მნიშვნელოვანი ინფორმაცია
23
მაისიდღის ზოგადი ასტროლოგიური პროგნოზი
პარასკევი, მთვარის ოცდამეექვსე დღე დაიწყება 03:27-ზე, მთვარე ვერძშია – საკმაოდ რთული დღეა. თავი შეიკავეთ ყოველგვარი კონფლიქტისგან. არ დაიწყოთ ახალი საქმეები. მოერიდეთ ფულის ხარჯვას; ვაჭრობაში არ მოტყუვდეთ. კარგი დღეა სწავლისა და გამოცდის ჩასაბარებლად. მოერიდეთ სამსახურის, საქმიანობის შეცვლას. უფროსთან კამათს. მგზავრობა და მივლინება სხვა დღისთვის გადადეთ. კარგია მსუბუქი ვარჯიში; საოჯახო საქმეების შესრულება. მოერიდეთ ხორციან კერძებს. სასურველია თევზისა და ბოსტნეულის. თავი შეიკავეთ მოწევისა და ალკოჰოლისგან. თავის ტკივილი რომ აირიდოთ, არ გადაიღალოთ გონებრივი სამუშაოთი. მოერიდეთ დიდხანს კითხვასა და ტელევიზორის ყურებას.
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
დიდი ჩეხვა - ანუ რას ეწირება დედაქალაქის ფილტვები
23:08 / 06-06-2013
"კაცმა, შეუბრალებელმა ადამიანმა მოგვიკლა გული, მოგვიკლა შვილი და დაგვტოვა თვალცრემლიანი. ადგა, ცულით დაუწყო ჭრა; იმას არ ესმოდა ჩვენი და ჩვენის შვილის კვნესა. ცულს რომ გვცემენ, ჩვენ ვკვნესით და თქვენ-კი, კაცნი, ამას "რაკუნს" ეძახით. გადმოგვდის სისხლი და თქვენ ჩვენს სისხლს "ხის წვენს" უწოდებთ... განა რომ ხელს არ გამოვიღებთ, თავ-პირს არავის ვაკაწრით... იმიტომ არაფერსა ვგრძნობთ?!"
რეპორტაჟის მომზადებისას სწორედ ვაჟა-ფშაველას ეს სტრიქონები მიტრიალებდა გონებაში და მივხვდი, რომ ამ პრობლემის აღსაწერად უკეთეს შესავალს ვერ მოვიფიქრებდი. თითოეული ფოტოს გადაღებისას თითქოს ამ ხეების მწუხარე ჩურჩული ჩამესმოდა და განვიცდიდი, რომ ვერ ვშველოდი. მაინც რა სასტიკები ვართ ადამიანები...
რატომ იჩეხება ხეები დედაქალაქში? ამის ძირითადი მიზეზი მიმდინარე მშენებლობებია. ხეები მოიჭრა კიკვიძის ბაღში, მტკვრის სანაპიროზე, ბარათაშვილის ხიდის მიმდებარე ტერიტორიაზე, აღმაშენებლისა და წერეთლის გამზირებზე, უზნაძის, პეკინისა და პუშკინის ქუჩებზე, იპოდრომის ტერიტორიაზე და სხვა მრავალ ადგილას.
პირველად კიკვიძის ბაღი მოვინახულე და სანამ იმ ავადსახსენებელ პოლიციის შენობამდე მივაღწევდი, რომლის მშენებლობასაც მრავალი ხე შეეწირა, გზად დაახლოებით 30-მდე მოჭრილი ხე დავითვალე. ზოგან ხის ფესვიანად ამოთხრის მცდელობის კვალსაც წავაწყდი. ეს კი ადვილი როდია, როცა ხეს ფესვები ღრმად აქვს გადგმული.
პოლიციის შენობასთან მისულს საინტერესო სურათი დამხვდა. მართალია, შენობის ირგვლივ აბიბინებულ ბალახს ხეების კვალი წაუშლია, მაგრამ ეს ამოძირკვული ხეები იქვე, საბავშვო ატრაქციონის მახლობლად შევნიშნე. ბატონი სტეფანე, რომელიც ამ ატრაქციონზე მუშაობს, ამ ფესვებს უკვე დიდი ხანია ინახავს:
"პოლიციის შენობის აგებისას ეს ხეები ძირიანად ამოთხარეს. ისე დამენანა, რაც მოვასწარი, აქ შემოვიტანე და მიწაში ჩავფალი. თუმცა, ვერ ვუშველე, ყველა გახმა, როგორც ჩანს, ძალიან დააზიანეს. ახლა გადავწყვიტე ამ ფესვების ღრმულებში მიწა ჩავყარო და ყვავილები ჩავრგო, ძალიან ლამაზი გამოვა, მენანება გადასაყრელად, ბოლოს და ბოლოს ეს ხომ ჩვენი შესანიშნავი ბუნების ფესვებია".
21-ე საუკუნის საქართველოში უკვე პოპულარული აღარ არის "ტყე შეუნახე შვილებსა, მამა ხარ შენი ვალია". თანამედროვე მამები ალბათ, მიიჩნევენ, რომ ამ საუკუნის ბავშვებს ტყე კი არა, გასართობი საშუალებები სჭირდებათ.
კიკვიძის ბაღიდან გეზი მეტრო "მარჯანიშვილის" სიახლოვეს მიმდინარე მშენებლობებისკენ ავიღე. უკვე მრავლად მოჭრილ ხეებს შორის ეულად მდგარი ხე შევნიშნე, რომელიც ტრაქტორის მიერ ამოთხრილი უზარმაზარი ორმოს ნაპირას ფესვებმოწყვეტილი ელის სიკვდილს. ხვალ ან ზეგ მის ფესვებსაც მოგლეჯს მექანიკური "ურჩხული". საცოდავად გამოიყურებოდნენ დაჩეხილი ხეები, ჯერ კიდევ შერჩენოდათ სინედლე. იქვე მჯდომმა მუშებმა მხოლოდ ის მითხრეს, რომ ეს მათი სამსახურია, ამით შოულობენ ლუკმაპურს...
ყველაზე საშინელი სურათი დაბა წყნეთის დასაწყისში, ეგრეთ წოდებულ "კაკლების" ტერიტორიაზე დამხვდა. ერთ-ერთი სამშენებლო ობიექტის ეზოში ნაძვნარი სამშენებლო ნივთებსა და ნაგვშია ჩაფლული. აქ ნაძვის მტვრით ფილტვებს ნამდვილად ვერ გაიწმენდთ, ყველაფერი ცემენტის ბუღშია გახვეული.
ამ ტრაქტორებით და სატვირთო მანქანებით სავსე ქუჩას თუ გაუყვებით, აუცილებლად წააწყდებით ნაგვის ურნასთან დაწყობილ ფესვებს, ძირიანად მოთხრილ ნაძვებს და თქვენ წარმოიდგინეთ - ბზასაც. დაზიანებულია მშენებლობის სიახლოვეს ჯერ კიდევ ცოცხლად დარჩენილი ხეებიც, თითქმის ყველა მათგანი ტოტებჩამოტეხილი და დაკაწრულია.
ანა გაბრიაძე - არასამთავრობო ორგანიზაცია "უსაფრთხო სივრცის" ხელმძღვანელი:
"თანამედროვე ადამიანი, მით უმეტეს ქალაქში მცხოვრები, განსაკუთრებით ნერვებდასუსტებული და გამოფიტულია, ამიტომ მისთვის აუცილებელია ბუნებაში ყოფნა. ბუნება გვამშვიდებს, მისი სილამაზე და სიჯანსაღე ჩვენს სულს სალბუნად ედება. ბაღები და პარკები ფუფუნების საგანი კი არ არის, მათ გარეშე ცხოვრება შეუძლებელია. არადა, ამის გაგება არავის სურს, არც ჩვენს მოსახლეობას და არც ხელისუფლებას.
თბილისის გარეუბნებში, და არა მარტო გარეუბნებში, კარგა ხანია უმოწყალოდ იჭრება და ზიანდება ხეები. ასეთი ფაქტები ჩვენმა ორგანიზაციამ ოქროყანასა და თბილისის ზღვის მიმდებარე ტერიტორიაზე გამოავლინა. ოქროყანაში ვნახეთ ტყის საკმაოდ დიდი მასივი, რომელიც შარშანწინ ხანძარმა გაანადგურა.
სრულიად დაუცველია თბილისის ზღვის მიმდებარე ტერიტორიაც. ხეების უმრავლესობას წაჭრილი აქვს კენწერო, ტოტები კი ჩამოსხეპილი. ათეულობით ფიჭვისთვის 50 სმ სიმაღლეზე ნაჯახით დაუზიანებიათ მერქანი. ეს დაზიანებული ფიჭვნარი 2 ჰექტარ ფართობს მოიცავს. თუ შარშან ხეების უნებართვო ჭრა გარეუბნებში და ძნელად მისასვლელ ადგილებზე ხორციელდებოდა, წელს უკვე მასობრივად მიმდინარეობს ქალაქშიც. ეს სერიოზული პრობლემაა".
მაკა ქობალია
ყოველკვირეული გაზეთი "ყველა სიახლე"
(გამოდის ოთხშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
ჩრდილოეთ კორეის ახალმა სამხედრო ხომალდმა კატასტროფა განიცადა
კვირის კითხვადი სტატიები
მნიშვნელოვანი ინფორმაცია
მკითხველის რჩევით
