ჯგუფმა "ქუჩის ბიჭები" 20 წლის იუბილე 1 აგვისტოს, ბათუმში, "პიაცაზე" სოლო კონცერტით აღნიშნა. როგორც ჯგუფის წევრები ამბობენ, უზომოდ კმაყოფილები არიან - შეასრულეს 20 კომპოზიცია, მუსიკოსები სცენაზე დაახლოებით 2 საათის განმავლობაში იდგნენ.
გურამ ლომიძე:
- ჩვენს კონცერტს უამრავი ადამიანი დაესწრო - ჩვენი გულშემატკივრები და ფანები... უამრავი ბილეთი გაიყიდა და ხალხი კონცერტით კმაყოფილი დარჩა. ცოტა ხანში, საქართველოს მასშტაბით ტურნეს დავიწყებთ და კონცერტებს ყველაგან გავმართავთ.
- გუშინდელი განცდა ჰგავდა თუ არა 20 წლის წინდანდელს, როდესაც პირველად სცენაზე ახვედით?
- ოცი წლის წინ პირველად ავდიოდით სცენაზე და სხვანაირი მღელვარება გვქონდა, - არ ვიცოდით, რა იქნებოდა მერე... გუშინ კი სცენაზე დგომა უდიდესი პასუხისმგებლობა იყო.
- ცნობილია, რომ კონცერტზე მიხეილ სააკაშვილიც გესტუმრათ...
- კი და პირადად მე ძალიან გამიხარდა. მივედი და მივესალმე. მის სტუმრობას არ გავუოცებივარ, პირიქით. ისიც გამიხარდა, რომ ის საათ-ნახევრის მანძილზე "ქუჩის ბიჭების" კონცერტს ესწრებოდა...
- ჯგუფის წევრებიდან ყველას შენსავით გაუხარდა პრეზიდენტის სტუმრობა?
- არ ვიცი, მე ჩემს განცდების შესახებ გითხარით. ჩემთვის მის სტუმრობას არანაირი პრობლემა არ შეუქმნია. მე მიყვარს ჩვენი პრეზიდენტი!
- ტაშს თუ გიკრავდათ?
- ეგ არ დამინახავს, მთელი კონცერტის მანძილზე ჩემს ფანებს, თაყვანისმცემელ გოგოებს ვუყურებდი თვალებში. მოკლედ, გოგოებით ვიყავი გართული...
ლალი ფაცია
