პირადი ცხოვრების ამსახველი ფარული ჩანაწერების განადგურება გადაიდო

უკანონოდ მოპოვებული ჩანაწერების განადგურების გადაწყვეტილება არ შეცვლილა, თუმცა მათი ლიკვიდაცია კვირას, 23 ივნისს აღარ განხორციელდება , - ამის შესახებ ჟურნალისტებს ფარულ ჩანაწერებთან დაკავშირებით შექმნილი კომისიის სხდომის შემდეგ კომისიის წევრებმა განუცხადეს.

როგორც კომისიის წევრმა, გაზეთ "რეზონანსის" მთავარმა რედაქტორმა ლაშა ტუღუშმა განმარტა, ერთი კვირის თავზე კომისია ისევ შეიკრიბება და განსაზღვრავს კონკრეტულ თარიღს, როდის მოხდება ჩანაწერების განადგურება. იქამდე კი, დღევანდელ შეხვედრაზე მიღებული გადაწყვეტილებით, დიპლომატიური კორპუსის, სამოქალაქო საზოგადოების და პოლიტიკური პარტიების წარმომადგენლებთან კიდევ ერთი შეხვედრა გაიმართება.

"შეხვედრაზე ითქვა, რომ უკანონო ჩანაწერების გადაწყვეტილება არ შეიცვლება. კომისიამ იმსჯელა და გადაწყვიტა, რომ დიპლომატიური კორპუსის, სამოქალაქო საზოგადოების და პოლიტიკური პარტიების წარმომადგენლებთან კიდევ გამართოს ერთი შეხვედრა და მათ უკეთ მიაწოდოს ინფორმაცია, რასთან გვქონდა საქმე. შექმნილია შთაბეჭდილება, თითქოს საქმე ეხება მხოლოდ წამებას, მაშინ, როდესაც აღნიშნული მასალები გაცილებით უფრო ვრცელია", - განაცხადა ლაშა ტუღუშმა, რომლის განმარტებითაც, სამინისტროში მორიგი შეხვედრა პირველ რიგში დიპლომატებთან გაიმართება.

გარდა ამისა, ტუღუში აღნიშნულთან დაკავშირებით პრეზიდენტის მიერ გუშინ გაკეთებულ განცხადებასაც გამოეხმაურა და იმაში დასარწმუნებლად, რომ დანაშაული ნამდვილად სისტემურ ხასიათს ატარებდა, ქვეყნის პირველი პირი კომისიის სხდომაზე მიიწვია.

"ჩვენ გამოვხატეთ აღშფოთება პრეზიდენტის გუშინდელ განცხადებასთან დაკავშირებით, თითქოს საქმე გვაქვს არა სისტემურ დანაშაულთან, არამედ ორი ადამიანის მიერ ჩადენილ უკანონო ქმედებასთან. ეს ჩემთვის გაუგებარია და ირონიულად ჟღერს, თუმცა თუ პრეზიდენტს მიაჩნია, რომ არ არსებობდა სისტემური მიდგომა, მობრძანდეს და ნახოს ჩვენთან ერთად ეს მასალები. მე პირადად არ მჯერა, რომ მან ამის შესახებ არ იცოდა", - აღნიშნა ტუღუშმა და განმარტა, რომ კომისიის სხდომაზე პრეზიდენტის მიწვევა უშუალოდ მისი დამოკიდებულებაა.

კომისიის კიდევ ერთი წევრის, ეკა გიგაურის განმარტებით კი, დიპლომატიური კორპუსის, სამოქალაქო საზოგადოების და პოლიტიკური პარტიების წარმომადგენლებთან დაგეგმილ მორიგ შეხვედრებზე ვიდეომასალების ჩვენება აღარ მოხდება და მათ უბრალოდ მიეწოდებათ ინფორმაცია დანაშაულის მასშტაბურობასთან დაკავშირებით.

"ინტერპრესნიუსი"