21
მაისიდღის ზოგადი ასტროლოგიური პროგნოზი
თანამედროვე საქართველოში ძალიან ბევრი ოჯახი შექმნილა "სკაიპისა" თუ სოციალური ქსელების ჩარევით, თუმცა დამოკიდებულება ინტერნეტით შექმნილი ოჯახების მიმართ განსხვავებულია. ბევრს ვერ წარმოუდგენია, როგორ უნდა აირჩიოს ინტერნეტით გაცნობილი ადამიანი ცხოვრების თანამგზავრად, ბევრი კი ამ შესაძლებლობას სულაც არ გამორიცხავს. დღეს რამდენიმე ადამიანის მონათხრობს შემოგთავაზებთ, ოღონდ მარტო ბედნიერ დასასრულზე არ ვისაუბრებთ, სამწუხარო ფაქტებზეც მოგიყვებით, რომლებიც ზოგიერთისთვის ერთგვარი გაფრთხილებაც შეიძლება გახდეს:
დათო - 25 წლის:
- მე თვითონ ინტერნეტით არავინ შემყვარებია, თუმცა მყავს რამდენიმე ნაცნობი, რომლებმაც ოჯახი ასე შექმნეს. ერთმა ინტერნეტით გაცნობილი ქუთაისელი გოგონა მოიყვანა ცოლად, ახლა ორი შვილი ჰყავთ და მშვენიერი ოჯახი აქვთ. თუმცა, სამწუხარო ფაქტებიც ხდება: მაგალითად, ჩემი ძმაკაცი სიყვარულს ეფიცებოდა "სკაიპით" გაცნობილ გოგონას, რომელიც სინამდვილეში მისი შეყვარებული აღმოჩნდა. რა თქმა უნდა, ეწყინა, რომ შეყვარებულმა ასეთი გამოცდა მოუწყო, მაგრად იჩხუბეს და ერთმანეთს დაშორდნენ. კიდევ ერთი შემთხვევის შესახებ მოგიყვებით: ჩემმა მეგობარმა ინტერნეტით გაიცნო ქალი, რომელმაც უეცრად მოხიბლა. ამ ქალს თავისი ფოტოს ნაცვლად ზოგადი ფოტო ჰქონდა დადებული, ასაკზეც არასოდეს უსაუბრიათ. როცა გადაწყვიტეს ერთმანეთს შეხვედროდნენ, აღმოჩნდა, რომ ჩვენი "რომეო" თვეების განმავლობაში ბებიის ტოლ ქალს ეფლირტავებოდა.
ინგა - 29 წლის:
- ინტერნეტით გაცნობილ ადამიანს არ უნდა ენდო - ამას ჩემი გამოცდილებიდან გამომდინარე გეუბნებით! გერმანული ენის სპეციალისტი ვარ. ჩემი უცნაური მეუღლე ინტერნეტით გავიცანი. საქართველოში ჩამოვიდა, რამდენჯერმე შევხვდით და მოულოდნელად გამომიცხადა, რომ ჩემზე დაქორწინება სურდა. ეს ამბავი მთელმა ჩემმა სანათესაომ გაიგო, პატარა ქორწილიც გადაგვიხადეს და ერთი თვე ერთად გავატარეთ. გერმანიაში წასვლამდე დამპირდა, როგორც კი ჩავალ, ვიზას გამოგიგზავნიო, მაგრამ დაიკარგა, არც ის გამოჩენილა და არც მისი ვიზა.
სოფო - 29 წლის:
- ჩემს კარგ ნაცნობებზე უნდა გიამბოთ: 17 წელი ერთად ცხოვრობდნენ, ყველას ეგონა, რომ ნორმალური ურთიერთობა ჰქონდათ, მაგრამ ცოლმა ინტერნეტით ვიღაც გაიცნო, სულ კომპიუტერთან უნდოდა ყოფნა. ოჯახის წევრები დაეჭვდნენ და ისეთი მესიჯები აღმოუჩინეს, აშკარა იყო, რომ მეუღლეს ღალატობდა. ეს ქალიც იძულებული გახდა, რომ ოჯახი მიეტოვებინა, ახლა შეიძლება ძალიან ნანობს, მაგრამ უკვე გვიანია. სხვათა შორის, მისმა ახლობლებმა დღესაც არ იციან, მართლა ღალატობდა ქმარს თუ ვირტუალურად. პირდაპირ სასაცილოა, სატირალი რომ არ იყოს: ჯერ ვირტუალური სიყვარული რა არის და ახლა ვირტუალური სექსის გამო რომ დაანგრევს ნორმალური ქალი ამდენი წლის ნალოლიავებ ოჯახს.
ხათუნა ჩიგოგიძე
ყოველკვირეული გაზეთი "ყველა სიახლე"
(გამოდის ოთხშაბათობით)
