დავით ზურაბიშვილი: მიშისტებო, ნუ წაიღეთ ტვინი კონგრესის გადაწყვეტილებით

განათლების მინისტრის მოადგილე, დავით ზურაბიშვილი სოციალურ ქსელში აშშ-ის კონგრესის მიერ საქართველოსთან თავდაცვის სფეროში თანამშრომლობის შესახებ გამოქვეყნებულ განცხადებას ეხმაურება.

"ამერიკის კონგრესი კი არა, ზეცა რომ გაიპოს და ანგლოზთა დასმა იგალობოს, წინა ხელისუფლების დროს არასრულყოფილი დემოკრატია იყო და ახლა რეპრესიებიაო, ამ სისულელეს მაინც ვერავინ დამაჯერებს",- წერს ზურაბიშვილი  "ფეისბუქის" გვერდზე .

მისი განცხადებით, კონგრესის წარმომადგენლობითი პალატის კანონპროექტში კონგრესმენ მაიკ ტერნერის ჩანაწერია წარმოდგენილი.

"ნუ წაიღეთ ტვინი კონგრესის გადაწყვეტილებით, რომელიც კონგრესის გადაწყვეტილება არ არის და კონგრესის წარმომადგენლობითი პალატის კანონპროექტში კონგრესმენ მაიკ ტერნერის ჩანაწერია (კანონპროექტის მიღება ერთი თვის შემდეგ უნდა მოხდეს).

და ისე ამერიკის კონგრესი კი არა, ზეცა რომ გაიპოს და ანგლოზთა დასმა იგალობოს, წინა ხელისუფლების დროს არასრულყოფილი დემოკრატია იყო და ახლა რეპრესიებიაო, ამ სისულელეს მაინც ვერავინ დამაჯერებს. ბოლო ბოლო აქ ვცხოვრობ, ამ ქვეყანაში და არა სადღაც მაგელანის სრუტესთან", - წერს ზურაბიშვილი.

ამერიკის შეერთებული შტატების კონგრესის საქართველოსთან თავდაცვის სფეროში თანამშრომლობის შესახებ განცხადებაში ნათქვამია, რომ 2012 წლის საპარლამენტო არჩევნების შემდეგ არჩეული ახალი ხელისუფლების მიერ ყოფილი მაღალჩინოსნების მიმართ გატარებული ზომები პოლიტიკურად მოტივირებული იყო.

"საქართველოს მთავრობის მიერ ყოფილი მაღალჩინოსნებისა და პოლიტიკური ოპონენტების წინააღმდეგ გატარებულმა ზომებმა, რომლებიც ნაწილობრივ პოლიტიკურად მოტივირებულია, შესაძლოა, მნიშვნელოვანი ნეგატიური დარტყმა მიაყენოს აშშ-ისა და საქართველოს შორის თანამშრომლობას, მათ შორის პოლიტიკური, ეკონომიკური და უსაფრთხოების საკითხებში მყარი ურთიერთობის დამყარების მცდელობაში, ისევე როგორც საერთაშორისო ორგანიზაციებში საქართველოს ინტეგრაციის წინსვლას", - ნათქვამია კონგრესის განცხადებაში.