8
ივლისიდღის ზოგადი ასტროლოგიური პროგნოზი
მიუხედავად იმისა, რომ ინფექციური პათოლოგიის ცენტრი და სეფსისის საწინააღმდეგო ცენტრი ერთ მისამართზე (ყაზბეგის გამზ. #16) მდებარეობდა, ეს უკანასკნელი იყო და დღემდე რჩება ცალკე ადმინისტრაციულ ერთეულად. თუმცა, როდესაც წინა ხელისუფლებამ ბიუჯეტის შევსების მიზნით სამედიცინო დაწესებულებების შენობებისა და ტერიტორიების გაყიდვა დაიწყო, გაიყიდა ე.წ. ინფექციური საავადმყოფოს ტერიტორია შენობა-ნაგებობებით, თანაც მართლაც რომ სიმბოლურ ფასად. 2009 წლის 25 დეკემბერს ეკონომიკის სამინისტროს აუქციონის მომწყობი კომისიის პირობებით გამოცხადებულ აუქციონში გაიმარჯვა შპს "ავერსი-ფარმამ", რომელმაც ყაზბეგის გამზირის #16-ში მდებარე 18 ერთეული შენობა-ნაგებობა და მათზე დამაგრებული 58 175 კვმ მიწის ნაკვეთი 12 მილიონი დოლარის ეკვივალენტ ლარში შეიძინა. სახელმწიფოს მიერ გასხვისებულ ამ ქონებაში შევიდა სეფსისის ცენტრის შენობა და შესაბამისი მიწის ნაკვეთი. როგორც ოფიციალური დოკუმენტაციიდან ჩანს, სახელმწიფოს მყიდველისთვის ამ სამედიცინო დაწესებულებებისთვის ალტერნატიული კლინიკის მშენებლობა არ დაუვალებია, თუმცა მყიდველი ვალდებული იყო, საპრივატიზაციო ობიექტში განთავსებული სამედიცინო დაწესებულებებისთვის პროფილით ფუნქციობის მიზნით, ამავე ობიექტით სარგებლობის უფლება ორი წლით უზრუნველეყო. ეს ვადა წელიწად-ნახევარია გავიდა. სამედიცინო დაწესებულებების შენობით უზრუნველყოფა წინა ხელისუფლების პირობებში სახელმწიფომ ივალდებულა, თუმცა ეს ვალდებულება დღემდე არ შესრულებულა. დღეს კი ამ ტერიტორიის კანონიერი მფლობელი "ავერსი-ფარმა" საკუთარი უფლებამოსილების განხორციელებას ითხოვს, არსებული ინფორმაციით, სეფსისის ცენტრისთვის წაყენებული ულტიმატუმით, ცენტრის თანმშრომლებს დაკავებული შენობა პირველი ივლისისთვის უნდა გაეთავისუფლებინათ, თუმცა, როგორც ირკვევა, "ავერსისა" და ჯანდაცვის სამინისტროს შეთანხმებით, სეფსისის ცენტრი ჯერჯერობით ძველებურად გააგრძელებს ფუნქციობას, ამასობაში ვრცელდება ინფორმაცია, რომ უახლოეს მომავალში ხელისუფლება უკვე სეფსისის ცენტრის სამედიცინო დაწესებულების ღია აუქციონზე გაყიდვას გეგმავს. ამის თაობაზე უკვე ესაუბრნენ ცენტრის თანამშრომლებს, ცენტრის შეძენის სავარაუდო მსურველიც ცნობილია. რაოდენ უცნაურიც უნდა იყოს, ეს ისევ და ისევ "ავერსი-ფარმაა". ბუნებრივად ჩნდება კითხვა: რაღა მაინცდამაინც ახლა გადაწყვიტა "ავერსმა" ცენტრის ყიდვა?
სულიკო კოსიაშვილი, ვახტანგ ბოჭორიშვილის სახელობის სეფსისის საწინააღმდეგო ცენტრის ექიმი:
- ორი ვარიანტი შემოგვთვაზეს: ან უნდა დაველოდოთ იმ დროს, როდესაც ონკოლოგიურ საავადმყოფოს ან რესპუბლიკურ საავადმყოფოს დაიბრუნებს სახელმწიფო, რის შემდეგაც რომელიმე შენობაში დაგვითმობენ ფართობს, ანაც "ავერსმა" უნდა შეიძინოს სეფსისის საწინააღმდეგო ცენტრი. პირადად ჩემთვის ეს მეორე ვარიანტი ყოვლად მიუღებელია, თუ მაინცდამაინც უნდა გაყიდონ, მხოლოდ იმ პირობით, რომ სამედიცინო პროფილი არ შეიცვლება. ითქვა ისიც, რომ სეფსისის ცენტრს არ გაყიდიან კოლექტივის თანხმობის გარეშე. ამ შეხვედრის შემდეგ "ავერსის" ხელმძღვანელი პაატა კურტანიძე შეხვდა კოლექტივს. როგორც ის ამბობს, იცნობდა ვახტანგ ბოჭორიშვილს და მისი სახელის უკვდავსაყოფად აპირებს, სახელმწიფოს მიერ შემუშავებული პირობებით იყიდოს ცენტრი და განავითაროს. მისი ეს სურვილი მართლაც ძალიან მოულოდნელია, გამოდის, რომ უკვე წელიწად-ნახევარზე მეტია, "ავერსის" კუთვნილ შენობაში უკანონოდ ვაგრძელებთ მუშაობას, "ავერსი" ჩვენგან დაჟინებით ითხოვდა საიჯარო გადასახადს ისე, რომ ვახტანგ ბოჭორიშვილის სახელის უკვდავყოფა არც გახსენებია, გაუგებარია, დღეს რაში დასჭირდა ამ ახალი მოვალეობის თავის თავზე აღება. თუ მაინცდამაინც ვახტანგ ბოჭორიშვილის სახელის უკვდავყოფა უნდა, შეუძლია დააარსოს ახალი ორგანიზაცია სეფსისის ცენტრის მსგავსი სახელითა და პროფილით, ასეთ შემთხვევაში მას სახელმწიფოს მიერ წაყენებული პირობების არც შესრულება მოუწევს და დანახარჯიც უფრო ნაკლები ექნება. ბუნებრივად ჩნდება ეჭვი, რომ სახელმწიფოს ერთი სული აქვს, ჩვენ წინაშე აღებული ვალდებულება მოიშოროს, შესაბამისად, რაღაც მექანიზმებით აიძულებენ "ავერსს", იყიდოს სეფსისის ცენტრი. ბატონმა პაატა კურტანიძემ ისეთი დაპირებები მოგვცა, რომ ესეც მაეჭვებს, ისეთი შთაბეჭდილება რჩება, რომ მას პირდაპირ დაავალეს, რაც შეიძლება მომხიბლავი პირობები შემოეთავაზებინა, რათა კოლექტივი დაეთანხმებინა. ამან იმოქმედა და კოლექტივის ნაწილი გაყიდვაზე თანახმაა, მომზადდა შესაბამისი წერილი, რომლის მიხედვითაც კოლექტივის ნაწილი სამედიცინო საქმინობის პროფილის შენარჩუნებას სავარაუდო მყიდველისგან 7 წლით ითხოვს, რაც ასევე უდიდესი შეცდომაა. ეს შვიდი წელი უცებ გაივლის, რა იქნება მერე? გვინდა ახალმა ხელისუფლებამ როგორმე გაიგოს, რომ ჩვენ ვართ მსხვერპლი წინა ხელისუფლების, რომელმაც სრულიად უსაფუძვლოდ გაყიდა ჩვენი კუთვნილი შენობა და მიწის ნაკვეთი.
ნათია დოლიძე
ყოველკვირეული გაზეთი "ყველა სიახლე"
(გამოდის ოთხშაბათობით)
