"ქუჩის ბიჭები" შოუბიზნესის აღორძინებას აპირებენ

რამდენიმე წლის წინ "ქუჩის ბიჭები" ერთ-ერთი ყველაზე პოპულარული ჯგუფი იყო ქართულ შოუბიზნესში. ოთხი ახალგაზრდა სიმპათიური მამაკაცი განსაკუთრებით თინეიჯერ გოგონებს მოსწონდათ და მათთან ერთად ფოტოს გადასაღებად ათასნაირ ხერხს მიმართავდნენ. მერე "ქუჩის ბიჭები" დაიშალა. ჯგუფის ერთ-ერთი წევრი ბედის საძიებლად ამერიკაში გაემგზავრა, მეორემ - პოლიტიკაში სცადა ბედი, ფეხბურთის ბიზნესშიც ჩაერთო... ახლა ბიჭებმა გადაწყვიტეს, კვლავ შეიკრიბონ და მსმენელი გაახარონ. ამჯერად სიმღერა თაყვანისმცემელთან, ანი ღონღაძესთან ერთად ჩაწერეს და სულ მალე მაყურებელი ამ სიმღერაზე გადაღებულ კლიპსაც იხილავს. ამ და სხვა ბევრ საინტერესო თემაზე ჩვენ ანისთან, პაატა ხაჩიძესა და გურამ ლომიძესთან ვისაუბრეთ.

- როგორც ვიცი, შარშანაც გქონდათ ჯგუფის აღდგენის მცდელობა, მაგრამ ეს მხოლოდ რამდენიმე სიმღერის ჩაწერით შემოიფარგლა...

გურამი:

- შარშან ამერიკიდან მხოლოდ ერთი თვით ჩამოვედი და ჩვენი ერთად ყოფნა ამიტომაც არ იყო ხანგრძლივი. მერე ზამთარშიც ჩამოვედი და სწორედ მაშინ დავაწყვეთ სამომავლო გეგმები. ჩვენი მიზანია, საქართველოში შოუბიზნესი "ავწიოთ" იმ დონემდე, რომ კონცერტები ჩატარდეს, ხალხი ბილეთებს ყიდულობდეს და ქართველ შემსრულებლებს უსმენდეს...

- ე.ი. ქართულმა შოუბიზნესმა იმიტომ "მიიძინა", რომ "ქუჩის ბიჭები" დაიშალა? ამ ჯგუფის აღდგენა ქართულ შოუბიზნესსაც აღადგენს? ეს ცოტა არ იყოს, ხმამაღალი განაცხადი ხომ არ არის?

- კარგად გაიხსენეთ, ომის შემდგომ პერიოდში გამოჩნდა ჯგუფი "სახე", რომელიც 3 წელი არსებობდა. სწორედ ამ ჯგუფმა დაიწყო შოუბიზნესის აღორძინება საქართველოში და მათ მიერ დაწყებული გზა "ქუჩის ბიჭებმა" გააგრძელა. მერე გამოჩნდნენ სხვა ჯგუფები თუ მომღერლები. ახლაც ასე იქნება...

პაატა:

- არ მინდა, ამბიციური განაცხადი გამომივიდეს, მაგრამ მაშინ ისეთი პოპულარულები ვიყავით, რომ ყველა ჟურნალ-გაზეთში ჩვენზე წერდნენ. მერე კი "ქუჩის ბიჭები" აღარავის სჭირდებოდა - ჩვენი ქვეყნისთვის უფრო მნიშვნელოვანი პოლიტიკა და პოლიტიკოსები გახდნენ.

გურამი:

- შოუბიზნესი საქართველოში იმიტომ არ არსებობს, რომ ზოგ-ზოგიერთები პოლიტიკოსების დაკვეთით მართავდნენ უფასო კონცერტებს, ამას ხალხი მიეჩვია და ფასიან კონცერტზე წასვლა, ბილეთის ყიდვა აღარავის სურდა; დისკების გაყიდვაზე ლაპარაკიც ზედმეტია... ისე, "ქუჩის ბიჭები" არასოდეს დაშლილა: ამ ხანგრძლივი პაუზის დროსაც არაერთი სიმღერა ჩავწერეთ.

- ახლა კიდევ ერთი ახალი სიმღერა ჩაწერეთ და კლიპიც გადაიღეთ. ეს დუეტია და მას საზოგადოებისთვის უცნობ გოგონასთან ერთად ასრულებთ...

- ანი "ახალ ხმაში" მონაწილეობდა. ის დათო ფორჩხიძის გუნდში იყო. სამწუხაროდ, ფინალში ვერ გადავიდა, მაგრამ მიმაჩნია, რომ ძალიან ნიჭიერია. ანი ზურა ხაჩიძემ გაგვაცნო. ძალიან უნდოდა, ჩვენთან დუეტი ჩაეწერა და ეს სურვილი ავუსრულეთ. დათო ფორჩხიძეს გული ეტკინა, ანის ჩვენ რომ ვუყვარვართ.

ანი:

- რატომ, დათოც ძალიან მიყვარს. "ქუჩის ბიჭები" ბავშვობიდან მომწონს. მიმაჩნია, რომ ერთ-ერთი ყველაზე წარმატებული ჯგუფია. "ახალ ხმაში" რომ ვმონაწილეობდი, ზურა გარკვეულ რჩევებს მაძლევდა, პროექტის დამთავრების შემდეგ კი ჯგუფის დანარჩენ წევრებსაც შევხვდი.

- თქვენი აზრით, ეს დუეტი წარმატებული იქნება?

გურამი:

- აუცილებლად. სიმღერის ავტორი პაატა ფარცვანიაა; ტექსტი ჯგუფის წევრებმა ერთობლივად დავწერეთ, ხოლო კლიპზე "ახალი ხმის" მონაწილემ, თორნიკე გულაშვილმა იმუშავა.

პაატა:

- ჩვენს კლიპს მაყურებელი სექტემბრის ბოლოს შეაფასებს.

- საქართველოში მუსიკალური არხების სიმცირის გამო, კლიპის მაყურებლამდე მიტანა ცოტა არ იყოს, რთულია...

გურამი:

- რატომ? არაერთი მუსიკალური არხი არსებობს, რომელსაც თავისი მაყურებელი ჰყავს.

პაატა:

- როგორც ვიცი, კიდევ ერთი მუსიკალური არხი დაარსდება. კარგი იქნება, თუ გაკეთდება მუსიკალური ათეულები, სადაც აჩვენებენ ვიდეორგოლებს. ამით კონკურენცია უფრო გაიზრდება და მსმენელს ყველა მომღერალი გაცილებით კარგ პროდუქციას შესთავაზებს...

- ანი, ორიოდე სიტყვით შენზეც გვიამბე...

- მუსიკალური შვიდწლედი მაქვს დამთავრებული. ამჟამად თეატრალურ უნივერსიტეტში, ხელოვნებათმცოდნეობის ფაკულტეტზე ვსწავლობ, მეოთხე კურსზე გადავედი... კონკურსები არ მიყვარს და რომელიმე მათგანში მონაწილეობისგან თავს ვიკავებდი, მაგრამ "ახალი ხმის" ფორმატი მომეწონა; ჩავთვალე, რომ აქ საკუთარი შესაძლებლობების გამოვლენას მაქსიმალურად შევძლებდი.

- ახლა როგორ აპირებ კარიერის გაგრძელებას?

- სოლო სიმღერის ჩაწერას ვგეგმავ, რომელზეც ალბათ, კლიპსაც გადავიღებთ. გარდა ამისა, სასწავლებლად მივდივარ საფრანგეთში. იქ ადრეც ვიყავი, მაგრამ ენა არ ვიცოდი და უკან დავბრუნდი. ახლა ფრანგულ ენას ვეუფლები და მომზადებული გავემგზავრები. საფრანგეთში მეგობარი მელოდება, რომელსაც ჩემთან დაკავშირებით დიდი გეგმები აქვს...

- კვლავ "ქუჩის ბიჭებს" დავუბრუნდეთ. შარშან ჯგუფის გაერთიანება რომ დააანონსეთ, სოლო კონცერტზეც საუბრობდით...

პაატა:

- პირველ აგვისტოს ბათუმში, პიაცაზე გაიმართება ჩვენი კონცერტი, რომელიც მართალია, ღია ცის ქვეშ ჩატარდება, მაგრამ ფასიანი იქნება. ისიც უნდა აღვნიშნო, რომ აბსოლუტურად ყველა სიმღერას ბენდთან ერთად შევასრულებთ. ახლა რეპეტიციებს გავდივართ... სექტემბერში ჩვენი სოლო კონცერტი თბილისშიც გაიმართება. ხუთი მუსიკალური ალბომი გვაქვს გამოშვებული და გვინდა, ამ ალბომებიდან ჩვენი საუკეთესო ჰიტები ამოვკრიბოთ და მეექვსე ალბომი გამოვცეთ.

- აგვისტოში დაგეგმილ კონცერტზე ჯგუფი მსმენელის წინაშე სრული შემადგენლობით წარდგება?

- სრული არა, ძველი შემადგენლობით ვიმღერებთ, - ანუ ჩვენთან ერთად იქნება ირაკლი ნოზაძე. რაც შეეხება პაატა ცეცხლაძეს, ის სასწავლებლად პრაღაში წავიდა.

- პაატა თქვენი ჯგუფის წევრი აღარ არის?

- არა. მას ყოველთვის უნდოდა საზღვარგარეთ ესწავლა. ყველამ კარგად იცით, რომ ის სამების საკათედრო ტაძარში გალობდა და სწავლაც კლასიკური მუსიკის განხრით განაგრძო. მას სხვა მიზნები აქვს და ფაქტობრივად, ჩვენთვის დროც არ ჰქონდა. წარმატებას ვუსურვებთ...

- თქვენი ჯგუფი კლიპებით კიდევ გაგვანებივრებს?

- რასაკვირველია. ამჟამად ზაზა ხუბუკელაშვილის სიმღერაზე ვმუშაობთ, რომელზეც კლიპსაც აუცილებლად გადავიღებთ.

- გურამ, შენი საქართველოში ვიზიტი რამდენად ხანგრძლივია?

- ექვსი თვით ვარ ჩამოსული. გაზაფხულზე სამი თვით წავალ, საქმეს მივხედავ და მერე ისევ დავბრუნდები.

- გვიამბე შენს საქმიანობაზე. პიცერია ისევ გაქვს?

- არა. კარგა ხანია, ეგ ბიზნესი გავყიდე. ახლა შიდა გადაზიდვების ბიზნესი გვაქვს, რომელსაც ჩემი ბიძაშვილები აკონტროლებენ. მე გაზაფხულზე ჩავალ, რაღაცებს გადავახალისებ და ისევ დავბრუნდები. საქართველო ხომ ჩემი სახლია...

ნათია ჟივიძე

ჟურნალი ”გზა”

(გამოდის ხუთშაბათობით)