკორპორაცია BBC-ის წარმომადგენლებმა განაცხადეს, რომ რგოლი Barbershopera-ს მიერ იყო მომზადებული და პრინცის შეურაცხმყოფელი გამოსახულება რგოლის ეთერში მოხვედრამდე მათ ვერ შენიშნეს.
ტელეარხი BBC1 ტელერადიოკომპანია BBC-ის მთავარი არხია დიდ ბრიტანეთში. მან მაუწყებლობა 1936 წელს დაიწყო. მისი აუდიტორია ბრიტანელი მაყურებლის 20% შეადგენს.
მომზადებულია The Guardian-ის მიხედვით.
