პარლამენტში მიიჩნევენ, რომ ნასვამი მძოლებისთვის სანქცია ზედმეტად მკაცრდება

პარლამენტში მიიჩნევენ, რომ ნასვამი მძღოლებისთვის პირველივე ჯერზე მართვის უფლების ერთი წლის ვადით ჩამორთმევა, ზედმეტად მკაცრი სანქციაა.

შინაგან საქმეთა სამინისტროს მიერ წარდგენილ ინიციატივას თავდაცვისა და უშიშროების კომიტეტის სხდომაზე არ დაეთანხმნენ, სადაც "ადმინისტრაციულ სამართალდარღვევათა კოდექსში" შესატანი ცვლილებების პროექტი დღეს პირველი მოსმენით განიხილეს.

კომიტეტის თავმჯდომარე ირაკლი სესიაშვილი და მისი ზოგიერთი კოლეგა მიიჩნევს, რომ უკეთესი იქნება, თუკი მართვის უფლების ერთი წლით ჩამორთმევის ვადა, ექვს თვემდე შემცირდება. საკითხის განხილვისას აღინიშნა, რომ მართვის უფლების ქონა არაერთი ადამიანისთვის შემოსავლის ერთადერთი საშუალებაა და მისი ერთი წლის ვადით ჩამორთმევით, შეიძლება ბევრმა "პურის ფული" დაკარგოს.

უმრავლესობის ერთ-ერთი ლიდერი ზაქარია ქუცნაშვილი შსს-ს სთავაზობს, მანქანის არაფხიზელ მდგომარეობაში მართვის გამო მძღოლის პირველ დაჯარიმებისას, დაწესდეს არსებულ 200-ლარიან ჯარიმაზე მეტი ოდენობის ჯარიმა, ხოლო განმეორების შემთხვევაში იყოს - ნაკლები. საკითხის განხილვისას ქუცნაშვილმა დალევის ქართულ ტრადიციულობაზეც გაამახვილა ყურადღება.

"სასმელი ქართული კულტურის ნაწილია და ეს გარემოებაც უნდა გავითვალისწინოთ. სჯობს, გავზარდოთ ჯარიმა პირველივე შემთხვევებზე და მძღოლებმა იცოდნენ, რომ თუკი საჭესთან ნასვამ მდგომარეობაში დასხდებიან, დაჯარიმდებიან იმდენით, რაც პურ-მარილი დაუჯდათ. აქცენტი მათ მატერიალურ დაზარალებაზე გადავიტანოთ და არა მართვის მოწმობის ჩამორთმევაზე" - განაცხადა ზაქარია ქუცნაშვილმა.

აღნიშნული პოზიციების საპასუხოდ შს მინისტრის მოადგილემ ლევან იზორიამ განმარტა, რომ როცა საუბარია ავტომობილის ნასვამ მდგომარეობში მართვაზე, ამ შემთხვევაში პრიორიტეტი ჯარიმების ამოღება არ არის. იზორიას თქმით, სტატისტიკა ცხადყოფს, რომ მძღოლები 200-ლარიან ჯარიმას იხდიან და მაინც იგივეს იმეორებენ, საგზაო შემთხვევების უმეტესი ნაწილი და სიკვდილიანობა კი, სწორედ ნასვამი მძოლებით არის გამოწვეული. ამასთან, იზორიამ მართვის უფლების ერთი წლით ჩამოთმევის ვადის რამდენიმე თვით შემცირება არ გამორიცხა.

საკითხის განხილვისას კომიტეტის სხდომაზე რამდენიმე დეპუტატმა ისიც კი დააფიქსირა, რომ მათთან დაკავშირებით ადგილი ჰქონია შემთხვევას, როცა სპეციალურ აპარატში სრულიად ფხიზლებმა ჩაბერეს, მაგრამ აპარატი მაინც წითლად აინთო. მათი თქმით, ამას, ზოგ შემთხვევაში, ორგანიზმში მჟავიანობის მომატებაც იწვევს.

"ხალხი გვყოლია სამკურნალო", - ხუმრობით აღნიშნა მათ საპასუხოდ ზაქარია ქუცნაშვილმა.

შეგახსენებთ, რომ შსს-ს ინიციატივით, არაფხიზელ მდგომარეობაში სატრანსპორტო საშუალების მართვაზე ადმინისტრაციული პასუხისმგებლობა მკაცრდება და სანქციები იზრდება.

"ადმინისტრაციულ სამართალდარღვევათა კოდექსში" შესატანი ცვლილებების პროექტის თანახმად, სატრანსპორტო საშუალების ნასვამ მდგომარეობაში მართვის შემთხვევაში, მძღოლს 200 ლარით დაჯარიმების ნაცვლად, ერთი წლის ვადით მართვის უფლებას ჩამოართმევენ. თუკი ამას 18 წლის ასაკს მიუღწეველი, მართვის უფლების მქონე პირი გააკეთებს, მას მართვის უფლება ორი წლის ვადით ჩამოერთმევა, ნაცვლად ერთი წლისა, რასაც ადმინისტრაციულ სამართალდარღვევათა კოდექსი სადღეისოდ ითვალისწინებს.

გარდა ამისა, წინასწარი შეცნობით, სატრანსპორტო საშუალების ალკოჰოლური სიმთვრალის მდგომარეობაში მყოფი პირისთვის გადაცემა, 250 ლარიანი ჯარიმის ნაცვლად, 300 ლარით დაჯარიმებას გამოიწვევს.

აღნიშნული სამართალდარღვევების ჩადენა, როდესაც სატრანსპორტო საშუალების მძღოლს არა აქვს სატრანსპორტო საშუალების მართვის უფლება ან ეს უფლება ჩამორთმეული აქვს სხვა დარღვევებისათვის, გამოიწვევს სატრანსპორტო საშუალების მფლობელის დაჯარიმებას 700 ლარის ოდენობით, ნაცვლად სადღეისოდ დაწესებული 500 ლარისა.

700 ლარით დაჯარიმდება პირი, რომელიც წინასწარი შეცნობით მანქანას არაფხიზელ მდგომარეობაში მყოფ პირს კვლავ გადასცემს და ამ ქმედებას წლის განმავლოში განმეორებით ჩაიდენს.

1000 ლარის ოდენობით ან 15-დღიანი ადმინისტრაციული პატიმრობით დაისჯებიან პირები, რომლებსაც სატრანსპორტო საშუალების მართვის უფლება ჩამორთმეული აქვს, ამ ვითარებაში სატრანსპორტო საშუალების არაფხიზელ მდგომარეობაში მართვის გამო ერთხელ უკვე დაჯარიმდა, მაგრამ იგივე ქმედება კვლავ გაიმეორეს.

ამავე კანონპროექტის თანახმად, ნასვამ მდგომარეობაში მანქანის მართვის შემთხვევაში, განსაკუთრებული გარემოებების გამოვლენისას, საქმის განმხილველ ორგანოს შეუძლია სატრანსპორტო საშუალების მართვის უფლების ჩამორთმევა 700 ლარიანი ჯარიმით შეცვალოს.

"ინტერპრესნიუსი"