ირაკლი სესიაშვილი - "ადეკვატური იქნებოდა, რომ რუსებს დაენგრია ის ღობეები რაც აქამდე ააგო"

"ადეკვატური იქნებოდა, რომ რუსებს არა თუ გაევლო მავთულხლართები, არამედ ღობეები რაც აქამდე ააგო, ისიც უნდა დაენგრია", - აღნიშნული განცხადება თავდაცვისა და უშიშროების საპარლამენტო კომიტეტის ხელმძღვანელმა ირაკლი სესიაშვილმა ჟურნალისტებთან საუბრისას შიდა ქართლში, საოკუპაციო ზოლის გარშემო განვითარებული მოვლენების შეფასებისას გააკეთა.

ირაკლი სესიაშვილის თქმით, საქართველოს ახალი ხელისუფლების მხრიდან გადადგმული პოზიტიური ნაბიჯების ფონზე რუსეთის მხრიდან დესტრუქციულ ქმედებას აქვს ადგილი.

"ის რაც ხდება, ყველა ცივილიზებულ ნორმას და ქცევას სცდება. ახალი ხელისუფლების მხრიდან გადაიდგა მთელი რიგი კონსტრუქციული ნაბიჯები იმისთვის, რომ ურთიერთდათმობის გზები მოგვენახა. აქ საუბარი არ არის იმაზე, რომ ჩვენ ერთმანეთისთვის საუკეთესო მეზობლები გავხდებით ხვალვე, მაგრამ ვცდილობთ, რომ ისევ და ისევ ჩვენი ქვეყნის ინტერსებიდან გამომდინარე, საერთო ენა გამოვნახოთ იმ ფონზე, როცა პოზიტიურ ნაბიჯებს ჰქონდა ადგილი, ეკონომიკური თუ კულტურული ურთიერთობების თვალსაზრისით, ეს დესტრუქციული ქმედებები ამ პროცესს ხელს უშლის, ასევე აზიანებს რუსეთის იმიჯს, რადგან მთელი მსოფლიო ხედავს, რომ ჩვენი მხრიდან მხოლოდ პოზიტიურ სიგნალებს აქვთ ადგილი. შესაბამისად, ადეკვატური იქნებოდა, რომ რუსებს არა თუ გაევლო მავთულხლართები, არამედ რაც აქამდე ღობეები ააგო, ისიც დაენგრია", - განუცხადა ჟურნალისტებს ირაკლი სესიაშვილმა.

ამასთან, მან ხაზი გაუსვა ამ პროცესში საერთაშორისო საზოგადოების როლს და იმედი გამოთქვა, რომ დასავლეთი ქართულ მხარეს მაქსიმალურად დაუჭერს მხარს.

"ინტერპრესნიუსი"