სამხედრო პოლიციამ შსს-ს ყოფილი მაღალჩინოსნის სახლიდან დიდი ოდენობით საბრძოლო მასალა ამოიღო

სამხედრო პოლიციამ საქართველოს შს სამინისტროს ყოფილი მაღალჩინოსნის, მამუკა კაკაბაძის საცხოვრებელი სახლიდან დიდი ოდენობით საბრძოლო მასალა, სპეციალური დანიშნულების ტყვიამფრქვევი და საბრძოლო შაშხანა ამოიღო.

როგორც "ინტერპრესნიუსს" თავდაცვის სამინისტროდან აცნობეს, კაკაბაძის სახლის ჩხრეკა გარდაბნის რაიონის სოფელ მარტყოფში დღეს ჩატარდა. მამუკა კაკაბაძე 2010-2012 წლებში თავდაცვის სამინისტროს სახელმწიფო შესყიდვების დეპარტამენტთან სხვადასხვა სამხედრო ქონების მოწოდების კუთხით თანამშრომლობდა. საქმეზე კონკრეტულ პირთა ბრალეულობის დადგენის მიზნით დამატებითი საგამოძიებო-ოპერატიული ღონისძიებები ტარდება.

სამხედრო პოლიციის დეპარტამენტის გამოძიების მთავარი სამმართველო 28 მაისიდან აწარმოებს საქმეს 332-მუხლის პირველი ნაწილით, რაც სამსახურებრივი უფლებამოსილების ბოროტად გამოყენებას გულისხმობს.

"ინტერპრესნიუსი"