საქართველოს პარლამენტის თავმჯდომარის, დავით უსუფაშვილის განცხადებით, დღეს ყველა გლოვობს, რადგან საქართველომ უდიდესი დანაკლისი განიცადა. როგორც უსუფაშვილმა თბილისის საერთაშორისო აეროპორტში, ავღანეთში დაღუპული ქართველი სამხედროების ჩამოსვენების შემდეგ ჟურნალისტებს განუცხადა, დღეს ყველა ამაყი უნდა იყოს, რადგან საქართველოს ასეთი მეომრები ჰყავს, იცოდნენ, სამშობლოს დასაცავად სად მიდიოდნენ და რა რისკის ქვეშ აყენებდნენ საკუთარ სიცოცხლეს.
"დღეს ყველა ვგლოვობთ, ვინაიდან საქართველომ განიცადა უდიდესი დანაკლისი. დღეს მშობლიური მიწაზე საკუთარი ფეხი ვერ დაადგეს ჩვენმა ჯარისკაცებმა. ჩვენმა მეომრები თავისუფლებას, თავის სამშობლოს იცავდნენ და სიცოცხლე შესწირეს მას, მაგრამ უნდა ვიყოთ ამაყებიც, რადგან ჩვენ გვყავს ასეთი ჯარი, ასეთი მეომრები, რომლებმაც იცოდნენ, სად მიდიოდნენ, იცოდნენ, რა რისკის ქვეშ აყენებდნენ საკუთარ სიცოცხლეს, მაგრამ ეს ნაბიჯი გადადგეს საკუთარი სამშობლოსა და საკუთარი ქვეყნისთვის. სამარადისოდ დიდება მათ. ქართულმა სახელმწიფომ ყველაფერი უნდა გააკეთოთ იმისთვის, რომ მათმა ოჯახებმა, შვილებმა მუდმივად და ყოველდღიურად იგრძნონ ჩვენი ზრუნვა და ის, რომ სამშობლოსთვის სამსახური არასოდეს იქნება დავიწყებული", - განაცხადა უსუფაშვილმა.
მისივე თქმით, საქართველო ამაყად დგას იმ სახელმწიფოების რიგში, რომლებიც ებრძვიან ტერორს, რომლებიც ებრძვიან ძალადობას და, რომლებიც იბრძვიან მშვიდობისთვის მთელ მსოფლიოში.
"ეს ბრძოლა გრძელდება და ჩვენ ღირსეულ წვლილს შევიტანთ მომავალშიც", - აღნიშნა უსუფაშვილმა.
ავღანეთში დაღუპულ სამხედროები საქართველოში დღეს ჩამოასვენეს. თბილისის საერთაშორისო აეროპორტში ამერიკული სამხედრო ლაინერი 02.25 საათზე დაეშვა.
ამავე ბორტით დაბრუნდა საქართველოს თავდაცვის მინისტრი ირაკლი ალასანია, რომელმაც დატრიალებული ტრაგედიის გამო ბრიუსელში ვიზიტი შეწყვიტა და ავღანეთში გაემგზავრა.
ქართველ სამხედროების ჩამოსვენების ცერემონიაზე იმყოფებოდნენ დაღუპულთა ოჯახების ახლობლები, აგრეთვე, საქართველოს პრეზიდენტი მიხეილ სააკაშვილი, პარლამენტის თავმჯდომარე დავით უსუფაშვილი, შინაგან საქმეთა მინისტრი ირაკლი ღარიბაშვილი, ენერგეტიკის მინისტრი კახა კალაძე, სახელმწიფო მინისტრი ირაკლი პეტრიაშვილი, უშიშროების საბჭოს მდივანი გიგა ბოკერია, დიპლომატიური კორპუსის წარმომადგენლები, სასულიერო პირები.
მიხეილ სააკაშვილმა აეროპორტი კომენტარის გარეშე დატოვა.
ჰელმანდის პროვინციაში, ქართულ მოწინავე ბაზასთან თვითმკვლელმა ტერორისტმა 6 ივნისს თავი აიფეთქა. აფეთქების შედეგად დაიღუპნენ კაპრალი თეიმურაზ ორთავიძე, კაპრალი გიორგი ადამოვი, პირველი კლასის რიგითი ზურაბ გურგენაშვილი, რიგითი მიხეილ ნარინდოშვილი, რიგითი ბორის ცუგოშვილი, პირველი კლასის რიგითი ზვიად სულხანიშვილი, პირველი კლასის რიგითი გიორგი ღუჭაშვილი.
