2
ივნისიდღის ზოგადი ასტროლოგიური პროგნოზი
თბილისის მერიისა და საკრებულოს თანამშრომლები, რომლებიც დღეს ფინანსურმა პოლიციამ დააკავა, პროკურატურაში სარჩელს შეიტანენ. ამის შესახებ თბილისის მერმა გიგი უგულავამ საგანგებო პრესკონფერენციაზე განაცხადა.
მისი თქმით, "ნაციონალურ მოძრაობის" წევრებს, მერიისა და გამგეობების 30-მდე თანამშრომლის დაკავება დღეს უკანონოდ მოხდა.
"სამსახურში მისვლამდე მოხდა ჩვენი 30-მდე თანამშრომლის აყვანა. სავარაუდოდ, უნდა გავითვალისწინოთ, რომ თითოეული ადამიანის აყვანას დასჭირდა მინიმუმ 3 მანქანა. ამ საქმეში ფინანსური პოლიცია იყო ჩართული და საკრებულოს არჩეული წევრები, მერის მოადგილე, ერთი გამგებელი, გამგებლის 4 მოადგილე და გამგეობების თანამშრომლები დააკავეს", - აღნიშნა გიგი უგულავამ.
თბილისის მერმა დღეს იმ ადამიანების გვარები დაასახელა, რომლებიც დღეს დააპატიმრეს. ესენი არიან: დავით ალავიძე, დავით ავალიანი, ვახო ცაგარეიშვილი, დავით ნინიძე, მამუკა ახვლედიანი, ნოდარ სანდუხაძე, ლექსო თაბუაშვილი, ბესო კვიციანი, ლევან ნებიერიძე, ზურა კიკვაძე, ავთო სულაბერიძე, ნიკა აბრამიშვილი, ბექა მეშვერდიშვილი, ვახტანგ გაგუა, მიხეილ ქირია, კოკა ღვნიანიძე, მამუკა ბერაძე, ალექსანდრე ჩაფიჩაძე, დიმიტრი ჩხეიძე, გიორგი დარჩია, ზაზა გუდიაშვილი.
"ჩვენი ჩარევის შემდეგ, იმის გამო, რომ დღეს საქართველოში მაღალი რანგის დელეგაცია იმყოფება, მოხდა ბრალის გადაკეთება. ვითომდა, ეს ხალხი მოწმეებად დაიბარეს. ფინანსური პოლიცია არც კი ადასტურებდა მათ დაკავებას", - განაცხადა უგულავამ.
მისივე ინფორმაციით, თბილისის მერიისა და საკრებულოს თანამშრომლების აყვანა ისე მოხდა, როგორც ჩვეულებრივ კრიმინალებს იჭერენ.
"დაკავებისას, მათ არ განემარტა საკუთარუ უფლებები. დაადეს ხელბორკილები, მიიყვანეს ფინანსურ პოლიციაში, ნაწილზე მოასწრეს ბრალის წაყენება, თუმცა შემდეგ ეს დოკუმენტაცია დახიეს და თითქოს ეს ხალხი მოწმეებად იყვნენ მიყვანილები. უკანა გასასვლელიდან მოხდა ამ ხალხის გაყვანა, რათა ჩაეფარცხათ ის სამარცხვინო საქციელი, რაც დღეს მოხდა", - აღნიშნა თბილისის მერმა.
გიგი უგულავა აცხადებს, რომ "ნაციონალური მოძრაობის" წევრებზე ასეთი ტიპის თავდასხმა პირველად არ ხდება.
"ის რაც დღეს მოხდა ყველანაირ ზღვარს სცდება. ეს ხალხი, რომელიც ერთი და იგივე საქმეზე იყო დაპატიმრებული, რამდენჯერმე იმყოფებოდა დაკითხვაზე. არც ერთი მათაგანი არ გაქცევია გამოძიებას, არც ერთი არ დამალვია, თითოეული მათგანი ამტკიცებდა თავის სიმართლეს. თითოეულ მათგანს ოჯახის წევრების თვალწინ ადებენ ბორკილებს, ახსნა- განმარტებას არ აძლევენ, ებლატავებიან", - განაცხადა უგულავამ.
მისივე განცხადებით, ეს დაკავებები იმისთვის ხდება, რომ მოხდეს "ნაციონალური მოძრაობის" დაშანტაჟება.
"ეს ადამიანები გაათავისუფლეს იმის გამო, რომ მე პირადად განგაშის ზარი შემოვცხე და იმის გამო, რომ რასმუსენი თბილისშია და არა იმის გამო, რომ კანონის უზენაესობას სცემენ პატივს. თქვეს, რომ თითქოს ეს ხალხი მოწმის სახით დაიბარეს, გინახავთ ხელბორკილებით შეყვანა? რომელი კანონის უზენაესობასზე და წესიერებაზე ვსაუბრობთ, ეს ყველაფერი ემსახურება იმას, რომ მოხდეს ბოლომდე დაშანტაჟება და განადგურება პარტიული ინფასტრუქტურის. ეს ხდება იმისთვის, რომ ოპოზიცია განადგურდეს", - განაცხადა უგულავამ.
მისივე ინფორმაციით, ისინი მიმართავენ ომბუდსმენს და სარჩელს შეიტანენ პროკურატურაში.
"ჩვენ ველით ობუდსმენისგან შესაბამის რეაგირებას, რადგან მოხდა კანონის უხეში დარღვევა, ადამიანის უფლებების ფეხქვეშ გათელვა, დღეს უკანონოდ დაპატიმრებული ყველა ადამიანი შეიტანს საჩივარს პროკურატურაში იმისათვს, რომ მოხდეს გამოძიება. იმედია ეს გამოძიება არ გაგრძელდება საუკუნეები და მალე მივიღებთ პასუხს" , - აღნიშნა თბილისის მერმა.
