სტუდენტები განათლების შესახებ კანონში ცვლილებებს აპროტესტებენ

ილიას სახელმწიფო უნივერსიტეტის სტუდენტებმა "უმაღლესი განათლების შესახებ" მთავრობის მიერ ინიცირებული კანონპროექტი გააპროტესტეს. სტუდენტების განცხადებით, ამ კანონპროექტის მიღება დაინტერესებულ მხარეებთან ყოველგვარი კონსულტაციის გარეშე ხდება. მათი შეფასებით, ამ კანონპროექტის მიღებით აკადემიურ საბჭოს უფლება ერთმევა რექტორის მოვალეობის დროებითი შემსრულებელი დანიშნოს და ეს უფლება პრემიერ-მინისტრს ენიჭება.

"ეს პირდაპირი ჩარევაა უნივერსიტეტის ავტონომიაში. სწორედ ამის გამო გამოვედით აქციაზე და ვაპროტესტებთ ხელისუფლების მხრიდან ამის მცდელობას", - აცხადებენ სტუდენტები.

სტუდენტებმა აქცია ორ ეტაპად გამართეს. 11:00 საათზე ისინი ილიას სახელმწიფო უნივერსიტეტთან შეიკრიბნენ, სადაც მათ ცოცხალი ჯაჭვი გააკეთეს სახელწოდებით – "აკადემიური სოლიდარობის ჯაჭვი". სტუდენტები უნივერსიტეტის წინ, ჭავჭავაზის გამზირზე, დაახლოებით 100 მეტრის სიგრძეზე, საავტომობილო გზის ღერძულა ხაზზე განთავსდნენ ამ საპროტესტო ფორმის გამოსახატავად.

"ამ ჯაჭვით ჩვენ აკადემიურ თავისუფლებას მოვითხოვთ. სახელმწიფო, როდესაც ჩვენთან მიმართებაში რაღაცას წყვეტს, სტუდენტებსაც უნდა ჰკითხოს აზრი და აკადემიურ საბჭოსაც. ჩვენ არ გვინდა, რომ უნივერსიტეტებში ავტონომია შეილახოს", - აღნიშნეს ჯაჭვში ჩაბმულმა სტუდენტებმა.

ამის შემდეგ მათ მსვლელობა განათლების სამინისტროსთან მოაწყვეს, სადაც საკუთარი მოთხოვნები კიდევ ერთხელ დააფიქსირეს. განათლების სამინისტროსთან, სტუდენტები ტროტუარზე განთავსდნენ და გიორგი მარგველაშვილისა და მთავრობის მისამართით განცხადებები გააკეთეს.

სტუდენტებს ილიას უნივერსიტეტის რამდენიმე პროფესორიც შეუერთდა. გია ნოდიას განცხადებით, ამ კანონპროექტით მთავრობა უნივერსიტეტებზე კონტროლს ცდილობს.

"მთავრობა ცდილობს, რომ სახელმწიფო უნივერსიტეტების ამჟამინდელი ხელმძღვანელობა მათთვის სასურველი კანდიდატებით ჩაანაცვლოს, რაც უნივერსიტეტის საქმიანობაში პირდაპირი ჩარევაა", - აღნიშნა ნოდიამ.

განათლების სამინისტროსთან აქცია დაახლოებით 14:00 საათზე დასრულდა.

როგორც აქციის საინიციატო ჯგუფის წევრებმა განაცხადეს, მათი შემდგომი გეგმები პარლამენტის გადაწყვეტილებაზეა დამოკიდებული.

"ინტერპრესნიუსი"