მნიშვნელოვანი ინფორმაცია
14
მაისიდღის ზოგადი ასტროლოგიური პროგნოზი
15 მაისი, ხუთშაბათი, მთვარის მეთვრამეტე, მთვარე 23:56-ზე ესტუმრება თხის რქას
არ წამოიწყოთ ახალი საქმეები, სასამართლო პროცესები. არ გირჩევთ ვაჭრობას, უძრავ ქონებასთან დაკავშირებული საკითხების მოგვარებას. კარგი დღეა შემოქმედებითი საქმიანობისთვის. ურთიერთობისას აკონტროლეთ ემოციები. კამათი დაუშვებელია. კარგი დღეა მოგზაურობისთვის, ხანგრძლივი მგზავრობისთვის. დაისვენეთ, მაგრამ ნაკლები იძინეთ. მოერიდეთ ქორწინებასა და ჯვრისწერას. გაამდიდრეთ თქვენი რაციონი თხილითა და მცენარეული ზეთით. სიგარეტის რაოდენობა და ალკოჰოლის დოზა შეამცირეთ. მიირთვით ახალმომზადებული კერძი. გაამდიდრეთ რაციონი უმი ბოსტნეულით. არ გაცივდეთ, რადგან დღეს ჯანმრთელობის შესუსტება გაცივებით იწყება.
მნიშვნელოვანი ინფორმაცია
მკითხველის რჩევით
ასევე დაგაინტერესებთ
"ფილტრიანი სიგარეტი 25%-ით, უფილტრო კი - 38%-ით გაძვირდება"
23:43 / 12-07-2013
სავარაუდოდ, სექტემბრიდან მწეველებს სიგარეტში უფრო მეტის გადახდა მოუწევთ, ვიდრე ახლა იხდიან. საქმე ის გახლავთ, რომ მიმდინარე წლის 1-ლი სექტემბრიდან ფილტრიანი სიგარეტის აქციზის ფასი 15 თეთრით, უფილტროსი კი - 5 თეთრით გაიზრდება. საგადასახადო კოდექსში შესატანი ცვლილება მინისტრთა კაბინეტმა მოიწონა და უკვე საკანონმდებლო ორგანოს წარუდგინა დასამტკიცებლად. როგორც ვარაუდობენ, აქციზის ფასის ზრდას ავტომატურად მოჰყვება სიგარეტის გაძვირებაც. არსებობს ხალხი, რომელიც ამ გადაწყვეტილებას დადებითად აფასებს და იმედოვნებს, რომ სიგარეტის გაძვირებით მწეველთა რაოდენობა შემცირდება, მაგრამ უმეტესობა მიიჩნევს, რომ გაძვირება სტაჟიან მწეველებს ნამდვილად ვერ შეაშინებს. ამ თვალსაზრისის მომხრეა ეკონომიკის ექსპერტი ვაჟა ბერიძეც:
- ბატონო ვაჟა, როგორ ფიქრობთ, მართლა მოიმატებს სიგარეტის ფასი?
- როგორც ვიცით, ფილტრიან სიგარეტზე აქციზის გადასახადი 15 თეთრით იზრდება, ხოლო უფილტროზე - 5 თეთრით. სამწუხაროდ, ეს გაზრდის სიგარეტის ფასს და კიდევ უფრო მეტად დააზარალებს მწეველთა ჯიბეებსაც. ჩემი ანგარიშით, ფილტრიანი სიგარეტი დაახლოებით 25 პროცენტით გაძვირდება, ხოლო უფილტრო - 35-38 პროცენტით და ეს მოხდება აქციზის ზრდის შესაბამისად. მოგეხსენებათ, სიგარეტის მოწევა სულაც არ არის აუცილებელი პირობა ადამიანის არსებობისათვის, ეს უბრალოდ, მავნე ჩვევაა, მაგრამ აქტიური მწეველისათვის სიგარეტის დათმობა, ცოტა არ იყოს, რთულია. მე თვითონ 25 წლის განმავლობაში ვეწეოდი, ძლივს გადავეჩვიე და კარგად ვიცი, ეს რას ნიშნავს. ვფიქრობ, გონივრულად დაგეგმილი ქმედებებით, ნიკოტინის მავნებლობაზე ხაზგასმით უნდა გახდეს ჩვენი საზოგადოება არამწეველი და არა ამგვარი მკვეთრი ღონისძიებებით. მავნე ჩვევასთან მსგავსი მეთოდებით ბრძოლა მისაღები არ არის, მით უმეტეს, რომ ეს ფინანსურად დააზიანებს ძალიან ბევრ ადამიანს, ბევრ ოჯახს.
- თუმცა აქციზის ფასი გაზრდა ბიუჯეტის შემოსავალს ნამდვილად გაზრდის.
- საერთოდ, აქციზი ისეთი გადასახადია, რომელიც სახელმწიფოს საშუალებას აძლევს უფრო მეტი ფინანსური რესურსი მოიზიდოს, რათა შემდეგ ეს თანხა მოსახლეობის სოციალური პრობლემების მოსაგვარებლად გამოიყენოს. ალბათ, ამ შემთხვევაშიც ასე იქნება, მაგრამ აქციზის გადასახადი ისედაც მაღალი იყო და მისი გაზრდა გამართლებულად არ მიმაჩნია.
- როგორ ფიქრობთ, გამართლდება ვარაუდი, რომ გაძვირების შედეგად მწეველთა ნაწილი დაანებებს თავს სიგარეტის მოწევას?
- გამოცდილება ცხადყოფს, რომ ამგვარი მეთოდებით მოწევასთან ბრძოლა უშედეგოა, გაცილებით შედეგიანია ანტირეკლამა. ზოგიერთი მწეველის ფსიქიკაზე ის წარწერებიც მოქმედებს, რომლებიც გვაფრთხილებს, რომ მოწევა კლავს, იწვევს მძიმე დაავადებებს და მავნებელია ჯანმრთელობისთვის. მსგავსი მეთოდები უფრო ეფექტურია ამ პრობლემასთან ბრძოლაში, ვიდრე აქციზის მომატება, რადგან ადამიანს თუ ბოლომდე გაცნობიერებული არა აქვს მოწევის მავნებლობა, ორმაგ თანხას გადაიხდის და მაინც შეიძენს. ასე რომ, აქტიურ მწეველებს ფასის მომატება ვერ დააბრკოლებს. პირიქით, ეს უფრო დაძაბავს სოციალურ ფონს და ხალხს ხელისუფლების წინააღმდეგ განაწყობს. როდესაც რომელიმე ქვეყნის ხელისუფლება აძვირებს ისეთ ფართო მოხმარების საქონელს, როგორიც სიგარეტი ან ალკოჰოლია, საზოგადოებაში უკმაყოფილება ყოველთვის იზრდება. ამის კარგი მაგალითია მშრალი კანონი ფინეთში, რუსეთშიც პერიოდულად იკრძალებოდა ალკოჰოლი და ეს მოსახლეობაში პროტესტს იწვევდა. თუნდაც ამ ქვეყნების გამოცდილების გათვალისწინებით, აქციზის მომატება ეფექტურ ღონისძიებად არ უნდა მივიჩნიოთ.
- ერთი შეხედვით, სულაც არ არის ურიგო იდეა, რომ მავნე პროდუქციის ხარჯზე ბიუჯეტიც შეივსოს და მოსახლეობის სოციალური პრობლემებიც მოგვარდეს.
- მოდით, დავფიქრდეთ: თუ მთავრობა სიგარეტის, ალკოჰოლისა და სხვა მავნე პროდუქტის დაბეგვრის ხარჯზე ცდილობს სოციალური პრობლემების მოგვარებას, შეიძლება საპირისპირო შედეგი მიიღოს. პრემიერმა ერთხელ თქვა - მე ბუნებით სოციალისტი ვარო. თუ ასეა, მაშინ ჩვენმა მთავრობამ სულ სხვა ნაბიჯების ხარჯზე უნდა შეძლოს მოსახლეობის სოციალური პრობლემების მოგვარება. მაგალითად, ეს არის გადასახადების გაზრდა ჩვენი საზოგადოების შეძლებული ფენისთვის. ეს უფრო სამართლიანი იქნებოდა - ბიუჯეტი შეძლებული ფენის ხარჯზე შეივსებოდა. უნდა ვაღიაროთ, რომ საზოგადოების დაბალ ფენებში სიგარეტის მწეველთა რაოდენობა ძალიან დიდია. აღნიშნული ცვლილება საგრძნობლად დაამძიმებს მათ მდგომარეობას, რის გამოც სახელმწიფოს კიდევ უფრო მეტი დახმარებისა და შემწეობის გაცემა დასჭირდება სიღარიბის ზღვარს ქვემოთ მყოფი მოსახლეობისათვის.
- საზოგადოებაში გაჩნდა ეჭვი, რომ სიგარეტის გაძვირება ქვეყანაში კონტრაბანდული პროდუქციის შემოტანას შეუწყობს ხელს.
- არა მგონია, სიგარეტის გაძვირებას კონტრაბანდის შემოტანა მოჰყვეს. ჩვენი ხელისუფლება ძალიან კარგად აკონტროლებს ქვეყნის ეკონომიკურ საზღვრებს, აქედან გამომდინარე, საფრთხე იმისა, რომ საქართველოში სიგარეტი კონტრაბანდის სახით შემოვა, ნაკლებია. დღესდღეობით საქართველოში 1990-იანი წლებისაგან განსხვავებული მდგომარეობაა: იმდროინდელი ხელისუფლება სიტუაციას ვერ აკონტროლებდა. აქედან გამომდინარე, ვფიქრობ, დღევანდელი ხელისუფლება საქართველოს ტერიტორიაზე კონტრაბანდას არ დაუშვებს.
- და ბოლოს, ბატონო ვაჟა, დავაზუსტოთ, მაინც რამდენით მოიმატებს სიგარეტის ფასი?
- ჩემი ვარაუდით, სექტემბრიდან, როცა ეს გადაწყვეტილება ძალაში შევა, ფილტრიან სიგარეტზე ფასი დაახლოებით 20-25 თეთრით გაიზრდება, 5-10 თეთრით კი - უფილტროზე. აქტიური მწეველებისათვის, რომლებიც დღეში რამდენიმე კოლოფ სიგარეტს ყიდულობენ, ეს სერიოზული დანახარჯი იქნება.
ხათუნა ჩიგოგიძე
ყოველკვირეული გაზეთი "ყველა სიახლე"
(გამოდის ოთხშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
სასამართლომ ირაკლი ოქრუაშვილს გირაო პატიმრობით შეუცვალა
კვირის კითხვადი სტატიები
მნიშვნელოვანი ინფორმაცია
მკითხველის რჩევით
