17
ივლისიდღის ზოგადი ასტროლოგიური პროგნოზი
მსახიობი ჯაბა კილაძე ახალი სეზონიდან "თავისუფალ თეატრში" ახალი სპექტაკლის დაწყებას ელოდება, ზაფხულის ცხელი დღეების გატარებას ზღვის სანაპიროზე აპირებს; რამდენიმე დღით მარტყოფსა და ფასანაურში ჩასვლასაც გეგმავს. რა აღიზიანებს ყველაზე მეტად, რატომ ვერ იტანს სნობ ადამიანებს და რას ამბობენ მასზე? - ამ ყველაფერს მის მიერ დასრულებული წინადადებებიდან შეიტყობთ.
- დაბადების თარიღი...
- ...1981 წლის 24 აგვისტო.
- ბავშვობაში მინდოდა გამოვსულიყავი...
- ...ფეხბურთელი, მაგრამ ფიზიკური მონაცემები ხელს არ მიწყობდა, სუსტი ბავშვი ვიყავი. რომ წამოვიზარდე, ფეხბურთზე გასართობად დავდიოდი. არგენტინის ნაკრები მიყვარს და ვგულშემატკივრობ კიდეც.
- ჩემზე გავლენა იქონია...
- ...ოჯახმა. შეიძლება ითქვას, რომ თეატრში გავიზარდე და მიუხედავად იმისა, რომ მშობლები მირჩევდნენ, პროფესიად მსახიობობა არ ამერჩია, მაინც ამ გზას დავადექი.
- ბედნიერი ვარ, რომ...
- ...მყავს ოჯახი, შვილი, რომელიც ძალიან მიყვარს; მყავს ერთგული მეგობრები და ორ ძალიან კარგ თეატრში ვმუშაობ. მადლობა ღმერთს ამ ყველაფრისთვის.
- ჩემზე ამბობენ...
- ...უღალატო მეგობარიაო.
- თვისება, რომელიც ჩემში ყველაზე მეტად მომწონს...
- ...სითბოს გაცემა შემიძლია.
- რომელიც არ მომწონს და ვცდილობ გამოვასწორო...
- ...ცოტა არ იყოს, უყურადღებო ვარ და რიგ საკითხებში სუსტი ნებისყოფა გამოვიჩინე. ვაანალიზებ, რომ კონკრეტული საქმის გაკეთება შემიძლია და არ ვაკეთებ. ეს თვისება რომ არ მქონდეს, უფრო მეტად წარმატებული ვიქნებოდი.
- როცა მარტო ვარ...
- ...ბევრს ვფიქრობ, ჩემს ქმედებებს ვუღრმავდები. წარსულზე - ნაკლებად, მომავალზე უფრო ხშირად ვფიქრობ.
- ვიბნევი, როცა...
- ...არც კი ვიცი, ეს როდის მემართება. საერთოდ, ადვილად არ ვიბნევი.
- წონასწორობიდან ჩემი გამოყვანა შეუძლია...
- ...უსამართლობას და ცხოვრებაში ყველაზე მეტი პრობლემა სწორედ ამის გამო შემექმნა. რა ვქნა, არ შემიძლია, უსამართლობაზე თვალები დავხუჭო, გავჩუმდე.
- მე ვარ შეუმდგარი...
- ...წარუმატებლობა არ მიყვარს, ამიტომ ხელს ყოველთვის იმ საქმეს ვკიდებ, რომელიც ვიცი, ასე თუ ისე, გამომივა. დამარცხება არ მიყვარს.
- მეზარება...
- ...ბევრი რამ მეზარება, მაგრამ საქმის კეთება - არასდროს. ბევრჯერ მითქვამს, - ხვალიდან ვარჯიში უნდა დავიწყო-მეთქი, მაგრამ სურვილი სიზარმაცეს დაუძლევია.
- მაღიზიანებს...
- ..."ვაზელინი ხალხი", პოზიციას 15 წუთში რომ იცვლიან. მათ მიმართ ჩემი დამოკიდებულება არაერთხელ გამომიხატავს და უსიამოვნებაც შემხვედრია - ადამიანებს სიმართლის მოსმენა არ სიამოვნებთ.
- დათმობა შემიძლია, თუ...
- ...ვფიქრობ, რომ ასეა საჭირო.
- ამ წუთში ძალიან მინდა ვიყო...
- ...სადმე ზღვის სანაპიროზე. წყალი და მზე ძალიან მიყვარს.
- დღემდე ვერაფრით ვისწავლე...
- ...საკუთარი ოთახისა და მანქანის წესრიგში მოყვანა. ხანდახან ეს უწესრიგობა ნერვებს მიშლის.
- დაშვებულ შეცდომებს...
- ...არ ვივიწყებ, შეცდომებზე ჭკუას ვსწავლობ.
- არავისთან ვსაუბრობ...
- ...იმაზე, რაც ძალიან ინტიმურია.
- რეჟისორი, რომელთან თანამშრომლობაც მსურს...
- ...ძალიან გამიმართლა, რომ კარგ რეჟისორებთან მიწევს მუშაობა. ესენი არიან: ჩემი პედაგოგი გიორგი შალუტაშვილი, დოი, ჭოლა, ნუკრი ქანთარია. წლებია, ავთო ვარსიმაშვილთან ვთანამშრომლობ. შეიძლება ითქვას, რომ მასთან გავიზარდე. დიდი სურვილი მაქვს, მომავალში თემურ ჩხეიძესთან ვიმუშაო.
- ჩემი ყველაზე დიდი სისუსტე...
- ...ამას არ ვიტყვი, რადგან არ მინდა, სხვებმა გაიგონ.
- სიყვარული ეს...
- ...არის გრძნობა, რომლის ახსნაც ვერავინ შეძლო. ეს არის ინდივიდუალური შეგრძნება. ვისაც როგორ შეუძლია, ისე უყვარს. სუნთქვა შეგეკრა თუ თავი მოგეფხანა, რა მნიშვნელობა აქვს, მთავარია, რომ გიყვარს.
- როცა შეყვარებული ვარ...
- ...თუ შეყვარებული ვარ (რაც ჩემს ცხოვრებაში ძალიან იშვიათად ხდება), ეს გრძნობა ჩემში ბევრ რამეს ცვლის. როგორი ვხდები? სრულ მობილიზაციასა და კონცენტრაციას იმ ადამიანზე ვახდენ. სიცოცხლე მისთვის მიყვარს, ყველაფერი მისთვის მიხარია. ცხოვრებაში ერთადერთხელ ვიგრძენი, რა იყო ნამდვილი სიყვარული და მომავალში სულ რომ არავინ შემიყვარდეს, მაინც ბედნიერი კაცი ვარ, რადგან ეს გრძნობა გამოვცადე.
- ახლა შეყვარებული...
- ...არ ვარ.
- ყოველთვის შეუძლია კარგ ხასიათზე დამაყენოს...
- ...როცა რაღაც პოზიტიურს ვხედავ, უკვე კარგ ხასიათზე ვდგები. ამდენი წელია, ქვეყანაში დაძაბული ფონია. ალბათ სხვა, ნაკლები პრობლემების მქონე სახელმწიფოში რომ დავბადებულიყავი, სულ კარგ ხასიათზე ვიქნებოდი.
- ცხოვრებას ვილამაზებ...
- ჩემი პროფესიით, საქმით...
- როცა საჯაროდ მაქებენ...
- ...თავისთავად სასიამოვნოა, მაგრამ თან უხერხულობის განცდაც ახლავს, საკუთარ თავზე კარგის მოსმენა მიჭირს.
- ცხოვრებაში რისკზე...
- ...აუცილებლად უნდა წახვიდე. თუმცა, რისკსაც გააჩნია - ზოგიერთი ამ სახელს ისეთ იდიოტობას არქმევს, რასაც თავად არასდროს გავაკეთებ. ზოგადად, ანალიტიკა მიყვარს.
- მეშინია...
- ...ამაზე არც კი მიფიქრია. ჯუნგლებში რომ მოვხვდე, ალბათ შემეშინდება. ვთვლი, რომ ყველა ნორმალურ ადამიანს ღმერთის უნდა ეშინოდეს.
- ჩემი ცხოვრების ყველაზე დიდი ტკივილი...
- ...ახლობელი ადამიანების გარდაცვალებაა.
- ხშირად მსაყვედურობენ...
- ...უყურადღებობის გამო და ზოგჯერ საყვედური სამართლიანიც არის.
- არ მჩვევია...
- ...პირფერობა.
- არ მიყვარს...
- ...სნობიზმი. არ მიყვარს ადამიანები, რომლებსაც საკუთარ თავზე დიდი წარმოდგენა აქვთ, პოპულარობა თავში უვარდებათ; არ მიყვარს, როცა პიროვნება ამბობს: "ნახე, რა მაგარი ვარ", "ნახე, რა მაგარი რაღაც მაცვია", "ნახე, როგორი ტელეფონი მაქვს"... ღმერთმა დამიფაროს ამ ყველაფრისგან, ასეთ ადამიანად არასდროს ვიქცევი.
- ვუფრთხილდები...
- ...ნებისმიერ ადამიანს, ვისთანაც ურთიერთობა მაქვს, განსაკუთრებით კი მშობლებს, რომლებსაც ზოგჯერ უაზრობის გამოც ვაბრაზებ და ვანერვიულებ. ყველანი ერთმანეთს უნდა გავუფრთხილდეთ.
- არ მრცხვენია...
- ...ჩემი ცხოვრების, განვლილი წლების...
- არ მეგონა, თუ...
- ...(ფიქრობს) ვააა! როგორ დავასრულო, ვერ ვხვდები. არ მეგონა, თუ ამ წინადადების დასრულებას მთხოვდი. თავი დამანებე (იცინის).
- რამდენიც უნდა გადამიხადონ...
- ...არ გავაკეთებ იმას, რაც მე მორალურად ზიანს მომაყენებს. ყველას ჩვენ-ჩვენი პრინციპი გვაქვს.
- დარიგება, რომელიც არასდროს დამავიწყდება...
- ...დარიგებები სიტუაციების მიხედვით უფრო მიმიღია და ახლა რაიმე კონკრეტული არ მახსენდება. ძალიან კარგია, როცა ადამიანს მოსმენის უნარი აქვს.
- დაბოლოს, გეტყვით, რომ
- ...მინდა, ყველანი კარგ ხასიათზე ვიყოთ, ერთმანეთის გვერდით დგომა და ხელის შეშველება ვიცოდეთ, ყველას ერთმანეთი გვიყვარდეს და ვუფრთხილდებოდეთ. მინდა, ქუჩაში ბევრ ღიმილიან სახეს ვხედავდე.
თამუნა კვინიკაძე
(გამოდის ხუთშაბათობით)
