გიორგი ღვინიაშვილი: "ასეთი ფაქტების შესახებ არაფერი ვიცოდი"

"დაუშვებელია, რომ "ნაციონალური მოძრაობის" ყველა წევრს ერთ ქვაბში ხარშავენ", - განაცხადა "კვირის პალიტრასთან" გურჯაანის მაჟორიტარმა დეპუტატმა, თბილისის ყოფილმა პროკურორმა გიორგი ღვინიაშვილმა.

- ბატონო გიორგი, როდესაც პრეზიდენტი და შს მინისტრი აცხადებენ, არ ვიცოდით თუ ადამიანებს აწამებდნენო, დაჯერება უჭირს საზოგადოებას. ასევე წარმოუდგენელია, 12 888 ფაილი ისე შეიქმნას რომელიმე სტრუქტურაში, რომ ხელმძღვანელმა არაფერი იცოდეს.

- მე და ჩემს თანაგუნდელებს გვინდა ჩატარდეს გამოძიება და ყველაფერს თავისი სახელი დაერქვას. ძალიან ცუდია, როდესაც ჩვენი ხელისუფლების ყველა წევრს ერთი საზომით ზომავენ.

8 წლის წინ, როდესაც ხელისუფლებაში მოვედით, პოლიციის ყველა განყოფილებაში იყო წამებაც, ცოცხიც და სხვა რამეებიც. 4 წელი თბილისის პროკურორი ვიყავი და არაერთი პოლიციელი მიმიცია სისხლის სამართლის პასუხისგებაში იმისათვის, რომ ასეთი ფაქტები აღმოგვეფხვრა.

შევარდნაძის პერიოდში ადამიანები წინასწარი დაკავების იზოლატორებიდან, მაღალი სართულებიდან მოფრინავდნენ. 8 წლის განმავლობაში მაქსიმალურად ვიბრძოდით ამის აღმოსაფხვრელად. ვინც ასეთ საშინელებებს სჩადის, მანიაკებად ვთვლი. მეც რომ ვიყო ამის ჩამდენი, უნდა ვაგო პასუხი. ჩემი შვილიც თუ ჩაიდენს ასეთ სისაძაგლეს, ისიც უნდა დაისაჯოს კანონის შესაბამისად.

პოლიტიკური განცხადებების გაკეთებას, შს მინისტრ ღარიბაშვილს ურჩევნია, გამოძიების შედეგები წარმოგვიდგინოს. გვითხრან, ვინ ავალებდა ამ ადამიანებს ასეთი საშინელების ჩადენას? ვინც უნდა იყოს, ვინც ასეთ დავალებებს იძლეოდა, ისიც და შემსრულებელიც უმკაცრესად უნდა დაისაჯონ.

- პრეზიდენტმა ბრძანა, რომ ამგვარ საქმეებში მონაწილეობდნენ დავით ჩხატარაშვილი და ლევან ქარდავა, რომლებიც არ იყვნენ შეუმჩნეველი ფიგურები.

- მთავარი პროკურორის მოადგილე უჩინარი ნამდვილად ვერ იქნება, მაგრამ რატომ გამორიცხავთ, რომ პრეზიდენტმა არ იცოდა, თუ ვინმე ადამიანებს აწამებდა.

იხილეთ ინტერვიუს სრული ვერსია