14
ივლისიდღის ზოგადი ასტროლოგიური პროგნოზი
როლანდ შინდელიშვილი კუდ-ის ყოფილი მაღალჩინოსანია და აცხადებს, რომ თავისივე ხელმძღვანელების მსხვერპლი აღმოჩნდა. იგი თავისი ოჯახის დაქცევაში კუდ-ის ხელმძღვანელ დათა ახალაიას და მის მოადგილე ვაჟა ლელუაშვილს ადანაშაულებს.
- სახელმწიფო უშიშროების აკადემიის დამთავრების შემდეგ ნარკომანიის წინააღმდეგ ბრძოლის ეროვნულ ბიუროში დავიწყე მუშაობა. შემდეგ მთაწმინდა-კრწანისის რაიონის კრიმინალურ პოლიციაში გადავედი, 2005 წელს კი - კონსტიტუციური უსაფრთხოების დეპარტამენტში, მე-2 მთავარი სამმართველოს მე-3 სამსახურის უფროსის მოადგილედ. ჩვენს კომპეტენციაში შედიოდა პრეზიდენტის უსაფრთხოება - პირადი დაცვის, ესკორტისა და ოპერატიული სამსახურის ზედამხედველობა, ასევე, სამოხელეო დანაშაულთან ბრძოლა. კუდ-ის უფროსის მოადგილე ვაჟა ლელუაშვილი და მამაჩემი დიდი ხნის ნაცნობები იყვნენ, ერთმანეთთან ნორმალური ურთიერთობა გვქონდა. 2008 წლის 5 აგვისტოს ლელუაშვილმა მამაჩემს დაურეკა და სთხოვა, სასწრაფოდ ენახა. მამაჩემი საირმეში მიდიოდა დასასვენებლად და ქუთაისიდან უკან დაბრუნდა. მე ბათუმში ვისვენებდი ახალშერთულ მეუღლესთან ერთად. მეც დამირეკეს და სასწრაფოდ ჩიტაძის ქუჩაზე მდებარე უშიშროების ერთ-ერთ დანაყოფში მიმიყვანეს. ლელუაშვილმა მამაჩემს უთხრა, მილიონი დოლარი უნდა მოიტანოო, მოლაპარაკების დასრულებამდე კი თანამშრომლებს ჩემი შეპყრობა უბრძანა. მამას ხუმრობა ეგონა, მაგრამ ეს ადამიანი მუქარაზე გადავიდა - ფულს თუ არ მოიტან, შენც დაგიჭერთ და შენს შვილსაცო. მერე ვაჭრობა დაუწყო, თანხა თუ გებევრება, შემიძლია 50 000 დაგიკლოო. მამაჩემი გაოგნებული წამოვიდა. მეორე დღეს ლელუაშვილმა მეტროს სადგურ "დელისთან" დაგვიბარა და იგივე გაგვიმეორა, მანამდე კი მამაჩემს 50-ჯერ მაინც დაურეკა, თან მუდმივად იმუქრებოდა. ვინაიდან სამ დღეში ომი დაიწყო, ვაჟამ ეს საქმე გადაგვიდო და გვითხრა, ახლა ამისთვის არ გვცალია, ყველაფერი რომ ჩაწყნარდება, მერე განვაგრძოთ ლაპარაკიო. 25 სექტემბერს "მოიცალეს" ჩემთვის და სოდ-მა დამაკავა, ანუ კუდ-მა ჩემი თავი ერეკლე კოდუას დააჭერინა.
- რას გედავებოდნენ?
- გამოძიების ვერსიით, ვითომ მოპარული ავტომანქანა ვიყიდე, თანაც ვიცოდი ამის შესახებ, ვისარგებლე კიდეც ამ ავტომობილით, ცოტა ხნის შემდეგ კი პატრონის უკან დავუბრუნე. ანუ ავტომანქანა 8 000 დოლარად ვიყიდე, რამდენიმე თვის შემდეგ კი, ვისგანაც ვიყიდე, მასვე 7 000 დოლარად უკან დავუბრუნე. გიჟი ვიყავი, ასეთი რამ გამეკეთებინა? ეს იყო შეთითხნილი ბრალდება. დაკავებისთვის რაღაც მოტივი ხომ უნდა ჰქონოდათ, რაღაცას ხომ უნდა მომდავებოდნენ? მოკლედ, წავიდა ფულზე ვაჭრობა. სოდ-ის თანამშრომლებმა ჩემი მშობლების სახლის ჩხრეკისას იქ ავტომატის 10 ცალი ტყვია ჩამიდეს, რითაც საქმე გაამყარეს. მანქანის ამბავი ბოლომდე რომ ვერ გაეტანათ, ამ ტყვიების გამო მაინც გამასამართლებდნენ. მამაჩემმა ამაზე ხმა არ ამოიღო, ნარკოტიკის ჩადებას, ისევ ტყვიების ჩადება მერჩიაო, ამბობდა. მთელი ოჯახი ისე დაზაფრული ვიყავით, ვეღარაფერს ვაკეთებდით. საპატიმროში 25 დღე მაყურყუტეს, საპროცესო გადამახდევინეს და გამომიშვეს. ჩემი ავტომანქანა BMW-ს მეშვიდე სერია, რომელშიც 40 000 დოლარი მქონდა გადახდილი (სოფელში 1000 კვმ მიწის ნაკვეთი გავყიდე და იმ ფულით ვიყიდე), თურმე ამირან მესხელს (ვანო მერაბიშვილის მოადგილე) მოსწონებია და მისი ხელში ჩაგდება განუზრახავს. ანუ კუდიდან მილიონს ითხოვდნენ, შსს-დან - ავტომანქანას. პროკურორმა და გამომძიებელმა "ზემოდან" დანაბარები გადმომცეს - მანქანის ჩუქება თუ არ გაფორმდება, ციხეში ჩაგალპობთო. შემდეგ საკანში ნოტარიუსი შემომიყვანეს და მითხრეს, მანქანის საბუთები გამზადებულია, შენი ხელმოწერაღა აკლია და საპროცესოსაც გაგიფორმებთო. მანამდე კი მაღიარებინეს, თითქოს მართლა მოპარული ავტომანქანა ვიყიდე და მერე გავყიდე. კარანტინში ჩამსვეს და გამიმწარეს ცხოვრება. ციხიდან როცა გამოვედი, 20 000 ლარი გადამახდევინეს საპროცესო (ოფიციალურად), ჩემი ავტომანქანა კი წაიყვანეს.
თუმცა ამით ყველაფერი არ დამთავრებულა: რამდენიმე თვის შემდეგ ისევ დამიბარეს პოლიციაში. სოფელ თელეთში ვიღაცამ ვიღაცას მიწის ნაკვეთი მიჰყიდაო და ამისთვის მე დამაკავეს. არადა, ამ საქმესთან არავითარი შეხება არ მქონია და არც მყიდველ-გამყიდველს ვიცნობდი. ადგნენ და ისევ დამიჭირეს, ამ საქმეში მონაწილე პირები არც კი უხსენებიათ. რაც გამაჩნდა, ყველაფერი წამართვეს - სოფელ შინდისში სახლი გამაყიდინეს და 50 000 ლარი შემატანინეს ბიუჯეტში... ჩემი ავტომანქანა ამირან მესხელს მოეწონა, ვაჟა ლელუაშვილს კი მილიონი დოლარი მოუნდა და ეს ფული რომ ვერ გადავიხადეთ, ამის მერე დაიწყო, რაც დაიწყო. ლელუაშვილი მამაჩემს ეუბნებოდა, თუ გადაიხდით, შენს ვაჟს დავაწინაურებთო. დარწმუნებული ვარ, ეს ყველაფერი დათა ახალაიას გარეშე არ მოხდებოდა. ლელუაშვილმა ის დააჯერა, რომ მილიონის გადამხდელი ვიყავი, საკმაოდ კარგად შეისწავლეს ჩვენი ქონებრივი მდგომარეობა.
- მეორედ რამდენ ხანს მოგიწიათ პატიმრობაში ყოფნამ?
- 6 თვე და 10 დღე ვიჯექი მე-8 დაწესებულებაში, სადაც ჯოჯოხეთი გამოვიარე. თაღლითობის მუხლი წამიყენეს, ვითომ საბუთები გავაყალბე და სახელმწიფო ვაზარალე. ვისაც იმ საქმესთან ჰქონდა შეხება (მიწის ყიდვა-გაყიდვასთან), მათი ახლობლები ყოფილან და ჩემი დაჭერით ეს საქმე "გააპრავეს". მე შემაწმინდეს ხელი და ქონებაც წამართვეს. ვიდრე დანაშაულს არ ვაღიარებდი, საპროცესოს არ მთავაზობდნენ. ეს აღიარებაც დიდი წამებისა და ზემოქმედების შედეგად მიიღეს. ისეთი ვითარება შეიქმნა, ან უნდა მეღიარებინა, ან დიდი ხნით ჩამალპობდნენ ციხეში (ასე მემუქრებოდნენ). სხვა გზა აღარ დამიტოვეს. დამერწმუნეთ, ასეთ ზემოქმედებას ნორმალური ადამიანი ვერ გაუძლებდა. წარმოიდგინეთ, ციხეში ცოცხების პერიოდში, გაუსაძლის პირობებში ვიყავი. წუწუნსა და გოდებას არ მოვყვები, მაგრამ ერთს კი ვიტყვი, რაც იქ ხდებოდა, მსგავსი რამ არც მსმენია და არც მინახავს. მე და ჩემს ოჯახს ჯოჯოხეთი გამოგვატარეს. ნერვიულობის ნიადაგზე დედაჩემს სიმსივნე გაუჩნდა და გარდაიცვალა. ყველაფერი, რაც გამაჩნდა, სახელმწიფოსთვის გადამაფორმებინეს - ფული, სახლკარი, მანქანა, მიწები, მილიონზე ბევრად მეტი წამგლიჯეს. მარტო მე კი არა, დათა ახალაიამ ჩემს სიმამრსაც წაართვა ავტომანქანა BMW-X5. ოჯახთან ერთად მიდიოდა და კუდ-ის თანამშრომლებმა წვიმაში ჩამოსვეს ავტომანქანიდან, ვინაიდან ის ახალაიას მოეწონა და სახლში მიუყვანეს. ეს საქმეც სასამართლოშია და პროკურატურამ ჩემი სიმამრი დაზარალებულად ცნო. ანუ მთელი ოჯახი ძველი ხელისუფლების რეპრესიებს ვემსხვერპლეთ. უდანაშაულო ადამიანი ორჯერ ვარ ნასამართლევი, გაძარცული და შეურაცხყოფილი. ჩემი ოჯახი უშუალოდ ვაჟა ლელუაშვილმა დააქცია, რომელმაც წილში გაიყვანა დათა ახალაია და ერეკლე კოდუა. ის არის შემსრულებელიც და ინიციატორიც. ვაჟა ლელუაშვილი სამი თვით დააპატიმრეს შოთა ხიზანიშვილთან ერთად და როგორც ვიცი, გირაოთი გამოუშვეს. იგი ნახევარ საქართველოს აკონტროლებდა. რაც კი სიბინძურე ხდებოდა ქვემო ქართლში, უიმისოდ არ კეთდებოდა. ცდილობდა, თვითონ ნაკლებად გამოჩენილიყო და ყველაფერს ბასიშვილებს და მისთანებს აკეთებინებდა. დათა ახალაიას რომ დიდი ჭკუა არ მოეკითხებოდა, ყველამ იცის, ლელუაშვილი იყო კუდ-ის "ტვინი", იგი მართავდა პროცესებს. იმედს ვიტოვებ, ახალი ხელისუფლების ხელში მაინც ვიპოვი სამართალს.
ნანა ფიცხელაური
ყოველკვირეული გაზეთი "ყველა სიახლე"
(გამოდის ოთხშაბათობით)
