4
ივლისიდღის ზოგადი ასტროლოგიური პროგნოზი
ვერის პარკში "მედია პალიტრის" ორგანიზებით აქცია "ერთად დავიცვათ გარემო - ჩვენ სუფთა ქვეყანა გვინდა" გაიმართა. აქციის მონაწილეებმა ვერის ბაღი და მისი მიმდებარე ტერიტორია ნაგვის ნარჩენებისგან გაასუფთავეს. აქციაზე დარიგდა ქაღალდის პარკები წარწერით "ნარჩენის ურნაში ჩაგდებას 4 წამი სჭირდება".
დასუფთავების აქციაში მონაწილეობა "მედია პალიტრის" თანამშრომლებმა და რიგითმა მოქალაქეებმა მიიღეს, ძირითადად პატარა ბავშვები აქტიურობდნენ.
როგორც "მედია პალიტრის" კრეატიულმა დირექტორმა მარიკა დარჩიამ განაცხადა, "პალიტრამ" გადაწყვიტა, რომ დიდი ეკოპროექტის ინიციატორი იყოს.
"ამ კვირაში განსაკუთრებით მივაქციეთ ამ საკითხს ყურადღება, იმიტომ რომ 5 ივნისი იყო გარემოს დაცვის საერთაშორისო დღე. ჩვენი გაზეთები და ჟურნალები გამოვიდა მწვანე ფოთლით, რომელსაც ეწერა "შეინარჩუნე და მოუარე გარემოს". დღეს გვაქვს დიდი აქცია. ეს აქციები გაგრძელდება სხვადასხვა მწვანე წერტილებში, ბაღებში, რომ დავალაგოთ და მონაწილეობა მივაღებინოთ ბევრ ადამიანს. ეს ჩვენი ქალაქია და ჩვენ თუ არ მივხედავთ, არ დავალაგებთ და მერე დანაგვიანებულს არ ავიღებთ, ამას ვერავინ ვერ გააკეთებს", - აღნიშნა მარიკა დარჩიამ.
მისივე თქმით, დღევანდელ აქციას არასამთავრობო ორგანიზაციებიც შეუერთდნენ.
"ეს არის შემეცნებითი და თან საჭირო აქცია" , - განაცხადა "პალიტრის" კრეატიულმა დირექტორმა.
აქციის მონაწილეებს საჩუქრად გადაეცათ ჟურნალების: "გზის", "რეიტინგის" და "კარუსელის" ნომრები, ნატურალური მინერალური წყლის კომპანია "სნოსგან" კი სასმელი წყალი.
აქციის პარალელურად გაიმართა გამოფენა "FX"-ის ფოტოკონკურსში მონაწილეთა ფოტოების, ასევე ჟურნალ "კარუსელში" ბავშვების მიერ გამოგზავნილი ფოტოების.
ღონისძიების მხარდამჭერები არიან: გარემო დაცვის სამინისტრო, თბილისის მერია, "კოლორ პარკი", "სუფთა საქართველო", "მწვანე სკოლა", "ვისოლ ჯგუფი" და მისი შვილობილი კომპანია "სმარტი", წყალი "სნო".
