29
მარტიდღის ზოგადი ასტროლოგიური პროგნოზი
რესტორან "ლა ტრუფეში" მომხდარი სკანდალი, რომლის დროსაც "ნაციონალებმა" და მოქალაქეთა ჯგუფმა იჩხუბეს, რამდენიმე დღის წინ ისევ განახლდა. მომხდარზე ბრალი მხოლოდ მოქალაქე ბექა მაზიაშვილსა და ძველი თბილისის გამგებელ ნიკა მელიას წაუყენეს ხულიგნობის მუხლით. ამას დაზარალებული მაზიაშვილის მეგობრები, ინციდენტის მონაწილეები, მანანა გიორგობიანი და მამუკა ბაკურია აპროტესტებენ და ითხოვენ, საქმის გამოძიება ობიექტურად წარიმართოს. ბექა მაზიაშვილის მეგობრების პროტესტს ნიკა მელია პრესკონფერენციით გამოეხმაურა, სადაც ადვოკატ გოგიტა გაბაიძესთან ერთად მაზიაშვილის ნარკოლოგიური შემოწმების ტესტი წარმოადგინა.
მათი განცხადებით, მაზიაშვილი "ლა ტრუფეში" ნარკოტიკის ზემოქმედების ქვეშ იმყოფებოდა, მელიასვე მტკიცებით, პოლიციამ ბექა მაზიაშვილი 15 ივნისს დიდი ოდენობით ნარკოტიკის შენახვისთვის დააკავა, მაგრამ გამგებლის საწინააღმდეგოდ ჩვენების მიცემის პირობით გაათავისუფლა. მაზიაშვილის დაკავება შსს-ს პრესცენტრის ხელმძღვანელმა ნინო გიორგობიანმაც დაადასტურა, მაზიაშვილი მომხდარზე არანაირ კომენტარს არ აკეთებს. პარალელურად, რესტორანში უკვე სხვა ჭრილში გადაიზარდა, მანანა გიორგობიანის განცხადებით მათ და მის შვილებს უცხო პირები 12 მაისის შემდეგ აქტიურად უთვალთვალებენ.
"ყველა სიახლე" მანანა გიორგობიანს დაუკავშირდა:
- ჩემი ვაჟი რამდენიმე დღის წინ ჩამოვიდა თბილისში და მითხრა, რომ მას უთვალთვალებს "გუჩის" პატენტ ტანსაცმელში გამოწყობილი ორი პირი. ტაქსიში ჩაჯდომისას ამ ადამიანებმა ჩემს შვილს შეურაცხყოფა მიაყენეს, მაგრამ მან თავი შეიკავა. ვაფრთხილებ მელიას, რომ ჩემს შვილს თავი დაანებოს. ჩვენი სამეგობროს შეკრებებზეც შეგვინიშნავს უცხო პირები. აქამდე ეს არ მითქვამს. ჩემს თავზე გადაიარა 90-იანმა წლებმა, ავტომატების ტრიალმა, 9 აპრილმა, რამ აღარ და ნიკა მელიამ როგორ უნდა შემაშინოს, რამე როგორ უნდა გამომაპაროს? ჩვენ გამოცდილი თვალი გვაქვს. უშიშროებაში მყავს ახლობლები და ისინი ჩავაყენე საქმის კურსში. მითხრეს, მელია მაგარი "აპასნი" ტიპიაო და ამიტომაც ვეკიდები გაგებით ყველაფერს. მინდოდა სამართლებრივი გზით, წყნარად და ობიექტურად წარმართულიყო გამოძიება.
- უკმაყოფილო ხართ გამოძიებით?
- უკმაყოფილო არ ვარ, მაგრამ საქმის დეტალებიდან არ ჩანს, რომ ნიკა მელია დაესხა თავს ბექა მაზიაშვილს და ჩვენს სამეგობროს. ვიცი, ვინც არის ის მეორე მელოტი კაცი, მასთან რომ იყო, მაგრამ ჯერ მის გვარ-სახელს არ დავასახელებ. იმ კაცის გაქრობით საქმის კლასიფიკაცია იცვლება, ჩვენ ვიპოვეთ ის მეორე ტიპი, რომელმაც ჩემს მეგობრებთან აღიარა, რომ ხელი მკრა, მაგრამ გამოძიებამ ვერ იპოვა. ისიც ვიცი, რომ სისტემაში "ნაციონალების" ბევრი კადრია დარჩენილი. მელიამ იცის, რა გიჟები ვართ. რომ ამბობს - წამოდგომაში დავეხმარეო, - იტყუება, დალურჯებული მქონდა ყელი და ყელში წაჭერით ცდილობდა ჩემს წამოყენებას? ისინი თავს დაესხნენ ბექა მაზიაშვილს, შემდეგ მოვიდნენ ავტომატიანი ტიპები, მათ სცემეს ბექას და სადღაც მიათრევდნენ. კიდევ კარგი, ხათუნა დარბაისელმა გამოიძახა პატრული. როცა სამართალდამცავები მოვიდნენ, გზა გადაკეტეს და "ნაციონალებმა" გაარღვიეს კორდონი, დავით საყვარელიძემ სულ სახეში ურტყა პატრულს დეპუტატის მანდატი. ჩვენ კი წავედით და პირველივე წუთიდან ვითანამშრომლეთ გამოძიებასთან. ჩვენი ჩვენებები ემთხვევა, მათ კი სხვადასხვანაირი ჩვენებები აქვთ. მხოლოდ გოროზიას და ია ფარულავას უწერია სიმართლე. ფარულავა ჩხუბის დაწყებამდე წავიდა რესტორნიდან, ზაზა გოროზია სადაც შემხვდება, თუ სამშობლოს წინაშე არ აქვს დანაშაული ჩადენილი, ამ სიმართლის გამო კაცურად ვეტყვი გამარჯობას. თიკო სადუნიშვილი რომ წერს, თითქოს მე ვკიოდი რესტორანში "ვაკე ჩვენიაო" - იტყუება. არ ვარ ვაკელი, ხილიანზე გავიზარდე, 20 წელია, რაც ვაკეში გადმოვედი საცხოვრებლად, სულით ვერელი უფრო ვარ. ბექა გმირია ხალხის თვალში და ახლა ცდილობს ნიკა მელია, რაღაც დოკუმენტების ფრიალით შელახოს მისი იმიჯი. ნიკა მელიას სისტემაში ჰყავს ისევ თავისი ხალხი, კადრები, რომელთაც არაფერი აქვს დასაკარგი და იმიტომაც წავიდა საქმის კლასიფიკაცია ასე. ჩვენ "რუსთავი 2"-დან გავიგეთ, რა ბრალი წაგვიყენეს. გამაგებინეთ, წინასწარ როგორ იცოდნენ მელიამ ან ჟურნალისტებმა ეს? 9 წელი გავუძელი ამათ და ოქტომბრის ბოლომდე ფეხებით დაკიდებული გავძლებ.
ინციდენტის მთავარი მონაწილე ბექა მაზიაშვილი კომენტარისგან თავს იკავებს. მის უფლებებს სასამართლოში ადვოკატი მამუკა ლომიძე დაიცავს.
მამუკა ლომიძე: რატომ არის აღელვებული ნიკა მელია, ის ხომ ნაკლებად მძიმე დანაშაულშია ბრალდებული? ბექა ჩხუბის შედეგად მძიმედ დაშავდა, 5 ნაკერი დაადეს, მკერდის არეში აქვს მიღებული დაზიანებები. ჩვენ პრეტენზია გვაქვს დაცვის სამსახურთანაც, დაცვის პოლიცია საკუთარ მოვალეობას ცუდად ასრულებს. ყველამ ვიცით, რა შედეგით სრულდება "ნაციონალური მოძრაობის" წევრების ქეიფი და დროსტარება. პატრული რომ არ მოსულიყო, ბექა მაზიაშვილი სანდრო გირგვლიანის ბედს გაიზიარებდა. აპირებდნენ ბექას გატაცებას, იმიტომ ურტყეს ყველას, რომ არ უნდოდათ ამ საქმის თვითმხილველები მათ გარდა სხვებიც ყოფილიყვნენ. სასაცილოა, პროკურატურამ ხულიგნობის მუხლით რომ წაუყენა ბრალი ბექა მაზიაშვილს.
- ნიკა მელიას ადვოკატმა გოგიტა გაბაიძემ განაცხადა, რომ ბექა მაზიაშვილი ნარკოტიკების მომხმარებელია.
- გოგიტა გაბაიძეს ბაჩო ახალაიას ნაჩუქარი "რეიბანის" სათვალე არ ეკეთა პრესკონფერენციაზე? ჩემთვის სირცხვილია გაბაიძის ბრალდებებზე პასუხის გაცემა. თუ აქვთ მათ რამე დოკუმენტები, წარმოადგინონ სასამართლოზე და არა პრესკლუბებში.
"ყველა სიახლე" შეეცადა ნიკა მელიასთან დაკავშირებას, მაგრამ ის ტელეფონს არ პასუხობს.
თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
