ანა ნიკოლ სმიტზე ფილმს იღებენ

2007 წელს გარდაცვლილ მოდელსა და ჟურნალ "Playboy"-ს ვარსკვლავ ანა ნიკოლ სმიტზე ახალ ბიოგრაფიულ ფილმს იღებენ.

ფილმში "ანა ნიკოლის ამბავი" (Anna Nicole Story) მოდელის ყველაზე მნიშვნელოვანი ცხოვრების ეტაპები, გლამურული წვეულებები, პრესტიჟული ფოტოსესიები და სხვა საინტერესო ბიოგრაფიული დეტალები შევა. ანას როლს 27 წლის ამერიკელი მსახიობი აგნეს ბრუკნერი ასრულებს.

ანა საზოგადოებამ 1992 წელს, ჟურნალ "Playboy"-ს მარტის თვის გამოცემის გარეკანიდან გაიცნო. 180 სანტიმეტრის სიმაღლის ნიკოლი ზედმეტად ჭარბწონიანი იყო, თუმცა ამ ფაქტს მისთვის ხელი არ შეუშლია, მსოფლიოში ერთ-ერთი გავლენიანი მოდელი გამხდარიყო. 1985 წელს 17 წლის ანა რესტორნის მზარეულზე, 16 წლის ბილი სმიტზე დაქორწინდა. წყვილს ვაჟი დანიელი შეეძინათ. ანა და ბილი 2 წლის შემდეგ განქორწინდნენ.

1991 წელს სმიტი ამერიკელ ბიზნეს მაგნატს ჯეიმს ჰოვარდ მარშალს შეხვდა. 1994 წელს 26 წლის ნიკოლი და 89 წლის მარშალი დაქორწინდნენ. წყვილის ქორწინებამ საზოგადოების გაღიზიანება გამოიწვია. არავინ დაიჯერა, რომ ნიკოლი 63 წლით უფროს მილიარდერს სიყვარულით მისთხოვდა. ქორწილიდან 13 თვის შემდეგ ნიკოლი დაქვრივდა. ნიკოლმა და მარშალის შვილმა კი სასამართლოზე 1.6 მილიარდი დოლარის განაწილებაზე ნამდვილი ომი გააჩაღეს. 2006 წელს ანამ გოგონა დანიელინი გააჩინა. ანას ქალიშვილი ფოტოგრაფ ლარი ბირკჰედისგან შეეძინა.

ანას უფროსი შვილი დანიელი 2006 წელს 20 წლის ასაკში მედიკამენტების გადაჭარბებული დოზით გარდაიცვალა. ანა ნიკოლ სმიტი 2007 წელს ღამით ფლორიდის ერთ-ერთ სასტუმროში უგონო მდგომარეობაში იპოვეს. საავადმყოფოში გადაყვანიდან ნახევარი საათის შემდეგ, მოდელი გონზე მოუსვლელად გარდაიცვალა. ანა ვაჟის დაკარგვიდან 5 თვის შემდეგ დაიღუპა.

ანა ნიკოლ სმიტის ნამდვილი სახელი და გვარი ვიკი ლინ ჰოგანია. 

მომზადებულია dailymail.co.uk-ის მიხედვით.